ޖައިލަމްގެ މަރުގެ މައްސަލައިގެ ޙުކުމް 10 މާރޗުގައި
2 މާރިޗު 2022 | ބުދަ 08:55ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީއު
ޖައިލަމްގެ މަރުގެ މައްސަލައިގައި ކްރިމިނަލް ކޯޓުގައި ދައުވާ އުފުލާފައިވަނީ 4 މީހެއްގެ މައްޗަށް
ހ. ހަންޑްރެޑް ފްލާވަރސް, ޖައިލަމް އަހުމަދު ޝާކިރުގެ މަރުގެ މައްސަލައިގެ ހުކުމްކުރުން މާރޗް މަހުގެ 10 ވަނަ ދުވަހަށް ތާވަލުކޮށްފިއެވެ.
މި މައްސަލައިގައި ބުދަ ދުވަހު ކްރިމިނަލް ކޯޓުގައި ކުރިއަށް ދިޔަ އަޑުއެހުމަކީ ޖައިލަމްގެ މަރުގެ މައްސަލަ ދިރާސާ ކުރައްވަމުން ގެންދެވިއިރު ގާޒީއަށް ފާހަގަކުރެއްވުނު ކަންކަމާއި ގުޅިގެން އިތުރަށް ސާފުކުރައްވަން ބޭނުންވެވަޑައިގެންނެވި ބައެއް ކަންކަން ސާފު ކުރެއްވުމަށް ބޭއްވެވި އަޑުއެހުމެކެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އިސްމާއިލް ޝަފީއުއެވެ.
ގާޒީ ވިދާޅުވީ، ދައުވާ ލިބޭ 3 ފަރާތެއް ހައްޔަރުކުރިއިރު ނުވަތަ ސުވާލު ކުރެވުނުއިރު ޤާނޫނީ އިންޒާރު ދިންކަން އެނގޭނެ ލިޔުމެއް ނެތް ކަމަށެވެ. ނަމަވެސް ދައުވާ ލިބޭ މުޙައްމަދު ހުމައިދު އާއި ގުޅިގެން އެފަދަ ލިޔުމެއް ހުށައެޅިފައިވާކަން ގާޒީ ފާހަގަކުރެއްވިއެވެ.
އެކަމަށް ޖަވާބު ދެއްވަމުން ދައުލަތުގެ ވަކީލާ ވިދާޅުވީ، އަލީ އިރުފާނާއި ނަސީބު ސައީދު އަދި އިސްމާއިލް އަނީޤުއަށް ޤާނޫނީ އިންޒާރު ދިން ލިޔެކިޔުންތައް ދައުލަތަށް ލިބިފައިވާ ކަމަށެވެ. އެ ލިޔެކިޔުންތަކުގެ ފޯލިއޯ ނަންބަރުތައް ދައުލަތުން ވަނީ އަޑުއެހުމުގައި ކިޔާދެއްވާފައެވެ. އަދި ކޯޓަށް އެ ލިޔެކިޔުންތައް ލިބިފައިނުވާނަމަ، ހިއްސާ ކުރައްވާނެކަން ވަނީ ފާހަގަކުރައްވާފައެވެ.
ގާޒީ ވަނީ ވީހާވެސް އަވަހަށް އެ ލިޔެކިޔުންތައް ކޯޓަށް ހިއްސާ ކުރެއްވުމަށް ދަންނަވާފައެވެ.
ގާޒީ ވިދާޅުވީ، ދެން މި މައްސަލައިގެ އޮންނާނީ ޙުކުމް ކުރެއްވުމަށް ބާއްވަވާ އަޑުއެހުން ކަމަށެވެ. އެގޮތުން 10 މާރޗު 2022 ވާ ބުރާސްފަތި ދުވަހުގެ 1400 ގައި މި މައްސަލައިގެ ޙުކުމް ކުރެއްވުމަށް ވަނީ ތާވަލު ކުރައްވާފައެވެ.
ޖައިލަމްގެ މަރުގެ މައްސަލައިގެ ޚުލާސާ ބަޔާން އިއްވާފައިވަނީ 2 ފެބްރުއަރީ 2022 ގައެވެ.
