ޗައިނާ ޕީޕަލްސް ކޮންގްރެސް ހުޅުވުން

ތައިވާނުން ޗައިނާއާ ވަކިވުމުގެ ފިކުރަށް ޗައިނާގެ ސަރުކާރުން އަދިވެސް ވަރަށް ބޮޑަށް ނުގަބޫލުކަން ތަކުރާރު ކުރައްވަމުން, އެފަދަ ހަރަކާތްތަކާއި އަދި މިކަމުގައި ބޭރުފަރާތެއްގެ ނުފޫޒު ބަލައިނުގަންނަވާނެ ކަމުގައި ޗައިނާގެ ޕްރެމިއަރ ލީ ކަރ ޗަންގ ވިދާލުވެއްޖެއެވެ.

ޗައިނާގެ ޕާލަމެންޓް ނުވަތަ ނެޝަނަލް ޕީޕަލްސް ކޮންގްރެސް ގެ ހުޅުވުމުގެ ރަސްމިއްޔާތުގައި ހޮނިހިރު ދުވަހު ވާހަކަފުޅު ދައްކަވަމުން ލީ ވިދާޅުވީ, ތައިވާނާއެކު ގުޅުންތައް ދެމެހެއްޓުމުގައި ސުލްހަވެރިކަމަށް ޗައިނާއިން އިސްކަންދޭކަމުގައެވެ.

ޑިމޮކްރެޓިކް ތައިވާނަކީ ޗައިނާގެ އަމިއްލަ ޓެރިޓަރީ އެއްކަމަށް ޗައިނާއިން އަންނަނީ ދައުވާ ކުރަމުންނެވެ. އަދި ފާއިތުވި ދެއަހަރުވަނީ އެސަރަހައްދުގައި ކުރިޔަށް ގެންދާ މިލިޓަރީ ހަރަކާތްތައް އިތުރު ކޮށްފައެވެ. ތައިވާނަށް އެންމެ ގިނައިން ހަތިޔާރު ފޯރުކޮށްދެނީ އެމެރިކާއިން ކަމަށްވާއިރު، ޗައިނާއިން ބުނަމުން ދަނީ މިލިޓަރީ ހަރަކާތްތައް އިތުރު ކުރަނީ އެމެރިކާއާއި ތައިވާން ގުޅިގެން އެސަރަހައްދުގައި އެފަދަ ހަރަކާތްތަކެއް ކުރިޔަށް ގެންދާތީ ކަމުގައެވެ

ހޮނިހިރު ދުވަހުގެ ތަގުރީރުގައި ލީ އިތުރަށް ވިދާޅުވީ, ޗައިނާއިން އަދިވެސް ގެންގުޅޭނީ އެއްޗައިނާ އުސޫލު ކަމަށާއި މިކަމުގައި ބޭނުންވަނީ ސުލްހަވެރި ގުޅާލުމެއް ކަމަށެވެ.

ވެރިކަމުގެ ހަރުކަށިއުސޫލުތަކެއް ގެންގުޅޭ ޗައިނާގެ ދަށުގައި އޮތުމަކީ ތައިވާންގެ ގިނަ ރައްޔިތުންނަށް މާބޮޑު މައްސަލައަކަށް ނުވާކަމަށް މީޑިޔާ ރިޕޯޓްތައް ބުނެއެވެ.

ނަމަވެސް ތައިވާންގެ ރައީސް ސައި އިންގ ވެން މަގާމަށް އިންތިޚާބްވެ ވަޑައިގެންފައިވަނީ 2020 ވަނަ އަހަރު ބޭއްވުނު އިންތިޚާބްގައި ވަރަށް ބޮޑު އަޣުލަބިއްޔަތަކާއެކުގައެވެ. އެކަމަނާގެ ކެމްޕެއިން ސްލޯގަންއަކީ ތައިވާންގެ ޑިމޮކްރެސީ ދަމަހައްޓަވާނެކަމަށާއި, ޗައިނާގެ ބިރުދެއްކުންތަކުގެ ކުރިމަތީގައި އިސްޖެއްސެވުމަކާނުލައި ކުރިޔަށް ވަޑައިގަންނަވާނެ ކަމުގައެވެ. ސައި ވިދާޅުވަނީ ތައިވާނަކީ މިހާރުވެސް މިނިވަން ދައުލަތެއް ކަމަށާއި އަދި ޗައިނާއާއެކު ވާހަކަތަކަށް ވަޑައިގެންނެވުމަށް އެދިވަޑައިގަންނަވާ ކަމުގައެވެ. ނަމަވެސް ޗައިނާއިން ބުނަނީ މިފަދަ ވާހަކަތަކަކަށް ދާން ބޭނުން ނޫންކަމުގައެވެ.