ހުރިހާ ޚަރަދެއް ދޭގޮތަށް, 3 އަހަރު ދުވަހުގެ ތެރޭގައި ސަރުކާރުގެ ހުރިހާ ސްކޫލްތަކަށް ބޭނުންވާޕްރިންސިޕަލުން ތަމްރީނު ކުރުމަށްޓަކައި ކުރިއަށްގެންދާ "ޕްރިންސިޕަލުން ތަމްރީނު ކުރުމުގެ ސްކޮލަރޝިޕް ޕްރޮގްރާމް" އިފްތިތާހުކޮށްފިއެވެ.

މި ސްކޮލަރޝިޕް ޕްރޮގްރާމް އިފްތިތާހުކޮށްދެއްވީ އެކަމަށް ޚާއްސަކޮށް އިސްކަންދަރު ސްކޫލުގައި ބޭއްވި ރަސްމިއްޔާތެއްގައި ރައީސުލްޖުމްހުރިއްޔާގެ ނައިބު ފައިސަލް ނަސީމެވެ. މި ސްކޮލަރޝިޕް ސްކީމުގެ ދަށުން 20 ޕްރިންސިޕަލުންނަށް މިވަނީ ސްކޮލަރޝިޕަށް ހޮވުނު ކަމުގެ ލިޔުން ހަވާލުކޮށްފައެވެ. އެ ބޭފުޅުން ކިޔެވުން ފެއްޓެވުމަށްޓަކައި މި ހިނގާ މާރޗު މަހުގައި މެލޭޝިއާއަށް ދަތުރުކުރައްވާނެއެވެ.

އެ ބޭފުޅުން މެލޭޝިއާގެ ޔުނިވަރސިޓީ އޮފް މަލާޔާއިން މާސްޓަރސް އޮފް އެޑިޔުކޭޝަނަލް މެނޭޖްމަންޓް ކޯސް ފުރިހަމަކުރުމަށްފަހު، 2023 ވަނަ އަހަރުގެ އެޕްރީލް މަހު, ޕްރިންސިޕަލުންގެ ގޮތުގައި ރާއްޖޭގެސްކޫލުތަކުގައި މަސައްކަތްކުރައްވަން ފައްޓަވާނެއެވެ. ދިވެހިރާއްޖޭގެ ސްކޫލްތަކަށް ރަނގަޅު ފެންވަރުގެ ޕްރިންސިޕަލުން ހޯދުމުގެ މަސައްކަތް އެކިފަހަރުއެކިގޮތަށް ކުރެވުނު ނަމަވެސް, ދެމެހެއްޓެނިވި ގޮތެއްގައި އަދި ރޭވުންތެރި ގޮތެއްގައި ދިވެހި ޕްރިންސިޕަލުން ތަމްރީނުކުރުމުގެ ޕްރޮގްރާމެއް ފަހުގެ ތާރީޚެއްގައި ހިންގިފައެއްނުވެއެވެ.

ސަރުކާރުން ހިންގާ 216 ސްކޫލު ރާއްޖޭގެ އެކިކަންކޮޅުގައި ހުރިއިރު އެއްވެސް ދުވަސްވަރެއްގައި ހުރިހާ ސްކޫލެއްގައި ތަމްރީނުވެފައިވާ ޕްރިންސިޕަލުން ހަމަވެފައެއްނުވެއެވެ. މިވަގުތުވެސް ރާއްޖޭގައި ދާއިމީ ޕްރިންސިޕަލެއް ނެތް 53 ސްކޫލް ހުރި އިރު، ދާއިރާގައި މަސައްކަތް ކުރައްވާ ދާއިމީ ޕްރިންސިޕަލުންގެ ތެރެއިންވެސް ތަމްރީނު ލިބިވަޑައިގެން ތިއްބެވީ 75 ބޭފުޅުންނެވެ. 3 އަހަރު ދުވަހުގެ މުއްދަތަކަށް ބަހާލައިގެން ކުރިއަށް ގެންދިއުމަށް ހަމަޖެހިފައިވާ މި ޕްރޮގްރާމްނިމޭއިރު ސަރުކާރުން ހިންގާ ހުރިހާ ސްކޫލަކަށް ތަމްރީނު ލިބިފައިވާ ދިވެހި ޕްރިންސިޕަލުން ހަމަވާނެއެވެ.