އަބްދުއްރަހީމަށް ފާޑުވިދާޅުވުމަށްފަހު ޕީއެންސީގެ އެސްޖީކަމުން ޝިފާގު ވަކިވެވަޑައިގެންފި
އަބްދުއްރަހީމް ގެންގުޅެނީ މެންބަރުންގެ މޫނަށް ހައްޕުނޑު ބުރުވުމުގެ އުސޫލެއްކަމަށް ވިދާޅުވި
ޝިފާގް މުފީދު
ޕީއެންސީގެ ޗެއަރޕާސަން އަބްދުއްރަހީމް އަބްދުﷲ އަށް ހުތުރުގޮތަކަށް ފާޑުވިދާޅުވުމަށްފަހު އެ ޕާޓީގެ ސެކްރެޓަރީ ޖެނެރަލްކަމުގެ މަގާމުން ޝިފާގު މުފީދު އިސްތިއުފާ ދެއްވައިފިއެވެ.
ޝިފާޤު ވަކިވެވަޑަގަތްކަމުގެ ސިޓީ ފޮނުއްވާފައި ވަނީ ބުރާސްފަތި ދުވަހުއެވެ. ޕާޓީގެ ރައީސް ޑރ. މުޙައްމަދު މުޢިއްޒަށް އެޑްރެސްކުރައްވައި ޝިފާގް ފޮނުއްވި ސިޓީގައި ވަނީ ޕާޓީ ހިނގާ މަގަކީ "ހައްދުންމަތިން" އަންނަ މީހަކު ޕާޓީ އޮފީސް ތެރެއިން އަޑަފި ހިއްޕަވައި ނިކުންނަވައިގެން، ޕްރޮގްރެސިވް ކޮންގްރެސްގެ އެންމެ މެންބަރުންގެ މޫނަށް "ހައްޕުނޑު"ބުރުވުމުގެ ނޭއްގާނީ އުސޫލުން ކަމަށެވެ.
އެފަދަ ޙާލަތެއްގައި މެންބަރުންގެ މޫނުމަތި މާލީސްކޮށްގެންވެސް އެ މެންބަރުންގެ މާޔޫސްކަން ފިލުވައި ދިވެހީންގެ ރާއްޖެ، ދިވެހިން އެދޭ މަގަށް ގެންދެވޭނެ ކަމަށް ޤަބޫލުނުކުރެވޭ ކަމަށް ވިދާޅުވެ އޭނާ ވަނީ ޕާޓީގެ އެސްޖީގެ މަގާމާއި ޕާޓީގެ މެންބަރުކަމުން އިސްތިއުފާދެއްވާ ކަމަށް ވިދާޅުވެފައެވެ.
ޝިފާގު ޕީއެންސީން ވަކިވެވަޑައިގެން މިހާރު ވަނީ ކުރީގެ ރައީސް އަބްދުﷲ ޔާމީން އިސްވެ ހުންނަވައިގެން އުފައްދާ ޕީއެންއެފްއާއި ގުޅިވަޑައިގެންފައެވެ.
