މެޗުން މޮޅުވެ ވެލެންސިޔާއަށް ދެ ހިތްހަމަޖެހުމެއް!

ދިވެހި ޕްރިމިއަރ ލީގުގައި ކުޅުނު ފަސްވަނަ މެޗުން މޮޅުވި މެޗާއެކު ކްލަބް ވެލެންސިޔާއަށް ދެ ހިތްހަމަޖެހުމެއް ލިބިއްޖެއެވެ. ސަސް ބަލިކޮށް ހޯދި ތިން ޕޮއިންޓާއެކު ވެލެންސިޔާ ވަނީ ތާވަލްގެ އެއްވަނާގައި އޮތް މާޒިޔާއާ ޕޮއިންޓްގެ ގޮތުން އަރާ ހަމަކޮށްފައެވެ. ދެޓީމަށްވެސް ލިބިފައިވަނީ 12 ޕޮއިންޓެވެ. ނަމަވެސް މާޒިޔާ 12 ޕޮއިންޓް ހަމަކުރީ ކުޅުނު 4 މެޗުންވެސް މޮޅުވެގެންނެވެ. ތާވަލްގެ ދެވަނާގައި ވެލެންސިޔާއަށް ވަނީ 5 ޕޮއިންޓްގެ ލީޑެއް ލިބިފައެވެ. ނަމަވެސް އެއީވެސް ތިންވަނާގައި އޮތް ޔުނައިޓެޑް ވިކްޓްރިއަށްވުރެ މެޗެއް އިތުރަށް ކުޅެގެންނެވެ.

ސުޕަރ ޔުނައިޓެޑް ސްޕޯރޓްސް (ސަސް)ގެ މައްޗަށް ވެލެންސިޔާއިން މިއަދު ކުރި ހޯދީ 2-1 ނެވެ. ފުރަތަމަ ހާފްގައި ވެލެންސިޔާއިން ވަނި ދެ ލަނޑު ޖަހާ ހަމަޖެހިލާފައެވެ. ފުރަތަމަ ގޯލް ޖަހާ ކުރި ހޯދައިދިނީ ހަލީލް ޖަމާލްއެވެ. އޭނަގެ ލަނޑަށް ދެމިނިޓް ނުވަނީސް ޒުވާން ކުޅުންތެރިޔާ އާދަމް އިސާމް (ސަން) ވަނީ ދެވަނަ ލަނޑެއްޖަހާ ހަމަޖެހުން ގެނެސްދީފައެވެ. ސަސްގެ ހަމައެކަނި ލަނޑު ދެވަނަ ހާފްގައި ޖެހީ މުޙައްމަދު ޝަހާއުއެވެ.

މެޗުން މޮޅުވެގެން ލިބުނު ތިން ޕޮއިންޓާ އެއްވަރުގެ ހިތްހަމަޖެހުމެއް ވެލެންސިޔާއަށް ލިބުނީ ޓީމަށް ދިމާވެފައިވާ އަނިޔާއާއި އެހެން މައްސަލަތަކަށް ބޮޑު ހައްލެއް ލިބުމުންނެވެ. އަނިޔާގައި ހުރި ކެޕްޓަން އަލީ ފާސިރު (ސެންޓޭ)އާއި މިޑްފީލްޑަރ އިސްމާއީލް އީސާ (މެސީ) ވަނީ ޓީމާ ގުޅިފައެވެ. މީގެއިތުރުން ޕްރެޒިޑެންޓް ކަޕް ކާމިޔާބުކުރިއިރު މުހިއްމު ދައުރެއް އަދާކުރި ޤައުމީ ޓީމްގެ ކުރީގެ ކެޕްޓަން އަސްއަދު އަލީ (އަޑުބަރޭ) ވެސް ވަނީ 15 ދުވަހުގެ ޖަލުހުކުމަކަށްފަހު ޓީމާ ގުޅިފައެވެ. ނަމަވެސް މިއަދު މެޗުގައި މީގެތެރެއިން ފުރުޞަތު ދިނީ އިސްމާއީލް އީސާއަށެވެ. އީސައަށްވެސް ފުރުޞަތު ދިނީ 84 ވަނަ މިނިޓްގައެވެ.

ލީގުގައި މިރޭ ވާދަކުރާނީ ކްލަބް ގްރީން ސްޓްރީޓްސް އާއި ޓީސީ ސްޕޯރޓްސް ކްލަބެވެ.