ޒިގްޒެގް އިންޓަރ އޮފީސް ފުޓްސަލް ޓޯނަމެންޓުގެ ފައިނަލަށް ދިރާގާއި އުރީދޫ

ކުޅުދުއްފުށީ ސިޓީ ޒިގްޒެގް ފޯރ ޔޫތު ލިންކޭޖުން އިންތިޒާމް ކޮށްގެން އެ ރަށުގައި ހުރި ސަރުކާރު މުއައްސަސާތަކާއި ކުންފުނިތަކަށް އަމާޒުކޮށްގެން ކުރިއަށް ގެންދާ "ޒިގްޒެގް އިންޓަރ އޮފީސް ފުޓްސަލް ޓޯނަމަންޓް"ގެ 8 ވަނަ މުބާރާތުގެ ފައިނަލަށް ދިރާގާއި އުރީދޫ ހިގައްޖެއެވެ.

މި މުބާރާތް އެންމެ ފަހުން 2019 ވަނަ އަހަރު ބާއްވާފައިވާއިރު އެ މުބާރާތުގެ ޗެމްޕިއަންކަން ހޯދާފައި ވަނީ ދިރާގުންނެވެ. ވުމާއިއެކު މި މުބާރާތުގެ ފައިނަލަށް އުރީދޫއާ ދެކޮޅަށް ދިރާގު ނުކުންނާނީ ތަށި ދިފާއު ކުރުމަށެވެ.

މި މުބާރާތުގެ ސެމީ ފައިނަލުގެ ދެ މެޗު ހުކުރު ދުވަހުގެ ރޭ ކުޅެފައިވާއިރު، މި ދެމެޗުގެ ޝަރަފްވެރި މެހެމާނެއްގެ ގޮތުގައި ބައިވެރިވެފައި ވަނީ ރާއްޖޭގައި މަޝްހޫރު ފުޓްބޯޅަ ކުޅުންތެރިޔާ އަލީ އަޝްފާގް(ދަގަނޑޭ)އެވެ.

ސެމީ ފައިނަލުގެ ފުރަތަމަ މެޗުގައި ބައްދަލު ކޮށްފައި ވަނީ ކުޅުދުއްފުށީ ރީޖަނަލް ހޮސްޕިޓަލް (ކޭއާރުއެޗް) ޓީމާއި އުރީދޫއެވެ. މި މެޗު 6-2ގެ ނަތީޖާއިން ކާމިޔާބު ކޮށްފައި ވަނީ އުރީދޫންނެވެ. މި މެޗުގައި އުރީދޫ ޓީމްގެ ޖުމައިލް ޖަމީލް، މުހައްމަދު ރިފްޝާން އަދި ހުސެއިން ޝަރީފް، މި ތިން ކުޅުންތެރިންގެ ތެރެއިން ކޮންމެ ކުޅުންތެރިއަކު ވަނީ ދެ ލަނޑު ކާމިޔާބު ކޮށްފައެވެ. މެޗުގައި ކޭއާރުއެޗުން ކާމިޔާބުކުރި ދެ ލަނޑު ވެސް ކާމިޔާބު ކޮށްދީފައި ވަނީ އަހުމަދު ދާއޫދެވެ. މި މެޗުގެ މޮޅު ކުޅުންތެރިއަކަށް ހޮވިފައި ވަނީ އުރީދޫ ޓީމްގެ ޖަރޒީ ނަމްބަރު 10 ޖުމައިލް ޖަމީލެވެ.

ސެމީ ފައިނަލުގެ ދެވަނަ މެޗުގައި ބައްދަލު ކޮށްފައި ވަނީ ކުޅުދުއްފުށީ ޕޯޓް ލިމިޓެޑް (ކޭޕީއެލް)އާއި ދިވެހި ރާއްޖޭގެ ގުޅުން (ދިރާގް)އެވެ. މި މެޗު ފުރިހަމަ ވަގުތު ހަމަވިއިރު ދެ ޓީމް އޮތީ 2-2ގެ ނަތީޖާއިން އެއްވަރު ވެފައެވެ.

މި މެޗުގައި ފުރަތަމަ ލަނޑު ޖަހާފައި ވަނީ ކޭޕީއެލުންނެވެ. މި ލަނޑު ކާމިޔާބު ކޮށްދީފައި ވަނީ އެ ޓީމްގެ ނާއިހް މުފީދެވެ. ދިރާގުގެ ފުރަތަމަ ލަނޑު ކާމިޔާބު ކޮށްދީފައި ވަނީ އެ ޓީމްގެ ހާމިދު ރަޝީދެވެ. ދިރާގުގެ ދެވަނަ ލަނޑު އަސްވަދު ރަޝީދު ކާމިޔާބު ކޮށްދިންއިރު، މެޗުގެ ފަހުވަގުތުކޮޅުގެ ތެރޭގައި ކޭޕީއެލްއަށް ނަތީޖާ އެއްވަރު ކޮށްދިން ލަނޑު ކާމިޔާބު ކޮށްދީފައި ވަނީ ވެސް ނާއިހް މުފީދެވެ.

މެޗުގެ ފުރިހަމަ ވަގުތު ހަމަވިއިރު ދެ ޓީމް އެއްވަރު ވެފައި އޮތުމުން ނަތީޖާ ނެރުމަށް ޖެހި ޕެނަލްޓީގައި ކޮންމެ ޓީމަކުން ވެސް ވަނީ 6 ޕެނަލްޓީ ޖަހާފައެވެ. ކޭޕީއެލްއިން ފޮނުވާލި 6 ޕެނަލްޓީގެ ތެރެއިން ކާމިޔާބު ވެފައި ވަނީ 3 ޕެނަލްޓީއެވެ. ނަމަވެސް ދިރާގުން ވަނީ 6 ޕެނަލްޓީގެ ތެރެއިން 4 ޕެނަލްޓީ ކާމިޔާބުކޮށް 6-5ގެ ނަތީޖާއިން މޮޅުވެ މުބާރާތުގެ ފައިނަލުން ޖާގަ ހޯދާފައެވެ. މި މެޗުގެ މޮޅު ކުޅުންތެރިއަކަށް ހޮވިފައި ވަނީ ދިރާގު ޓީމްގެ ޖަރޒީ ނަމްބަރު 11 ހަމްދޫން އަހްމަދެވެ.

މި މުބާރާތުގެ ފައިނަލް މެޗު ކުޅުމަށް ހަމަޖެހިފައި ވަނީ 27 މާޗް 2022ވާ އާދީއްތަ ދުވަހުގެ ރޭ 20:30ގައި ކުޅުދުއްފުށީ ސްޕޯޓްސް އެރީނާ ފުޓްސަލް ދަނޑުގައެވެ.