މަސްތުވާތަކެތީގެ ނެޓްވޯރކްތައް ފެއިލްކޮށްލުމަށް ދަނީ ހަފަރާތުން މަސައްކަތް ކުރަމުން: މިނިސްޓަރު އިމްރާން
28 ފެބުރުއަރީ 2022 | ހޯމަ 14:53އެންމެ ބޮޑު އިޖްތިމާއީ ބަލިމަޑުކަމުން އަރައިގަނެވޭނީ ވަށާޖެހޭ ނިޒާމެއްގެ ތެރެއިން މަސައްކަތްކޮށްގެން
ހޯމް މިނިސްޓަރު ޝެއިޚް އިމްރާން އަބްދުﷲ
މަސްތުވާތަކެތީގެ ވިޔަފާރިން ނަފާލިބި މުއްސަނދިވެ, ބާރުވެރިވެ, އަނެކުންގެ ހިތްތަކަށް ބިރުވެރިކަން ވައްދާފައިވާ ބޮޑެތި ނެޓްވޯރކްތައް ރާއްޖޭގައި އެބައޮތް ކަމަށާއި، އެ ނެޓްވޯރކްތަކުގެ މަސައްކަތްތައް ފެއިލް ކުރުމަށް ހަފަރާތުން މަސައްކަތްކުރާ ކަމަށް ހޯމް މިނިސްޓަރު ޝެއިޚް އިމްރާން އަބްދުﷲ ވިދާޅުވެއްޖެއެވެ.
މިނިސްޓަރު އިމްރާން މިހެން ވިދާޅުވީ އާދިއްތަ ދުވަހު ކ. މާފުށީގައި ކުރިއަށް ގެންދިޔަ ޑްރަގް ރިހެބިލިޓޭޝަން ޕްރޮގްރާމް އިފްތިތާހްކުރުމަށް ބޭއްވި ޖަލްސާގައި ވާހަކަދައްކަވަމުންނެވެ.
މިނިސްޓަރު ވިދާޅުވީ ވޭތުވެދިޔަ ބައި ގަރުނެއްހާ ދުވަހުގެ ތެރޭގައި މުޅި ރާއްޖެއަށް ކުރިމަތިވެފައިވާ އެންމެ ބޮޑު އިޖްތިމާއީ ބަލިމަޑުކަމުން އަރައިގަނެވޭނީ ސަރުކާރާއި ސަރުކާރުގެ މުއައްސަސާތަކާއި ޖަމްއިއްޔާ ޖަމާއަތްތަކާއި އަދި މިކަމުގައި ބައިވެރިވެ ޝާމިލުވާންޖެހޭ އާއިލާތަކާއި މިހުރިހާ ފަރާތްތައް ގުޅިގެން, ވަށާޖެހޭ ނިޒާމެއް ގާއިމުކޮށްގެން ކަމަށެވެ.
ޑްރަގް ރިހެބިލިޓޭޝަން ޕްރޮގްރާމަށް އިޝާރަތްކުރައްވައި މިނިސްޓަރު ވިދާޅުވީ, މިއީ ސީދާ, އަދި ނުސީދާ ގޮތެއްގައި ރާއްޖޭގެ ކޮންމެ އާއިލާއަކަށް އޭގެ ހެޔޮ އަސަރު ފޯރާނެ ޕްރޮގްރާމެއް ކަމަށާއި، މި ޕްރޮގްރާމްގެ ސަބަބުން މާޔޫސްވެފައިވާ އާއިލާތަކަށް އުފާވެރިކަން ލިބޭނެ ކަމަށެވެ. މި ޕްރޮގްރާމް ކުރިއަށް ގެންދިއުމުގައި ގިނަ އުދަނގޫ ގޮންޖެހުންތައް އެބަހުރިކަން ފާހަގަކުރައްވައި މިނިސްޓަރު ވިދާޅުވީ, މިނިސްޓްރީ އޮފް ހެލްތާއި، ކަރެކްޝަނަލް ސަރވިސްއާއި ސަލާމަތީ މުއައްސަސާތަކާއި މިޕްރޮގްރާމުގައި ބައިވެރިވާ ހުރިހާ ފަރާތްތަކުން ވަރަށް ވިސްނައި ސަމާލުކަން ދޭންޖެހޭ ކަމަށާއި، އުދަނގޫތައް ކުރިމަތިވާނެކަން ދެނެތިބެ މަސައްކަތްތައް ކުރިއަށް ގެންދަންޖެހޭ ކަމަށެވެ.
މިނިސްޓަރު ވިދާޅުވީ ޑްރަގް ރިހެބިލިޓޭޝަން ޕްރޮގްރާމުގެ ފޭސްތައް ނިމިގެންދާއިރު, މުޖުތަމައާ ގުޅި ރަނގަޅު ގޮތުގައި ވަޒީފާ އަދާކުރެވޭނެ މާހައުލެއް ގާއިމްކޮށްދިނުމަކީ އަމާޒު ކަމަށެވެ. އަދި މި މަސައްކަތް ކުރުމުގައި ޕްރޮގްރާމުގެ ބައިވެރިން ބެލެހެއްޓުމުގެ ކަންކަން ކޮށްދޭ މުއައްސަސާތަކުގެ ވަރަށް ބޮޑު ޒިންމާއެއް އޮންނާނެކަމަށް މިނިސްޓަރު ވިދާޅުވިއެވެ. މުޅި މައްސަލައިން އަރައިގަތުމަށް އިޖްތިމާއީ ބޮޑު ޒިންމާއެއް އޮތްކަން އެންމެން ގަބޫލުކުރަން ޖެހޭ ކަމަށާއި، ޑީލްކުރާ ފަރާތްތަކަށް ތަފާތުކުރުންތައް ގެންގުޅެންޖެހޭ ކަމަށް ވިދާޅުވިއެވެ. އަދި މަސްތުވާތަކެތިން ސަލާމަތްވުމަށް މަސައްކަތްކުރާ މީހުންނަށާއި، އެފަރާތްތަކުގެ އާއިލާއަށް އެކަމުގައި ދޭންޖެހޭ ފުރިހަމަ އެއްބާރުލުން ފޯރުކޮށްދިނުމަށް މިނިސްޓަރު އެދިވަޑައިގަތެވެ.
މަސްތުވާތަކެތި މައްސަލަތައް ހައްލު ކުރުމަށް މިސަރުކާރުން އޮތީ ވަރަށް ސާބިތުކަންމަތީގައި ކަމަށް މިނިސްޓަރު ވިދާޅުވިއެވެ.
