ކެނެބިސް ޓްރެފިކްކޮށް އިއުތިރާފުވި މީހަކު އުމުރަށް ޖަލަށް ލުމާއެކު 1 ލައްކަ ރުފިޔާއިން ޖޫރިމަނާކޮށްފި
ކްރިމިނަލް ކޯޓުގައި މި މައްސަލަ ބެއްލެވީ ގާޒީ އާދަމް މުޙައްމަދު
ފުލުހުން ހިންގި އޮޕަރޭޝަނެއްގެ ތެރެއިން- 14 ގްރާމަށްވުރެ ގިނަ އަދަދަކަށް ކެނެބިސް ނުވަތަ ކެނެބިސް މިކްސްޗަރ ހުރެއްޖެނަމަ، އެ އެއްޗެއް ހުރީ ޓްރެފިކް ކުރުމަށް ކަމަށް ބެލެވޭ
ކެނެބިސް ޓްރެފިކްކޮށް އެކަމަށް އިއުތިރާފުވި މީހަކު އުމުރަށް ޖަލަށް ލުމާއެކު 1 ލައްކަ ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ޙުކުމް ކޮށްފިއެވެ.
ކްރިމިނަލް ކޯޓުން މި ޙުކުމް ކޮށްފައިވަނީ ތ. ކިނބިދޫ ދީފްރަމްގޭ ޔޫނުސް ރަޝާދުގެ މައްޗަށެވެ. އެގޮތުން އޭނާގެ މައްޗަށް އުފުލާފައިވަނީ ކެނެބިސް ޓްރެފިކް ކުރުމުގެ ކުށުގެ ދައުވާއެވެ.
މި މައްސަލައިގައި އޭނާގެ މައްޗަށް ދައުވާ ކޮށްފައިވަނީ އޭނާ އިތުރު ބަޔަކާއެކު ރާއްޖެއަށް މަސްތުވާތަކެތި އެތެރެކުރުމަށްފަހު އެތަކެތި ޓްރެފިކް ކުރާ ކަމަށް ފުލުހުންނަށް ލިބުނު މައުލޫމާތަކާއި ގުޅިގެން ހިންގި އޮޕަރޭޝަނެއްގައި ހައްޔަރުކޮށް އޭނާގެ މައްޗަށް އެކަށީގެންވާ ހެކި ހުރުމުންނެވެ. އޭނާ ހައްޔަރު ކޮށްފައިވަނީ 29 އޭޕްރީލް 2021 ގައެވެ.
މަސްތުވާތަކެއްޗާ ބެހޭ ޤާނޫނުގައިވާ ގޮތުން އެތަކެއްޗަށް ދެވިހިފާފައިވާ މީހެއްގެ އަތުން 14 ގްރާމަށްވުރެ ގިނަ އަދަދަކަށް ކެނެބިސް ނުވަތަ ކެނެބިސް މިކްސްޗަރ ހުރެއްޖެނަމަ، އެ އެއްޗެއް ހުރީ ޓްރެފިކް ކުރުމަށް ކަމަށް ބެލެވޭނެއެވެ.
އަދި ކެނެބިސް ޓްރެފިކް ކުރުމުގެ ކުށުގެ އަދަބަކީ އުމުރަށް ޖަލަށް ލުމާއެކު، އެއް ލައްކަ ރުފިޔާއިން ފެށިގެން އެއް ލައްކަ ރުފިޔާއާ ދެމެދުގެ އަދަދަކުން ޖޫރިމަނާ ކުރުމެވެ.
މި މައްސަލައިގައި ޔޫނުސް ރަޝާދުގެ މައްޗަށް ކޮށްފައިވާ ދައުވާއަށް ޖަވާބުދާރީވަމުން އޭނާ ވަނީ އެއްވެސް މަޖުބޫރުކަމެއް އަދި ނުފޫޒެއް ނެތްކަން ފާހަގަކޮށް ދައުވާއަށް އިއުތިރާފުވެފައެވެ. އަދި އެއީ ސައްޙަ އިއުތިރާފެއް ކަމަށް ކަނޑައަޅައި، ޝަރީއަތުން ވަނީ އަވަސްނިޔާގެ އަޑުއެހުން ކުރިއަށް ގެންގޮސްފައެވެ. އަވަސްނިޔާގެ އަޑުއެހުމުގައިވެސް އޭނާ ވަނީ އިއުތިރާފު ދަމަހައްޓާފައެވެ.
އޭނާގެ އިއުތިރާފާއެކު ކުށް ސާބިތުވާކަމަށް ކަނޑައަޅާފައިވާއިރު، ދައުލަތުން ވަނީ އޭނާގެ މައްޗަށް ކަނޑައެޅޭނެ އަދަބަކީ އުމުރަށް ޖަލަށް ލުމާއެކު، އެއްލައްކަ ރުފިޔާއިން ޖޫރިމަނާކުރުންކަން ފާހަގަކޮށްފައެވެ. އަދި ޔޫނުސް ރަޝާދު ވަނީ ވީހާވެސް ލުއި އަދަބެއް ދިނުމަށް އެދިފައެވެ.
ކްރިމިނަލް ކޯޓުގައި މި މައްސަލަ ބެއްލެވި ގާޒީ އާދަމް މުޙައްމަދު ވަނީ ޔޫނުސް ރަޝާދު އުމުރަށް ޖަލަށް ލުމާއެކު، އެއްލައްކަ ރުފިޔާއިން ޖޫރިމަނާ ކުރުމަށް ޙުކުމް ކުރައްވާފައެވެ. އަދި އެ ފައިސާ 1 މާރޗުން ފެށިގެން 12 މަސް ދުވަހުގެ ތެރޭގައި މީރާއަށް ދެއްކުމަށްވެސް ޙުކުމުގައި އަންގަވާފައިވެއެވެ.
