ކުޅުދުއްފުށި ސިޓީ ކައުންސިލުން ނައިޓް މާކެޓެއް ބާއްވަނީ

ކުޅުދުއްފުށީ ސިޓީ ކައުންސިލުން ނައިޓް މާކެޓެއް ބާއްވަން ނިންމާ ބައިވެރިވުމުގެ ފުރުޞަތު ހުޅުވާލައިފިއެވެ.

ކުޅުދުއްފުށީ ސިޓީ ކައުންސިލުން މައުލޫމާތުދިން ގޮތުގައި މި ނައިޓް މާކެޓް ބޭއްވުމަށް ހަމަޖެހިފައިވަނީ މިމަހުގެ 17 އިން 19 އަށެވެ. އަދި ބައިވެރިވާން ބޭނުންވާ ފަރާތްތަކުން ނައިޓް މާކެޓް ގައި ބައިވެރިވުމަށް އެދޭ ފޯމް ފުރިހަމަކުރުމަށްފަހު މިމަހުގެ 8 ވަނަ ދުވަހުގެ 12:00 ގެ ކުރުން ކައުންސިލް އިދާރާއަށް ހުށަހަޅަން ޖެހެއެވެ. އަދި ފޯމާއެކު ގޮޅިއަށް ފައިސާ ދައްކަން ޖެހޭނެކަމަށް ކައުންސިލުން މައުލޫމާތު ދެއްވައެވެ.

މިމާކެޓްގައި ބައިވެރިވާ ފަރާތްތަކަށް 2 ސައިޒެއްގެ ގޮޅި ވިއްކުމަށް ކައުންސިލުންވަނީ ނިންމާފައެވެ. އެގޮތުން 10 ފޫޓް 8 ފޫޓުގެ ގޮޅި ވިއްކުމަށް ހަމަޖެހިފައިވަނީ 200 ރުފިޔާއަށެވެ. މިސައިޒުގެ ގޮޅިތައް ހާއްޞަ ކޮށްފައިވަނީ ގޭގައި އުފައްދާ ކާބޯ ތަކެއްޗާއި، ރާއްޖޭގައި ހައްދާ މޭވާ ތަރުކާރީފަދަ ތަކެތި ވިއްކާ ފަރާތްތަކަށެވެ.

މީގެއިތުރުން 10 ފޫޓް 16 ފޫޓްގެގޮޅިއެއް ވިއްކުމަށް ހަމަޖެހިފައިވަނީ 400 ރުފިޔާއަށެވެ. މިގޮޅިތައް ހާއްޞަކޮށްފައިވަނީ އިންޕޯޓް މުދާ ވިއްކާ ފަރާތްތަކަށާއި ކާބޯތަކެތީގެ ހިދުމަތްދޭ ފަރާތްތަކަށެވެ.

ސިޓީ ކައުންސިލްގެ ޑެޕިއުޓީ މޭޔަރ އަލީ އަހުމަދު ވިދާޅުވީ މިމާރކެޓްގައި ކުޅުދުއްފުށީގެ އިތުރުން ރާއްޖޭގެ ކޮންމެ ހިސާބެއްގެ މީހަކަށްވެސް ބައިވެރިވުމުގެ ފުރުޞަތު އޮންނާނެކަމަށެވެ.

ކައުންސިލުން ނައިޓް މާކެޓް ބާއްވަން ނިންމާފައިވަނީ ކުޅުދުއްފުށީ ވެލިގަނޑު ސަރަހައްދުގައެވެ.