ރާއްޖެއިން ބޭރަށް ތަމްރީނަށް ދިޔަ އަންހެން ސިފައިންގެ ފަރާތުން ބުރުގާ އާއި ބެހޭ އެއްވެސް ޝަކުވާއެއް މިހާތަނަށް ލިބިފައިނުވާ ކަމަށް އެމްއެންޑީއެފުން ބުނެފިއެވެ.
އެމްއެންޑީއެފުން މިހެން ބުނެފައިމިވަނީ އިންޑިއާގެ އަސްކަރީ ތަމްރީން ތަކަށްދާ ދިވެހި އަންހެން ސިފައިން ބުރުގާ ނެގުމަށް މަޖުބޫރު ކުރާ ކަމަށް ކުރީގެ ރައީސް އަބްދުﷲ ޔާމީން ތުހުމަތު ކުރެއްވުމާއި ގުޅިގެންނެވެ. ހުކުރު ދުވަހު ގއ. ވިލިނގިއްޔަށް ވަޑައިގެން ވާހަކަފުޅު ދައްކަވަމުން ރައީސް ޔާމީން ވިދާޅުވީ ރާއްޖެއާއި އިންޑިއާ އާ ދެމެދު އަސްކަރީ ގޮތުން ގުޅުންތައް ބަދަހި ކުރަމުންދާއިރު، މިހާރު ރާއްޖެއިން އިންޑިއާގެ އަސްކަރީ ތަމްރީންތަކަށްދާ ދިވެހި އަންހެން ސިފައިންނަށް ބުރުގާ އަޅައިގެން ތަމްރީންތައް ފުރިހަމަ ނުކުރެވޭ ކަމަށާއި، ބުރުގާ އަޅައިގެން ތަމްރީން ފުރިހަމަ ކުރުމަށް ހުއްދަ ނުދޭ ކަމަށެވެ. އަދި އެކަމާއި ގުޅިގެން ދިވެހި ސަރުކާރުން އޮތީ ހިމޭނުން ކަމަށް އެމަނިކުފާނު ވިދާޅުވިއެވެ.
މި ތުހުމަތުތަކަށް ރައްދެއްގެ ގޮތުގައި އެމްއެންޑީއެފުން ބުނީ ދިވެހި ގައުމީ ދިފާއީ ބާރުގެ ސިފައިން ދަނީ ރާއްޖެ އާއި ރާއްޖެއިން ބޭރުގެ އެކި ގައުމުތަކުގައި ތަފާތު އަސްކަރީ ތަމްރީނުތައް ފުރިހަމަ ކުރަމުންދާ ކަމަށެވެ.
އެމްއެންޑީއެފުން ބުނީ ރާއްޖެއިން ބޭރަށް އަސްކަރީ ތަމްރީނު ފުރިހަމަކުރަންދާ ދިވެހި ސިފައިން އެތަންތަނަށްދަނީ، އެތަންތަނުގައި އަސްކަރީ ތަމްރީނު ފުރިހަމަކުރާ ސިފައިން ތަބާވާންޖެހޭ ގަވާއިދުތަކާއި އުސޫލުތަކާއި ޔުނިފޯމް ކޯޑާއި މިނޫންވެސް ތަމްރީނާ ބެހޭ ކަންކަމުގެ ފުރިހަމަ މައުލޫމާތާއި ތަފްސީލު ފޯރުކޮށްދީ، އެކަމަށް ރުހިގެން ކަމަށެވެ. މިއަދާ ހަމަޔަށް އަންހެން ސިފައިން ހިމެނޭ ގޮތަށް، ވަރަށް ގިނަ އަދަދެއްގެ ސިފައިން ރާއްޖެއިން ބޭރުގެ އެކި ގައުމުތަކުގައި އަސްކަރީ ތަމްރީނު ފުރިހަމަކުރުމަށްފަހު އެނބުރި ރާއްޖެ އައިސްފައިވާކަން އެމްއެންޑީއެފުން ފާހަގަކުރެއެވެ. އަދި ރާއްޖެއިން ބޭރުން ތަމްރީނުވެގެން އެނބުރި އައި ސިފައިންގެ އެއްވެސް މީހެއްގެ ފަރާތުން ބުރުގާޔާ ގުޅުންހުރި ޝަކުވާއެއް ލިބިފައިނުވާ ކަމަށް އެމްއެންޑީއެފުން ބުނެއެވެ.
