މިއަހަރުތެރޭ 25 ހޮސްޕިޓަލެއް އެޅުމުގެ މަސައްކަތް ފަށަނީ
މިއަހަރު ޓެންޑަރ ކުރުމަށް ހަމަޖެހިފައިވަނީ 30 އެނދުގެ ހޮސްޕިޓަލްތަކާއި 50 އެނދުގެ ހޮސްޕިޓަލްތަކުގެ އިތުރުން، 100 އެނދުގެ ޓާޝަރީ ހޮސްޕިޓަލްތައް
ކުޅުދުއްފުށީ ހޮސްޕިޓަލް
ރާއްޖޭގެ އެކި ހިސާބުތަކުގައި މިއަހަރުތެރޭގައި 25 ހޮސްޕިޓަލެއް އެޅުމަށް ޓެންޑަރ ކުރެވި މަސައްކަތްކުރުމަށް ހަވާލުކުރެވޭނެކަމަށް ހެލްތު މިނިސްޓަރ އަހުމަދު ނަސީމް ވިދާޅުވެއްޖެއެވެ.
ބުދަ ދުވަހު ކުރިޔަށްދިޔަ ރައްޔިތުންގެ މަޖިލީހުގެ ޖަލްސާގައި މިނިސްޓަރ ވަނީ މިއަހަރު ޓެންޑަރ ކުރުމަށް ހަމަޖެހިފައިވާ 30 އެނދުގެ ހޮސްޕިޓަލްތަކާއި 50 އެނދުގެ ހޮސްޕިޓަލްތަކުގެ އިތުރުން 100 އެނދުގެ ޓާޝަރީ ހޮސްޕިޓަލްތަކުގެ ތަފްސީލު ހިއްސާކުރައްވާފައެވެ. ޓާޝަރީ ހޮސްޕިޓަލްތަކަކީ ލ. ގަމުގައި އަޅާ 100 އެނދުގެ ޓަރޝަރީ ހޮސްޕިޓަލާއި ހދ. ކުޅުދުއްފުށީގައި އަޅާ ޓާޝަރީ ހޮސްޕިޓަލްގެ އިތުރުން ގދ. ތިނަދޫ ގައި އަޅާ 100 އެނދުގެ ޓާޝަރީ ހޮސްޕިޓަލެވެ.
މީގެތެރޭގައި ހިމެނެނީ ލޯނު އެހީގެ ދަށުން އަޅާ ހޮސްޕިޓަލްތަކާއި, ކޮންޓްރެކްޓް ފައިނޭންސްގެ ގޮތުގައި ކުރިޔަށްގެންދާ ހޮސްޕިޓަލްތަކާއި, ވޯލްޑް ބޭންކުގެ އެހީގައި ކުރިޔަށްގެންދާ ހޮސްޕިޓަލްތަކާއި, ޑޯންޗަރ ބޭންކުގެ ލޯނުގެ އެހީގައި ކުރިޔަށްގެންދާ ހޮސްޕިޓަލްތަކާއި, އިންޑިއަން އެގްޒިމް ބޭންކުގެ ލޯނު އެހީގައި ކުރިޔަށްގެންދާ ހޮސްޕިޓަލްތަކާއި, ދިވެހި ސަރުކާރުގެ ބަޖެޓުން ޚަރަދުކޮށްގެން އިމާރާތްކުރާ ހޮސްޕިޓަލްތަކެވެ.
މީގެތެރެއިން 30 އެނދުގެ ހޮސްޕިޓަލްތައް ޓެންޑަރ ކުރެވޭނީ މިފެށޭ މާރޗް މަހުއެވެ. 50 އެނދުގެ ހޮސްޕިޓަލްތައް ދެވަނަ ކުއާޓަރގައި އަދި ޓާޝަރީ ހޮސްޕިޓަލްތައް ދެވަނަ ކުއާޓަރގެ ފަހުބައިގައި ޓެންޑަރކުރެވޭނެއެވެ.
މީގެތެރެއިން 30 އެނދުގެ ހޮސްޕިޓަލްތައް މިހާރު ޓެންޑަރކުރެވިފައިވާއިރު 50 އެނދުގެ ހޮސްޕިޓަލް ދެވަނަ ކުއާޓަރގައި ޓެންޑަރކުރާނެއެވެ.
މިހޮސްޕިޓަލްތައް ދެވަނަ ކުއާޓަރގައި ޓެންޑަރކުރުމަށް ވަނީ ހަމަޖެހިފައެވެ.
އިންޑިއަން އެގްޒިމް ބޭންކުގެ ލޯނު އެހީގެ ދަށުން ކުރިއަށް ގެންދިއުމަށް ހަމަޖެހިފައިވާ ޕްރޮޖެކްޓުގެ މަސައްކަތްކުރާނެ ކޮންޓްރެކްޓަރުން ވަނީ އައްޔަނުކޮށްފައެވެ. މިހާރު ކުރެވެމުންދަނީ އެންމެ ފަހުގެ ޑޮކިޔުމެންޓޭޝަން ފައިނަލް ކުރުމުގެ މަސައްކަތެވެ.
މާލޭ ސަރަހައްދުގައި ހުޅުމާލޭގައި ގާއިމުކުރުމަށް ހަމަޖެހިފައިވާ ވެކްސިން އަދި ސެންޓްރަލް ސްޓޯރޭޖް މަޝްރޫއު
ރާއްޖޭގެ އުތުރުގައި ށ. ކޮމަންޑޫގައި ގާއިމުކުރުމަށް ހަމަޖެހިފައިވާ ވެކްސިން އަދި ސެންޓްރަލް ސްޓޯރޭޖް މަޝްރޫއު
ރާއްޖޭގެ ދެކުނުގައި ގދ. ގައްދޫގައި ގާއިމުކުރުމަށް ހަމަޖެހިފައިވާ ވެކްސިން އަދި ސެންޓްރަލް ސްޓޯރޭޖް މަޝްރޫއު
ގަމު ހޮސްޕިޓަލް ތިންވަނަ ކުއާޓަރގައި އަދި ގައްދޫ ހޮސްޕިޓަލް ދެވަނަ ކުއާޓަރގައި އިއުލާންކުރާނެއެވެ.
މީގެއިތުރުން ކުރިއަށް އޮތް ދެ މަސްދުވަސް ތެރޭގައި ރާއްޖޭގެ ތިން ރަށެއްގައި ޑައިލިސިސް ހެދުމުގެ މަސައްކަތް ފަށާނެއެވެ. އޭގެތެރޭގައި ހިމެނެނީ ބ. އަތޮޅު ހޮސްޕިޓަލާއި ލ. އަތޮޅު ހޮސްޕިޓަލާއި ށ. އަތޮޅު ހޮސްޕިޓަލެވެ.
މީގެއިތުރުން ޑައިލިސިސް ނުފެށި ހުރި ހޮސްޕިޓަލްތަކުގައި މިއަހަރު ތެރޭގައި ޑައިލިސިސް ހެދުމުގެ ނިޒާމު ގާއިމުކުރުމުގެ މަސައްކަތް ފެށުމަށް ވަނީ ހަމަޖެހިފައެވެ.
