މާލެއަށް ބޮޑު ވެލައެއް އަރައިފި
27 ފެބުރުއަރީ 2022 | އާދީއްތަ 06:03މާލެއަށް އަރާފައިވާ ވެލައަކީ ގްރީން ޓާޓަލް (ވެލާ) ނުވަތަ ލޮޖާހެޑް ޓާޓަލް (ބޯބޮޑު ވެލާ) އެއް
ރޭ މާލެއަށް އެރި ވެލާ
މާލެ އިރު ދެކުނު ފަރާތަށް ބޮޑު ވެލައެއް އަރައިފި އެވެ.
މާލެއަށް އެންމެ ފަހުން ވެލައެއް އެރި ތާރީހެއް އެނގެން ނެތް އިރު، މިއީ ފަހުގެ ތާރީހެއްގައި މާލެއަށް އެރި ފުރަތަމަ ވެލަ އެވެ.
މާލެއަށް އެރި ވެލާގެ ވީޑިއޯއެއް، ރައްޔިތުންގެ މަޖިލީހުގެ ވެލިދޫ ދާއިރާގެ މެމްބަރު އަދި ކުރީގެ ނޫސްވެރިޔާ މުހައްމަދު އަބްދުﷲ ޝަފީގު ޓުވިޓާގައި ހިއްސާ ކޮށްފައިވާ އިރު، އެ ވީޑިއޯގައި ފެންނަނީ ސިނަމާލެ ބުރިޖު ފެށޭ ހިސާބު ބީޗު ކައިރީގައި ބޮޑު ވެލައެއް އޮތް ތަނެވެ.
ވީޑިއޯ އިން ފެންނަ ގޮތުގައި، އެ ވެލައަކީ ގްރީން ޓާޓަލް (ވެލާ) ނުވަތަ ލޮޖާހެޑް ޓާޓަލް (ބޯބޮޑު ވެލާ) އެކެވެ.
އެ ވެލާ އޮތް ސަރަހައްދު ވަރަށް ބޮޑަށް ކޮނެފައި އޮތް އިރު، ބެލެވޭ ގޮތުގައި އެ ސޮރު އަރާ އޮތީ ބިސް އަޅާށެވެ. ބިސް އެޅި ކަމެއް ޔަގީނެއް ނުކުރެވެ އެވެ. ނަމަވެސް އެކަން އީޕީއޭ އިން ބަލަމުންދާކަން އެނގިފައިވެ އެވެ.
ވެލާގެ އަންހެން ވައްތަރަކީ، އެސޮރުމެން ކުޑައިރު ވަޅުން ނުކުންނަ ތަނަކަށް ބޮޑުވެގެން ބިސް އަޅަން އަރާ އެއްޗެކެވެ. ވެލައެއް ބޮޑުވުމަށް 20 ނުވަތަ 30 އަހަރު ނަގާއިރު، 2019 ވަނަ އަހަރުގެ ތެރޭގައި ބިސް އަޅަން މާފަރު ރަންވޭއަށްވެސް ބޮޑު ވެލައެއް އެރި އެވެ. ނަމަވެސް އެ ވެލާ ފަހުން ވަނީ މަރުވެފަ އެވެ.
ވެލާ ކަހަނބު ހިފުމާއި އެތަކެތީގެ ބިސް ނެގުމަކީ ރާއްޖޭގެ ގާނޫނުތައް ބުނާ ގޮތުން ކުށެކެވެ.
