ޔޫކްރެއިން: ދިވެހި އެއް ދަރިވަރަކު މާލެއަށް އައިސްފައިވާއިރު، 25 ދަރިވަރުން މާލެއަށް އައުމަށް ފުރައިފި
23 ފެބުރުއަރީ 2022 | ބުދަ 14:42ޔޫކްރެއިންގައި ތިބި ދިވެހިންގެ ހާލަތު ޖަރުމަނުގައި ހުންނަ ރާއްޖޭގެ އެމްބަސީ މެދުވެރިކޮށް ވަރަށް ގާތުން ދަނީ ބަލަމުން
ޔޫކްރެއިން
މަސްރަހު ހޫނުވެ ހަނގުރާމައެއް ފެށިދާނެކަމުގެ ބިރު ހީވެފައިވާ ޔޫކްރެއިންގައި ކިޔަވަމުންދާ ދިވެހި ދަރިވަރުންގެ ތެރެއިން އެއް ދަރިވަރަކު މާލެއަށް އައިސްފައިވާ ކަމަށާއި، 25 ދަރިވަރުން މާލެއަށް އައުމަށް ފުރާފައިވާ ކަމަށް ފޮރިން މިނިސްޓްރީން ބުނެފިއެވެ.
ފޮރިން މިނިސްޓްރީން ބުނީ ޔޫކްރެއިންގައި 35 ދަރިވަރުން ކިޔަވަމުންދާ ކަމަށެވެ. އޭގެ އިތެއިން އެއް ދަރިވަރަކު ބުދަ ދުވަހު މާލެ އައިސްފައިވާ ކަމަށާއި، 25 ދަރިވަރުން މާލެއަށް އައުމަށް ފުރާފައިވާ ކަމަށެވެ. އަދި ހުކުރު ދުވަހު އިތުރު 4 ދަރިވަރުން މާލެއަށް އައުމަށް ފުރާނެ ކަމަށާއި، ޚާރްކީވްގައި ތިބި 5 ދަރިވަރުން ވެސް ރާއްޖެއަށް ގެނައުމުގެ މަސައްކަތް ކުރަމުންދާ ކަމަށް މިނިސްޓްރީން ބުނެއެވެ.
މީގެ އިތުރުން ޔޫކްރެއިންގައި ތިބި ދިވެހިންގެ ހާލަތު ޖަރުމަނުގައި ހުންނަ ރާއްޖޭގެ އެމްބަސީ މެދުވެރިކޮށް ވަރަށް ގާތުން ބަލަމުންދާ ކަމަށް މިނިސްޓްރީން ބުނެއެވެ.
ޔޫކްރެއިންގައި ތިބި ދަރިވަރުން ރާއްޖެ ގެނެއުމުގެ މަސައްކަތް ފަށާފައިވާއިރު، ބުދަ ދުވަހު ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަނީ ޔޫކްރެއިންގައި ތިބި ދިވެހި ދަރިވަރުން ރާއްޖެ ގެނައުމަށް ފޮރިން މިނިސްޓްރީއަށް އަންގަވާފައެވެ. އެއާއެކު ފޮރިން މިނިސްޓްރީން ބުނީ ޔޫކްރެއިންގައި ތިބި ހުރިހާ ދަރިވަރުން ރާއްޖެ ގެނައުމަށް ބޮޑު އޮޕަރޭޝަނެއް އަދި ނުހިންގާނެކަމަށެވެ. އަދި ރާއްޖެ އަންނަން ބޭނުންވާ ދަރިވަރުންނަށް ފައިސާގެ އެހީތެރިކަން ފޯރުކޮށްދޭނެކަމަށް ވަނީ ބުނެފައެވެ. ޔޫކްރެއިން އަށް މިހާރުވެސް ފްލައިޓްތައް ދަތުރުކުރާ ކަމަށާއި ބޯޑަރުތައް އަދިވެސް ހުރީ ހުޅުވާފައިކަމުން ކޮމާޝަލް ފްލައިޓްގައި ދަތުރުކުރެވޭނެ ކަމަށް ބުނެފައިވެއެވެ.
ޔޫކްރެއިންގެ އިރުމަތީ ދެ ސަރަހައްދެއް އެއީ ވަކި ދެ ދައުލަތެއްގެ ގޮތުގައި ކަނޑައެޅުމަށް ރަޝިޔާގެ ރައީސް ވްލަޑިމިއަރ ޕުޓިން ވަނީ ނިންމަވާފައެވެ. އެއާއެކު މަސްރަހު ކުރިޔަށްވުރެ ބޮޑަށް ހޫނުވެ ސުލްހައިގެ މަގު އޮތީ ވަރަށް ބޮޑަށް ބަންދުވާ ހިސާބުގައެވެ. ރަޝިޔާގެ ރައީސްގެ ނިންމެވުމާއެކު ޔޫކްރެއިންގެ މަސްރަހު ހޫނުވެފައިވާއިރު އެމެރިކާ އާއި ހުޅަނގުގެ ގައުމުތަކުން ވަނީ ރަޝިޔާ އާއި ދެކޮޅަށް ދަތިކުރުމުގެ ފިޔަވަޅު އަޅާނެކަމަށް ބުނެފައެވެ. އަދި ޕުޓިންގެ މިނިންވެމަކީ ސުލްހައިގެ މަގު ބަންދުކޮށްލުންކަމަށް ވަނީ ބުނެފައެވެ.
ޕުޓިން ވަނީ އިރުމަތީ ޔޫކްރެއިންގެ ދެ ސަރަަހައްދެއް ވަކި ދެ ދައުލަތެއްގެ ގޮތުގައި ބަލައިގަނެ އެސަރަހައްދުގައި ސުލްހަ ގާއިމުކުރުމަށް ކަމަށް ވިދާޅުވެ އަސްކަރީ ފައުޖުތައް އެސަރަހައްދަށް ދިޔުމަށް އަމުރުކުރައްވާފައެވެ.
