ބުރާސްފަތި ދުވަހުން ފެށިގެން ޓެކްސީ ދަތުރުތައް ހުއްޓާލަން ޓެކްސީ ޑްރައިވަރުން ނިންމައިފި
ޓެކްސީ ސެންޓަރުތަކުން ވަނީ ދަތުރުތައް ކުރާނެ އަގުތަކެއް ކަނޑައަޅާފައި
ސިނަމާލެ ބްރިޖްމަތިން ޓެކްސީތަކެއް ދަތުރުކުރާ މަންޒަރު
ޓެކްސީ ދަތުރުތައް ކުރާ އަގަށް ސަރުޖާރުން ބަދަލު ނުގެންނަ ނަމަ ބުރާސްފަތި ދުވަހުން ފެށިގެން ޓެކްސީ ދަތުރުތައް ކުރުން ހުއްޓާލުމަށް ޓެކްސީތަކުގެ ޑްރައިވަރުން އަމިއްލަޔަށް ނިންމައިފިއެވެ.
ދުނިތޭގެ ބާޒާރުގައި ތެލުގެ އަގު މަތިވަމުންދާ މި ދަނޑިވަޅުގައި ރާއްޖޭގައިވެސް ޕެޓްރޯލާއި ޑީސަލް ވިއްކާ އަގު ވަނީ ބޮޑުކޮށްފައެވެ. އެއާއެކު މާލެ ސަރަހައްދުގައި ޓެކްސީ ކުރާ ޓެކްސީ ޑްރައިވަރުން ވަނީ ދަތުރުތަކުގެ އަގުތައް ބޮޑުކުރަން ނިންމައި، އެކަން ޓްރާންސްޕޯޓް މިނިސްޓްރީއަށްވެސް ހުށަހަޅާފައެވެ. މިކަން މިގޮތަށް ނިންމާފައިވަނީ މާލޭގައި ހިންގާ 14 ޓެކްސީ ސެންޓަރެއް ހިމެނޭހެންނެވެ.
ޓެކްސީ ސެންޓަރުތަކުން އަމިއްލައަށް ކަނޑައެޅި އަގުތަކަށް ބަލާއިރު، މާލޭ ސިޓީގެ އެތެރޭގެ ދަތުރަކަށް 30 ރުފިޔާ، ހުޅުމާލެ ފޭސް އެކެއް އަދި ފޭސް ދޭއްގެ އެތެރޭ ދަތުރަކަށް 25 ރުފިޔާ، ހުޅުމާލެ ފޭސް އެކަކުން ހުޅުމާލެ ފޭސް ދޭކަށް 40 ރުފިޔާ ނެގުމަށްވަނީ ނިންމާފައެވެ. އަދި ހުޅުމާލެ ފޭސް ދޭކުން މާލެއަށް އަދި މާލެ އިން ހުޅުމާލެ ފޭސް ދޭކަށް 120 ރުފިޔާ، މާލެއިން ހުޅުމާލެއަށް އަދި ހުޅުމާލެއިން މާލެއަށް 100 ރުފިޔާ، އެއާޕޯޓުން މާލެއަށް އަދި މާލެއިން އެއާޕޯޓަށް 80 ރުފިޔާ، ހުޅުމާލެއިން އެއާޕޯޓްގެ ސީޕްލޭން ޓާމިނަލަށް 100 ރުފިޔާ، މާލެއިން ހުޅުލޭ އެއާޕޯޓްގެ ސީޕްލޭން ޓާމިނަލަށް 100 ރުފިޔާ އަދި، ހުޅުމާލެ ފޭސް ދޭކުން ހުޅުލެ ސީޕްލޭން ޓާމިނަލަށް 120 ރުފިޔާއެވެ.
މިނިންމުމާއި ގުޅިގެން ޓްރާސްޕޯޓް މިނިސްޓްރީން ބުނީ، މިނިސްޓްރީން ފާސްކޮށް، އިއުލާންކޮށްފައިވާ އަގަށްވުރެ ބޮޑު އަގު ނަގާ ޓެކްސީތަކާއިމެދު ގާނޫނީ ގޮތުން އަޅަންޖެހޭ ފިޔަވަޅު އަޅާނެކަމަށެވެ.
މިކަމާއި ގުޅޭގޮތުން ރާއްޖެއެމްވީއަށް މައުލޫމާތުދެމުން މިކަމުގައި އިސްކޮށް ހަރަކާތްތެރިވާ ފަރާތަކުން ބުނީ މިނިސްޓްރީގެ ފަރާތުން މިކަމުގައި އެދެވޭ ޖަވާބެއް ނުލިބޭނަމަ ބުރާސްފަތި ދުވަހުގެ ވަކި ވަގުތަކުން ފެށިގެން ޓެކްސީ ދަތުރުތައް ހުއްޓާލުމަށް ޓެކްސީ ޑްރައިވަރުން ނިންމާފައިވާކަމަށެވެ. މިއާއެކު ޓެކްސީ ސެންޓަރުތަކުގެ މަސައްކަތްވެސް ހުއްޓިގެންދާނެ ކަމަށް އޭނާ ކިޔައިދީފައިވެއެވެ.
މިހާރު ދަތުރަކަށް ކަނޑައަޅާފައިވާ އަގުތަށް ނޫން އަގުތައް ނަގާނަމަ ގާނޫނުތަކާއި ގަވާއިދުތަކުގެ މަތިން ފިޔަވަޅު އެޅޭނެކަމަށް ފުލުހުން ބުނެފައިވާ ބުނުމަށް އިޝާރާތްކޮށް އޭނާ ބުނީ ފުލުހުން ގާނޫނާ ޚިލާފަށް ޓެކްސީ ޑްރައިވަރަކާ ދޭތެރޭ ފިޔަވަޅެއް އަޅައިފިނަމަ އެކަން ނޭޝަނަލް އިންޓެގްރިޓީ ކޮމިޝަނަސް ހުށަހަޅާނެ ކަމަށެވެ. އަދި ބައެއް ފަރާތްތަކުން މިހާރުވެސް ޓެކްސީ ޑްރައިވަރުންނަށް އިންޒާރު ދެމުން އަންނަކަމަށްވެސް އޭނާ ބުނެފައިވެއެވެ.
އާންމުންގެ ބަޔެއް ފަރާތްތަކުން ފާހަގަ ކުރާ ގޮތުގައި ޓެކްސީ ޑްރައިވަރުންގެ އިހްތިޖާޖު ތެޔޮ އަގުބޮޑުވުމުގެ ކުރިންވެސް ވަނީ ފަށާފައެވެ.އަދި ޓެކްސީގެ ޚިދުމަތް ފޯރުކޮށް ދިނުމުގައި އެންމެންނަށް ބޭނުންޖެހިފައިވާ އާންމު ޚިދުމަތެއް ފޯކޮށް ދިނުމަށް ވުރެ އެފަރާތްތަކުން ބަލަނީ ހަމައެކަނި އަމިއްލަ ފައިދާޔަށް ކަމަށް ބައެއް ފަރާތްތަކުން ބުނެފައި ވެއެވެ.އަދި މިކަމަކީ ސަރުކާރުން އަވަސް ހައްލެއް ހޯދާދޭން ޖެހިފައިވާ ކަމެއް ކަންވެސް އެފަރާތްތަކުން ފާހަގަ ކޮށްފައި ވެއެވެ.
