ނެތިދިއުމުގެ ބިރު ހީވެފައިވާ ދިރޭތަކެތީގެ ވިޔަފާރިކުރުމުގެ ބިލާއި ގުޅޭގޮތުން މޯލްޑިވްސް ކަސްޓަމްސް ސަރވިސް އާއި، ދިވެހި ފުލުހުންގެ ޚިދުމަތުގެ ބޭފުޅުންނާއި ރައްޔިތުންގެ މަޖިލީހުގެ އެންވަޔަރމަންޓް އެންޑް ކްލައިމެޓް ޗޭންޖް ކޮމިޓީން ބައްދަލުކުރައްވައިފިއެވެ.

ނެތިދިއުމުގެ ބިރު ހީވެފައިވާ ދިރޭތަކެތީގެ ވިޔަފާރިކުރުމުގެ ބިލާއި ގުޅޭ ގޮތުން ބުދަ ދުވަހު ކޮމިޓީން ވަނީ ކަމާއި ގުޅުންހުރި ބައެއް އިދާރާތަކާއި މަޝްވަރާ ކުރައްވާފައެވެ. އެގޮތުން ބުދަ ދުވަހުގެ ކޮމިޓީ ބައްދަލުވުމުގައި މޯލްޑިވްސް ކަސްޓަމްސް ސަރވިސްއާއި، ދިވެހި ފުލުހުންގެ ޚިދުމަތުގެ އިތުރުން، އެ ތަކެތި އިމްޕޯޓް ކުރާ ބައެއް ފަރާތްތަކާވެސް ކޮމިޓީން ވަނީ ބައްދަލުކުރައްވާފައެވެ.

މި ބައްދަލުކުރެއްވުމުގައި ވާހަކަދައްކަވަމުން ކަސްޓަމްސްގެ ފަރާތުން ޑެޕިއުޓީ ޗީފް ސުޕްރިންޓެންޑެންޓް އަހުމަދު ސިމާހް ވިދާޅުވީ، މި ބިލުގެ ދަށުން ކަސްޓަމްސްއަށް ތަންފީޒީ ގޮތުން ބޮޑެތި ޒިންމާތަކެއް ޙަވާލުކޮށްފައިވާ ކަމަށެވެ. އެގޮތުން ބޯޑަރ ލެވެލްގައި ތަންފީޒު ކުރަންޖެހޭ ކަންކަމާއި، އެތަކެތި އެތެރެކުރުމަށްފަހު ގެންގުޅޭތޯ ބެލުމަށް ކުރަންޖެހޭ ކަންކަމަކީވެސް ކަސްޓަމްސްގެ މަސްއޫލިއްޔަތު ނުހަނު ބޮޑަށް ހިމެނޭ ކަންކަންކަމަށް އޭނާ ވިދާޅުވިއެވެ.

ސިމާހް ވިދާޅުވީ، ރާއްޖެއަށް އެތަކެތި ގެނައުމާއި އިމްޕޯޓު ކުރުމަކީ ތަފާތު ދެ ކަމެއް ކަމަށާއި، ބިލުންވެސް އެކަން މިހާރަށްވުރެ ސާފުވާން ޖެހޭ ކަމަށެވެ.

މި ބައްދަލުކުރެއްވުމުގައި ވާހަކަދައްކަވަމުން ދިވެހި ފުލުހުންގެ ޚިދުމަތުގެ ފަރާތުން ބައިވެރިވެވަޑައިގެންނެވި ޓެކްނިކަލް ޑިރެކްޓަރު ގާސިމް އަލީ ވިދާޅުވީ، މިއީ ރާއްޖޭގެ ކޮންމެ ހިސާބެއްގައިވެސް ހިނގާފާނެ ކަމެއް ކަމަށެވެ. ވީއިރު އެ ޙާލަތްތަކުގައި އެތަކެތި ތަންފީޒީ އިދާރާތަކުން ނެގުމާމެދު އަމަލުކުރާނެ ގޮތާއިމެދު އުސޫލުތަކެއް ހުންނަންޖެހޭކަމަށް އޭނާ ވިދާޅުވިއެވެ.

މީގެއިތުރުން، އެފަދަ ތަކެތި ނައްތާލުމުގައި ހިނގާ ޚަރަދަށް ޒިންމާވާނީ އެތަކެތި އެތެރެކުރާ ފަރާތުންކަމަށް ބިލުގައި ބަޔާން ކޮށްފައިވާއިރު، އެކަމާ ގުޅިގެންވެސް އޭނާ ވަނީ ވާހަކަދައްކަވާފައެވެ.

މި ބައްދަލުކުރެއްވުމުގައި ސުޕްރިންޓެންޑެންޓް އޮފް ޕޮލިސް، އަހުމަދު ވިދާޅުވީ، އަތޮޅުތެރޭގެ އެކި ހިސާބުތަކުގައި ޤަވާއިދާ ޚިލާފަށް ބައެއް ދޫނި ހިފައި ގެންގުޅޭތީ އެތަކެތި ފުލުހުންގެ ބެލުމުގެ ދަށަށް ގެނެވޭ ކަމަށެވެ. އަދި އެތަކެތި ބެލެހެއްޓުމުގައި ދިމާވާ ގޮންޖެހުންތައްވެސް ކޮމިޓީގައި ވަނީ ހިއްސާ ކުރައްވާފައެވެ.

އޭނާ ވިދާޅުވީ، އެކަމަށް ޚަރަދުތަކެއްވެސް ކުރަންޖެހޭއިރު، ސަރަޙައްދީ ގޮތުން އެފަދަ ފެސިލިޓީތަކެއް ހުރުމަކީ ބޭނުންތެރިކަމެއްކަމަށް ދެކިވަޑައިގަންނަވާ ކަމަށެވެ.

މި ބިލަކީ ކޮންވެންޝަން އޮން އިންޓަނޭޝަނަލް ޓްރޭޑް އިން އެންޑެންޖާޑް ސްޕީސިސް އޮފް ވައިލްޑް ފައުނާ އެންޑް ފްލޯރާ (ސައިޓީސް) ގެ ދަށުން ހެދުމަށް ލާޒިމުކުރާ ޤާނޫނަކާއި ގުޅޭ ބިލެކެވެ. ކޮމިޓީގެ މުޤައްރިރު ހޯރަފުށީ ދާއިރާގެ މެމްބަރު އަހުމަދު ސަލީމް ވިދާޅުވީ، ސައިޓީސްގެ ހުރިހާ މެމްބަރު ޤައުމުތަކުންވެސް މި ޤާނޫނު އެކުލަވާލާފައިވާ ކަމަށެވެ. ރާއްޖެއިން ޤާނޫނު އެކުލަވާލާފައި ނުވާތީ ރާއްޖެއާމެދު ފިޔަވަޅު އެޅުމަށްވެސް ސައިޓީސްއިސް ވިސްނަމުންދާ ކަމުގެ މައުލޫމާތު ލިބިވަޑައިގެންފައިވާކަމަށް ސަލީމް ވިދާޅުވިއެވެ.

"ދިވެހިރާއްޖެއަށް ދޫނި އެތެރެކުރުމާއި ބެހޭ ގަވާއިދު" އާއި ޚިލާފަށް ރާއްޖެއަށް އެތެރެކޮށްފައިވާ 5 ޝިޕްމަންޓެއްގައި ހިމެނޭ ދޫނިތަކެއް ނައްތާލި މައްސަލައެއް ދާދި ފަހުންވެސް ފެންމަތިވެފައިވެއެވެ.