ޕީޕީއެމަކީ ކުރެންދޫ ފަޅުކުރުމަށް މަސައްކަތްކުރާ ޕާޓީއެއް – ނަޝީދު
ޕީޕީއެމަކީ ކުރެންދޫ ފަޅުކުރުމަށް މަސައްކަތްކުރާ ޕާޓީއެއްކަން ކުރެންދޫ ރައްޔިތުންނަށް މާ ސާފުކޮށް އެނގޭނެ
ރައީސް ނަޝީދުއާއި ރައީސް ޔާމީން
އިދިކޮޅު މައި ޕާޓީ ޕީޕީއެމް އަކީ ޅ. ކުރެންދޫ ފަޅުކުރުމަށް މަސައްކަތްކުރާ ޕާޓީއެއް ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ލޯކަލް ކައުންސިލް އިންތިޚާބް ކުރެންދޫ ކައުންސިލްގެ ރައީސް ބައި-އިލެކްޝަންގައި ވާދަކުރައްވާ އެމްޑީޕީގެ ކެންޑިޑޭޓް އަލީ ނަސީމްގެ ކެމްޕެއިން ޖަލްސާގައި ވާހަކަފުޅު ދައްކަވަނުން ނަޝީދު ވިދާޅުވީ ޕީޕީއެމަކީ ލާމަރުކަޒީ ނިޒާމް ނައްތާލުމަށް މަސައްކަތް ކުރާ ޕާޓީއެއް ކަމާއި، ޕީޕީއެމަކީ ކުރެންދޫ ފަޅުކުރުމަށް މަސައްކަތް ކުރާ ޕާޓީއެއްކަން ކުރެންދޫ ރައްޔިތުންނަށް މާ ސާފުކޮށް އެނގިވަޑައިގަންނަވާނެ ކަމަށެވެ.
މީގެ އިތުރުން ޕީޕީއެމްގެ ސިޔާސަތަކީ މާލެ ސަރަހައްދަށް ރާއްޖޭގެ ހުރިހާ ރައްޔިތުން ޖަމާކުރުން ކަމަށާއި، ޕީޕިއެމްގެ ބޭނުމަކީ ރާއްޖެތެރެ އުވާލައި, ކުރެންދޫ އުވާލުން ކަމަސް ރައީސް ނަޝީދު ވިދާޅުވިއެވެ. ރައީސް ނަޝީދު ވިދާޅުވީ ކުރެންދޫ އުވާލުމަށް މަގުފަހިވާނެ ކެންޑިޑޭޓެއް ހޯދަން އުޅުމަކީ ހޭޖެހޭ އެއްވެސް މީހަކު ކުރާނެ ކަމެއް ނޫން ކަމަށެވެ.
ރައީސް ނަޝީދު ވިދާޅުވީ ނަސީމަކީ މެކޭނިކެއް ކަމަށާއި، ލާމަރުކަޒީ ގާނޫނު އުފައްދާފައިވަނީ ކައުންސިލެއްގައި މެކޭނިކެއް ހުންނަންޖެހޭ ގޮތަށް ކަމަށެވެ. އެތާގައި ލޯޔަރެއް އެކައުންޓެންޓެއް ހުންނަން ޖެހޭ ގޮތަށް ކަމަށެވެ. އަދި ކައުންސިލްތަކަކީ, އަދި އެތަނަށް އިންތިޚާބުކުރާ ބަޔަކީ ދެބައި ކުޅެން ޖެހޭ ބައެއްކަމަށެވެ. ގަވާއިދު ހެދުމާއި އުސޫލު ހެދުމާއި، މިބާވަތުގެ ސިޔާސީ މަސައްކަތްތަކުގެ އިތުރުން އިދާރީ އަދި އަމަލީ ހިންގުމުގެ އެތައް މަސައްކަތެއް ކުރަން ޖެހޭ ބައެއް ކަމަށެވެ.
ލާމަރުކަޒީ ނިޒާމް ރަނގަޅަށް ހިންގުމަށާއި ކައުންސިލް ރަނގަޅަށް ހިންގުމަށް އަދި ކުރެންދޫ ރަނގަޅަށް ހިންގުމަށް ކުރެންދޫ ކައުންސިލްގައި ވޯކްޝޮޕެއް ހުންނަންޖެހޭ ކަމަށް ރައީސް ނަޝީދު ވިދާޅުވިއެވެ.
