ކްރިކެޓް ބޯޑް އޮފް މޯލްޑިވްސް (ސީބީއެމް) އިން ރާއްޖެއަށް މުޅިން އަލަށް ތައާރަފްކޮށްގެން ކުރިއަށް ގެންދާ ޓީ10 ކްރިކެޓް މުބާރާތުގެ ސެމީ ފައިނަލުގެ ޖާގަ ސީބީއެލް، މާލެ ސްޕޯޓްސް ކްލަބް، މިލާން ކްރިކެޓް އެކެޑަމީ އަދި ކޮމެޓްސް ސްޕޯޓްސް ކްލަބުން ކަށަވަރުކޮށްފިއެވެ.

މި މުބާރާތުގެ ކުއާޓާ ފައިނަލް ހޮނިހިރު ދުވަހުގެ ހެނދުނާއި މެންދުރުފަހު ކުޅެފައިވާއިރު، ސެމީ އަދި ފައިނަލް މެޗުތައް އޮންނާނީ މިއަންނަ ހުކުރު އަދި ހޮނިހިރު ދުވަހުއެވެ.

ހޮނިހިރު ދުވަހުގެ ހެނދުނު ކުޅުނު ފުރަތަމަ ކުއާޓާ ފައިނަލުގައި ބައްދަލުކުރީ ވިޔަންސާ އާއި ސީބީއެލްއެވެ. ގްރޫޕް ސްޓޭޖު ހުރިހާ މެޗަކުން މޮޅުވެގެން ކުއާޓާ ފައިނަލަށް ދަތުރުކުރި ވިޔަންސާ ބަލިކޮށް ސީބީއެލްއިން ވަނީ ސެމީގެ ޖާގަ ކަށަވަރުކޮށްފައެވެ. ފޯރިގަދަ މި މެޗުގައި، ވިޔަންސާގެ ހުރިހާ ކުޅުންތެރިން ނުބައިވެގެން ހެދުނީ 53 ލަނޑެވެ. އަދި ޖަވާބުގައި ސީބީއެލްއިން ވަނީ 8.3 އޯވަރުގެ ތެރޭގައި ތިން ކުޅުންތެރިން ނުބައިވެގެން 54 ލަނޑު ހަދާފައެވެ.

ކުއާޓާ ފައިނަލުގެ ދެވަނަ މެޗުގައި ބައްދަލުކުރީ މާލޭ ވެޓެރަންސް އާއި މާލޭ ސްޕޯޓްސްއެވެ. މި މެޗުން މާލޭ ސްޕޯޓްސް މޮޅުވީ 24 ލަނޑުންނެވެ. މާލޭ ސްޕޯޓްސް އިން 10 އޯވަރު ތެރޭގައި 8 ކުޅުންތެރިން ނުބައިވެގެން 105 ލަނޑު ހެދިއިރު، މާލޭ ވެޓްރަންސް އަށް 10 އޯވަރުގެ ތެރޭގައި ނުވަ ކުޅުންތެރިން ނުބައިވެގެން ހެދުނީ 81 ލަނޑެވެ.

ތިންވަނަ މެޗުގައި ވެސްޓް ސްޕޯޓްސް ކްލަބާ ބައްދަލުކޮށް މިލާން ކްރިކެޓް އެކަޑަމީން ވަނީ މެޗު ކާމިޔާބުކޮށްފައެވެ. ވެސްޓުން ކުޅެން އަރައި 10 އޯވަރުގެ ތެރޭގައި 6 ކުޅުންތެރިން ނުބައިވެގެން 49 ލަނޑު ހެދިއިރު، މިލާނުން މެޗު ކާމިޔާބު ކުރީ ޖަވާބުގައި ކުޅެން ނުކުމެ، 5.5 އޯވަރުގެ ތެރޭގައި އެންމެ ކުޅުންތެރިއެއް ނުބައިވެގެން 50 ލަނޑު ހަދައިގެންނެވެ.

ކުއާޓާގެ ފަހު މެޗުގައި ބައްދަލުކުރީ އޮއްފު އެފްސީ އާއި ކޮމެޓްސްއެވެ. މި މެޗުން ކޮމެޓްސް ކުރިހޯދީ 17 ލަނޑުންނެވެ. ކޮމެޓްސް އިން ކުޅެން އަރައި 10 އޯވަރު ތިން ކުޅުންތެރިން ނުބައިވެގެން 76 ލަނޑު ހެދިއެވެ. ޖަވާބުގައި އޮއްފުން ކުޅެން ނުކުމެ 10 އޯވަރުގެ ތެރޭގައި 9 ކުޅުންތެރިން ނުބައިވެގެން ހެދުނީ 59 ލަނޑެވެ.

މުބާރާތުގެ ފުރަތަމަ ސެމީ ފައިނަލުގައި ހުކުރު ދުވަހު ހެނދުނު ބައްދަލުކުރާނީ ސީބީއެލް އާއި ކޮމެޓްސްއެވެ. ދެވަނަ ސެމީގައި ހުކުރު ދުވަހު މެންދުރު ފަހު ބައްދަލުކުރާނީ މިލާން ކްރިކެޓް އެކަޑަމީ އާއި މާލޭ ސްޕޯޓްސް ކްލަބެވެ. މި މުބާރާތުގެ ފައިނަލް މެޗު ކުޅުމަށް ތާވަލުކުރެވިފައިވަނީ ހޮނިހިރު ދުވަހުއެވެ.