ޒިގްޒެގް އިންޓަރ އޮފީސް ފުޓްސަލް ޓޯނަމެންޓްގެ ޗެމްޕިއަންކަން އުރީދޫއިން ހޯދައިފިއެވެ.

ކުޅުދުއްފުށީ ސްޕޯޓްސް އެރީނާ ފުޓްސަލް ދަނޑުގައި އާދީއްދަ ދުވަހުގެ ރޭ ކުޅުނު ފައިނަލް މެޗު، އުރީދޫއިން ކާމިޔާބު ކޮށްފައި ވަނީ މުބާރާތުގެ އެންމެ ފަހު ޗެމްޕިއަން ޓީމް ދިރާގު 1 -5 ގެ ތަފާތު ބޮޑު ނަތީޖާއަކުން ބަލިކޮށްގެންނެވެ.

ފައިނަލް މެޗުގައި އުރީދޫ ޓީމުން ވަނީ މޮޅު ކުޅުމެއް ދައްކާފައެވެ. އެ ޓީމުން ފުރަތަމަ ހާފުގައި ދެ ލަނޑު ކާމިޔާބު ކުރިއިރު، ފުރަތަމަ ލަނޑު 13 ވަނަ މިނެޓުގައި ކާމިޔާބު ކޮށްދީފައި ވަނީ ހާފިޒް އަހްމަދެވެ. ދެވަނަ ލަނޑު 15 ވަނަ މިނެޓުގައި ކާމިޔާބު ކޮށްދީފައި ވަނީ މުހައްމަދު ރިފްޝާންއެވެ.

އުރީދޫއިން ދެވަނަ ހާފަށް ދެ ލަނޑުގެ ލީޑަކާއިއެކު ނުކުމެފައިވާއިރު، އެ ޓީމުން ވަނީ މެޗުގެ 26 ވަނަ މިނެޓުގައި އިތުރު ލަނޑެއް ޖަހައި ތިން ލަނޑުގެ ލީޑެއް ނަގާފައެވެ. މި ލަނޑު ކާމިޔާބު ކޮށްދީފައި ވަނީ ވެސް މުހައްމަދު ރިފްޝާންއެވެ.

މުބާރާތުގެ ފެއާރޕްލޭ ޓީމަކަށް ހޮވިފައި ވަނީ އެސްޓީއޯއެވެ. މުބާރާތުގައި 12 ލަނޑު ޖަހައިގެން އެންމެ ގިނަ ލަނޑު ޖެހި ކުޅުންތެރިޔާގެ މަޤާމަށް ހޮވިފައި ވަނީ ކަސްޓަމްސްގެ ޖާރޒީ ނަމްބަރު 5 ހަސަން ނޫރިޝްއެވެ.

މުބާރާތުގެ އެންމެ މޮޅު ފަސްކުޅުންތެރިންގެ ތެރޭގައި ހިމެނިފައި ވަނީ އުރީދޫ ޓީމްގެ ޖާރޒީ ނަމްބަރު 12 ޝަމްމޫން މުޙައްމަދު، ދިރާގު ޓީމްގެ ޖާރޒީ ނަމްބަރު 10 ޔާމީން މުޙައްމަދު، އުރީދޫ ޓީމްގެ ޖާރޒީ ނަމްބަރު 10 ޖުމައިލް ޖަމީލް، އުރީދޫ ޓީމްގެ ޖާރޒީ ނަމްބަރު 11 މުހައްމަދު ރިފްޝާންގެ އިތުރުން ދިރާގު ޓީމްގެ ޖާރޒީ ނަމްބަރު 11 ހަމްދޫން އަހްމަދެވެ. މުބާރާތުގެ އެންމެ މޮޅު ކުޅުންތެރިޔާއަށް ހޮވިފައިވަނީ އުރީދޫ ޓީމްގެ ޖާރޒީ ނަމްބަރު 10 ޖުމައިލް ޖަމީލެވެ.