ހިޖުރަކުރީ ރަނގަޅު ދިރިއުޅުމެއް ހޯދަން، މިހާރު ދިރިއުޅެނީ ގަހެެއްގައި

ރަނގަޅު ދިރިއުޅުމެއް ހޯދުމަށް އެއް ތަނުން އަނެއް ތަނަށް ހިޖުރަކުރުމަކީ ގިނަ ބަޔަކު އަބަދުވެސް ކުރާ ކަމެކެވެ. އެކި މީހުން ހިޖުރަކުރުމުގައި އެކި ސަބަބުތައް ހުރެއެވެ. އެއް ބަޔަކު އާއިލާއަށްޓަކައެވެ. އަނެއްބަޔަކު އަމިއްލަ ނަފްސަށްޓަކައި، ރަނގަޅު ދިރިއުޅުމެއް ހޯދުމުގެ މަގުސަދުގައެވެ. މިގޮތުން މިހާތަނަށް އައިއިރު އެތައް މިލިއަން ބަޔަކު ވަނީ އެކި ސަބަބުތަކާހުރެ އެމީހުންގެ އަމިއްލަ ވަޒަން ދޫކޮށް އެހެން ތަންތަނަށް ހިޖުރަކޮށްފައެވެ. މިހާތަނަށް އެއް ތަނުން އަނެއް ތަނަށް ހިޖުރަކޮށްފައިވާ މީހުންގެ ތިންބައިކުޅަ ދެބައި މީހުންނަކީ ވަޒީފާ އަދާކުރުމަށް އެއް ތަނުން އަނެއް ތަނަށް ހިޖުރަކޮށްފައިވާ މީހުންނެވެ.

މީގެ ތެރެއިން ރަނގަޅު ދިރިއުޅުމެއް ހޯދުމަށް އަމިއްލަ ވަޒަން ދޫކޮށް ހިޖުރަކުރި ވެނެޒުއޭލާގެ ރައްޔިތަކު ވަނީ މުޅި ދުނިޔޭގެ ސަމާލުކަން ހޯދާފައެވެ. އެއީ 55 އަހަރުގެ ކަރލޮސް ސަންޗޭޒްއެވެ. ސަންޗޭޒް ވަނީ 2016 ވަނަ އަހަރު އޭނާގެ އަމިއްލަ ވަޒަން ދޫކޮށް ކޮލަމްބިއާއަށް ހިޖުރަކޮށްފައެވެ. އަމިއްލަ ވަޒަން ދޫކޮށް އޭނާ ހިޖުރަކޮށްފައިވަނީ ރަނގަޅު ދިރިއުޅުމެއް ހޯދުމުގެ މަގުސަދުގައެވެ. އޭނާ ހިޖުރަކުރީ އެކަންޏެވެ. އާއިލާގެ އެހެން މީހުން އަދިވެސް ދިރިއުޅެމުންދަނީ ވެނެޒުއޭލާގައެވެ. ގިނަ މީހުން ހިޖުރަކުރަނީ ސަންޗޭޒް އެ ހިޖުރަކުރި ސަބަބަށްޓަކައެވެ. އެހެންނަމަވެސް މިގޮތަށް ހިޖުރަކުރާ ކޮންމެ ބަޔަކަށް އެމީހުން އެ ހާސިލްކުރަން ބޭނުންވާ މަގުސަދު ހާސިލްވޭތޯ ސުވާލު އުފެދެއެވެ.

ރަނގަޅު ދިރިއުޅުމެއް ހޯދަން ހިޖުރަކުރި ސަންޗޭޒް މިހާރު ދިރިއުޅެމުންދަނީ ގަހެއްގައި ހަދާފައި ހުރި ގެއެއްގައެވެ. ނުވަތަ "ޓްރީ ހައުސް" އެއްގައެވެ. މިއީ އޭނާ އުންމީދުކުރި ފަދަ ދިރިއުޅުމަކަށް ނުވެދާނެއެވެ. އެހެންމަވެސް އޭނާ އެ ތަނުގައި ދިރިއުޅެމުންދާތާ މިހާރު ވަނީ ހަތަރު އަހަރަށްވުރެ ގިނަ ދުވަސް ވެފައެވެ. ސަންޗޭޒް ދިރިއުޅެމުންދަނީ ކޮލަމްބިއާ އަދި ވެނެޒުއޭލާ ވަކިކުރާ ބޯޑަރު ކައިރީގައެވެ.

އޭނާ ބުނި ގޮތުގައި އެ ގަސް އޭނާއަށް ލިބުނީ އެގަހުގެ މިލްކުވެރިޔާއަށް އެހީތެރިވެދީގެންނެވެ. މިގޮތުން އެގަހަށް ފެން ދީ، އެ ގަސް ވަރަށް ރަނގަޅަށް ބަލަހައްޓާފައިވާކަމަށް އޭނާ ވަނީ ކިޔައިދީފައެވެ. އަދި އެ ބިންވެސް ރަނގަޅަށް ސާފުކޮށް ބަލަހައްޓާފައިވެއެވެ. އެކަން ކޮށްގެން އޭނާ ވަނީ އެ ބިމުގެ މިލްކުވެރިޔާގެ އިތުބާރު ހޯދާފައެވެ. އެ ގަސް ލިބުމުން އެގަހުގައި އޭނާއަށް ދިރިއުޅެވޭނެ ގޮތް ހެދީއެވެ. އެކަން ކުރީ ލަކުޑިއާއި ވާ ފަދަ ތަކެތި ބޭނުންކޮށްގެން، އޭނާގެ އަމިއްލަ މަސައްކަތުންނެވެ.

ސަންޗޭޒް ބުނިގޮތުގައި އޭނާ އެތަނުގައި ދިރިއުޅެމުންދަނީ ހިތްހަމަޖެހިގެންނެވެ. އެހެންނަމަވެސް ބައެއް ދުވަސްދުވަހު އެކަނިވެރިކަމުގެ އިހުސާސް ވަރަށް ބޮޑަށް ކުރެވޭ ކަމަށް އޭނާ ކިޔައިދީފައިވެއެވެ. އޭނާ ބުނީ އެކަނިވެރިވުމުން ކުރެވިފައިހުރި ރަނގަޅު ކަންތައްތަކާއި، ގޯސްކޮށް ކުރެވިފައި ހުރި ކަންތައްތަކާ ދޭތެރޭ ވިސްނާ ފިކުރު ކުރެވޭ ކަމަށެވެ. އެއީ ކޮންމެވެސް ވަރެއްގެ ހިތްހަމަޖެހުމެއް ގެނުވާ ކަމެއް ކަމަށާއި އަދި ހިތާދަތިކަން ވެސް ގެނުވާ ކަމެއް ކަމަށް ސަންޗޭޒް ކިޔައިދީފައިވެއެވެ.

ސަންޗޭޒް އެ ދިރިއުޅެމުންދަނީ އޭނާ އެންމެ އުންމީދުކުރި ގޮތަށް ކަމަށް ނުވެދާނެއެވެ. އެހެންނަމަވެސް އޭނާ އެ ދިރިއުޅެމުންދަނީ ކޮންމެވެސް ވަރަކަށް ހިތްހަމަޖެހިގެންކަން އޭނާގެ ވާހަކަތަކުން އެނގެއެވެ.