ވަޒީފާގެ އަޚުލާގު ހިފަހައްޓަން ޖެހޭ ކަމަށާއި ވަޒީފާގެ އަޚުލާގު ނުހިފެހެއްޓޭނަމަ ވަޒީފާގައި ކުރިއަށް ދިޔުމަކީ އުދަނގޫ ކަމެއް ކަމަށް ހަޔަރ އެޑިއުކޭޝަން މިނިސްޓަރު ޑރ. އިބްރާހިމް ހަސަން ވިދާޅުވެއްޖެއެވެ.

ފެނަކަ އިންސްޓިޓިއުޓް އޮފް ޓްރެއިނިންގ އެންޑް ރިސާޗުން ހިންގި އިންޖީން ރިޕެއަރ އެންޑް މެއިންޓެނެންސް ކޯސް (ފުނަރު ޕްރޮގްރާމް) ނިންމައި ދަރިވަރުންނަށް ސެޓިފިކެޓު ދިނުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ހަޔަރ އެޑިއުކޭޝަން މިނިސްޓަރު ވިދާޅުވީ މަސައްކަތުގެ ދާއިރާއިން ހުނަރުވެރި ފަންނުވެރި ޒުވާނުން ބިނާކުރުމަށް ގިނަ ފުރުސަތުތައް ފަހިކޮށްދިނުމަށް މިނިސްޓްރީން އިސްކަންދޭ ކަމަށާއި، އެކަން ކުރަން ތައްޔާރަށް ތިބި ކޮންމެ ބަޔަކާއެކު ވެސް މަސައްކަތް ކުރުމަށް ތައްޔާރަށް ތިބި ކަމަށެވެ. އަދި ސްޓޫޑެންޓް ލޯނަކީ ވެސް އެމަގުސަދުގައި ހުޅުވާލި ފުރުސަތުތައް ކަމަށް ވެސް ވިދާޅުވިއެވެ.

މިނިސްޓަރު ވިދާޅުވީ ވަޒީފާ އަދާކުރާއިރު އެންމެ މުހިއްމު ކަމަކީ އެ ވަޒީފާއެއްގެ އަޚުލާގު ހިފެހެއްޓުން ކަމަށެވެ. ތިމާއަކީ ވަޒީފާގެ އަޚުލާގު ނުހިފެހެއްޓޭ މީހެއްކަމަށްވާނަމަ ވަޒީފާގައި ކުރިއަށް ދިޔުމަކީ ވަރަށް ނާދިރުކަމެއް ކަމަށް ވެސް ވިދާޅުވިއެވެ. މިޒަމާނަކީ ކުޑަކުޑަ ތައުލީމަކާއި ތަމްރީނަކުން އަބަދު އެއް ވަޒީފާއެއްގައި ހުރުމުގެ ފުރުސަތު ފަހިވާނެ ޒަމާނެއް ނޫންކަމަށާއި އެހެންކަމުން ކޮންމެ ވަޒީފާއެއް އަދާކުރިކަމުގައި ވިއަސް އިތުރަށް އިލްމު ހޯދާ އިތުރަށް ތަމްރީނުވުމުގެ ޝައުގުވެރިކަން ބެހެއްޓެވުމަށް މިނިސްޓަރު އެދިވަޑައިގެންނެވި އެވެ.

އެޕްރެންޓިސްޝިޕް ޕްރޮގްރާމަށް އިޝާރަތް ކުރައްވައި މިނިސްޓަރު ވިދާޅުވީ މި ޕްރޮގްރާމަކީ ވަޒީފާގެ މާހައުލަށް ޒުވާނުން ތައްޔާރު ކުރުމަށް ވަރަށް މުހިއްމު ރޯލެއް އަދާކުރާ ޕްރޮގްރާމެއް ކަމަށެވެ.

މީގެ އިތުރުން މިނިސްޓަރު ވިދާޅުވީ ފެނަކަ އިންސްޓިޓިއުޓް އުފެދިގެން ދިޔައިރު، އެސްއޯއީތަކުން މިފަދަ އިންސްޓިޓިއުޓްތައް އުފައްދަނީ ކީއްކުރަންތޯ ގިނަ ބަޔަކު ސުވާލު އުފެއްދިކަން ފާހަގަކުރައްވައި މިނިސްޓަރު ވިދާޅުވީ އެ ފުރުސަތު ފެނަކައަށް ދެއްވީ ފެނަކައިން ވަރަށް މުހިއްމު ދާއިރާއަކުން މީހުން ބިނާކުރުމުގެ މަސައްކަތް ކުރާތީއާއި އަދި ވަރަށް މުހިއްމު ދާއިރާއަކުން މައުލޫމާތު ދިނުމުގެ ފުރުސަތު އޮތްކަން ގަބޫލު ކުރެއްވޭތީކަމަށެވެ. އަދި ފެނަކައިން އެޕްރެންޝިޕް ޕްރޮގްރާމް ފުރިހަމައަށް ކުރުމަކީ ވަރަށް ރަނގަޅު ވަރަށް ބޮޑު ތަޖުރިބާތަކެއް އެޕްރޮގްރާމުގެ ތެރެއިން ލިބިގެންދާނެ ކަމެއް ކަމަށްވެސް މިނިސްޓަރު ވިދާޅުވިއެވެ.  

މިނިސްޓަރު ވިދާޅުވީ ސަނަދު ލިބިގެންދިޔަ އެޕްރެންޝިޕް ޕްރޮގްރާމަކީ ވަރަށް މުހިއްމު އިނީޝިއޭޓިވްއެއް ކަމަށާއި ފެނަކައަކީ ރާއްޖެއަށް ތަރައްގީ ގެންނަން ބޭނުންވާ ވަރަށް މުހިއްމު ހިއްސާދާރެއް ކަމަށެވެ. ސަރުކާރުގެ މެނިފެސްޓޯގައި ބަޔާންކުރެވިފައިވާ ތަސައްވަރު ހާސިލް ކުރުމުގައި ފެނަކަ ވެގެން ދަނީ ވަރަށް މުހިއްމު ބައިވެރިއަކަށް ކަމަށްވެސް ވިދާޅުވިއެވެ.

ހޮނިހިރު ދުވަހުގެ ރޭ ބޭއްވި ދަސްވެނިވުމުގެ ރަސްމިއްޔާތުގައި އިންޖީން ރިޕެއާ އެންޑް މެއިންޓަނަންސް ލެވެލް ތިނެއްގެ ކޯސް ފުރިހަމަކުރި 23 ދަރިވަރުންނަށް ވަނީ ސެޓްފިކެޓް ދީފައެވެ. އެ ކޯސްތައް ކުރިއަށް ގެންގޮސްފައިވަނީ ރާއްޖޭގެ އަށް ސަރަހައްދަކަށް އަމާޒުކޮށް އަށް ރަށެއްގައެވެ. އެއީ ށ. މިލަންދޫ، ހދ. ކުޅުދުއްފުށި، ނ. ވެލިދޫ، ތ. ވިލިފުށި، ޏ. ފުވައްމުލައް، ދ. ކުޑަހުވަދޫ، ބ. އޭދަފުށި އަދި ސ. ހިތަދޫއެވެ.