މެރިޖް ވިސާގައި ބިދޭސީން ރާއްޖެ އައިސް، އެކި ކަހަލަ ކުށްތަކަށް އަރައިގަންނަ މައްސަލަތައް ގިނަވަނީ
ފުލުހުންނާއި ގުޅިގެން މިހާރުވެސް މަސައްކަތްތަކެއް ކުރަމުންދޭ
ރަސްމީ ލިޔެކިޔުން ނެތް ބިދޭސީ މަސައްކަތްތެރިންގެ މައްސަލަ އާއި ގުޅޭގޮތުން، ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން ކަމާއި ގުޅުންހުރި އިދާރާތަކާއި ބައްދަލުކުރެއްވުން
މެރިޖް ވިސާގައި ބިދޭސީން ރާއްޖެ އައިސް، އެކި ކަހަލަ ކުށްތަކަށް އަރައިގަންނަ މައްސަލަތައް ގިނަވެފައިވާތީ ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީގައި ކަމާއި ގުޅުން ހުރި އިދާރާތަކުން ކަންބޮޑުވުން ފާޅުކޮށްފިއެވެ.
ރަސްމީ ލިޔެކިޔުން ނެތް ބިދޭސީ މަސައްކަތްތެރިންގެ މައްސަލަ އާއި ގުޅޭގޮތުން، ރައްޔިތުންގެ މަޖިލީހުގެ ޚާރިޖީ ގުޅުންތަކުގެ ކޮމިޓީން ބުދަ ދުވަހު ވަނީ މިނިސްޓްރީ އޮފް ފޮރިން އެފެއާޒް، މޯލްޑިވްސް އިމިގްރޭޝަން އަދި މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ބޭފުޅުންނާ ބައްދަލު ކުރައްވާފައެވެ.
އޭގެކުރިން މި ކޮމިޓީއަށް ފުލުހުން ލިއުމުން ހިއްސާކޮށްފައިވާ މައުލޫމާތުތަކުގެ ތެރޭގައި މެރިޖް ވިސާގައި ރާއްޖެ އައިސް، އެކި ކަހަލަ ކުށްތަކަށް އަރައިގަންނަ މައްސަލަތައް ފާހަގަވެފައިވާކަމަށް ބަޔާންކޮށްފައިވެއެވެ. އެކަމާއި ގުޅޭ ގޮތުން ކޮމިޓީން ސުވާލު ކުރުމުން އިމިގްރޭޝަން ކޮންޓްރޯލަރ މުޙައްމަދު އަހުމަދު (ހަނަފީ) ވިދާޅުވީ، އެއީ ގޮންޖެހުންތައްވެސް ބޮޑު މައްސަލައެއް ކަމަށެވެ. އެގޮތުން ފުލުހުންނާ ގުޅިގެން މިހާރުވެސް މަސައްކަތްތަކެއް ކުރަމުންދާއިރު، ދިވެއްސަކާ ކައިވެނިކޮށްގެން އުޅޭ މީހަކު ޑީޕޯޓު ކޮށްލާއިރު ދިމާވާ ޤާނޫނީ މައްސަލަތަލެއްވެސް ހުރިކަން ހަނަފީ ފާހަގަކުރެއްވިއެވެ.
ހަނަފީ ވިދާޅުވީ، މިހާރުވެސް ބައެއް ފަރާތްތަކަށް ފިޔަވަޅު އަޅާފައިވާނެ ކަމަށެވެ. މިކަހަލަ މައްސަލަތަކުގައި ވިސާ ކެންސަލް ކޮށްފައި ފޮނުވާލެވޭނެ އެކަށީގެންވާ ސަބަބުތަކެއް ޤާއިމުކުރަން ޖެހޭއިރު، ބައެއް ފަރާތްތަކުގެ މައްޗަށް ހަށިވިއްކުމާއި އެފަދަ ޖިނާއީ ކުށްތަކުގެ ތުހުމަތުވެސް ކުރެވޭކަމަށް ހަނަފީ ވިދާޅުވިއެވެ.
ހަނަފީ ވިދާޅުވި ގޮތުގައި ރާއްޖޭގައި އުޅެން ފަސޭހައަކަށް އުމުރުން ދުވަސްވީ މީހުންނާއި ކައިވެނިކޮށްގެން އެކި ކުށްތަކަށް އަރައިގަންނަމުންދާ ބިދޭސީންގެ މައްސަލަތައްވެސް ވަނީ ފާހަގަވެފައެވެ. އެގޮތުން ޖިނާއީ ކުށެއް ސާބިތުވާ މިންވަރަށް ފުލުހުންނަށް ހެކި ނުހޯދޭ ޙާލަތްތަކަށް ބަލާއިރުވެސް އިމިގްރޭޝަން ޤާނޫނުގެ ތެރެއިން އެކަންކަމަށް ފިޔަވަޅު އަޅަން ބަލާއިރު ޤާނޫނީ ގޮތުން ގޮންޖެހުންތައް ހުރިކަމަށް އޭނާ ވިދާޅުވިއެވެ.
ހަނަފީ ވިދާޅުވި ގޮތުގައި ޤަވާއިދާއި ޚިލާފުވާ މީހުންނަށްވެސް އިމިގްރޭޝަން ޤާނޫނުގެ ދަށުން ބަލަނީ މަދަނީ ކުށެއްގެ ގޮތުގައެވެ. ވުމާއެކު އިމިގްރޭޝަނަށް އެ ފަރާތްތަކާއި މެދުގައި އެޅެނީ އިދާރީ ފިޔަވަޅެއްކަމަށް ހަނަފީ ވިދާޅުވިއެވެ. އެގޮތުން އެމީހަކު ފުރުވާލެވެންދެން ކޮންޓްރޯލަރ ކަނޑައަޅުއްވާ ތަނެއްގައި ޑިޓެންޝަންގައި ބަހައްޓަންޖެހޭނެކަމަށް މިހާރު އިމިގްރޭޝަން ޤާނޫނުގައި އޮވެއެވެ. ނަމަވެސް އިމިގްރޭޝަންގެ އައު ޤާނޫނުގެ މަސައްކަތް އޭޖީ އޮފީހާއެކު ކުރެވެމުންދާއިރު، ޤަވާއިދާ ޚިލާފަށް ރާއްޖޭގައި އުޅުމަކީ މިހާރު އޮތް މިންވަރަށްވުރެ ބޮޑު ކުށަކަށް ހެދުމަށް މަސައްކަތް ކުރައްވަމުންދާކަންވެސް އޭނާ ފާހަގަކުރެއްވިއެވެ.
އޭގެ އިތުރުން، ޓުއަރިސްޓް ވިސާގައި އައިސް ރާއްޖޭގައި މަސައްކަތް ކުރާ މައްސަލައަށް އަލިއަޅުވާލައްވާ ހަނަފީ ވިދާޅުވީ، އެފަދަ މީހުން ހޯދައި ފުރުވާލުމަށް ގިނަ މަސައްކަތްތަކެއް ކުރެވިފައިވާ ކަމަށެވެ. އެގޮތުން ކުރެވިފައިވާ މަސައްކަތުގެ ނަތީޖާއެއްގެ ގޮތުން ޓުއަރިސްޓް ވިސާގައި އައިސް ރާއްޖޭގައި ޤަވާއިދާއި ޚިލާފަށް މަސައްކަތް ކުރާ މީހުންގެ ނިސްބަތްވެސް މަދު ކުރެވިފައިވާކަމަށް ހަނަފީ ވިދާޅުވިއެވެ.
ކޮމިޓީގައި ބައެއް މެމްބަރުން ވަނީ އެފަދަ މައްސަލަތައް ޙައްލު ކުރުމަށް ބައެއް ޤައުމުތަކުގައި ބިދޭސީންނާއި ކައިވެނި ކުރުން ވަކި މުއްދަތަކަށް މަނާކުރާ ކަމަށެވެ. އެކަހަލަ އެއްވެސް ވިސްނުމެއް ރާއްޖެއިން ގެންގުޅޭތޯ މެމްބަރުން ވަނީ ސުވާލު ކުރައްވާފައެވެ.
އެކަމާއި ގުޅޭގޮތުން ހަނަފީ ވިދާޅުވީ، މިހާރު އަމަލުކުރަމުންދާ ގޮތަށް ބަލާއިރު، ކޯޓުތަކުން ކައިވެނި ކުރުމުގެ ހުއްދަ ދޭނީވެސް އެމީހަކީ ޤާނޫނާއި ޤަވާއިދާ އެއްގޮތަށް އުޅޭ މީހެއްކަން ކަށަވަރު ކުރުމަށްފަހު ކަމަށެވެ. ނަމަވެސް އެކަމުގެ ނަހަމަ ބޭނުން ބައެއް ފަރާތްތަކުން ހިފަމުންދާކަމަށް އޭނާ ވިދާޅުވިއެވެ.
އެހެންނަމަވެސް، އިމިގްރޭޝަން އިން ބްލެކް ލިސްޓް ކޮށްފައިވާ ފަރާތްތަކާއި ރާއްޖެއިން ބޭރަށް ގޮސް ކައިވެނި ކުރާ މައްސަލަތައްވެސް ވަނީ ފެންމަތިވެފައެވެ. އެހިސާބުން ހިއުމަން ރައިޓްސް ކޮމިޝަނާއި އެކި އިދާރާތަކަށް ހުށައަޅައިގެން އެމީހެއް ގެނައުމުގެ މަސައްކަތް ކުރާކަން އިމިގްރޭޝަނުން ފާހަގަކުރެއެވެ. އޭގެ ތެރެއިންވެސް އެންމެ ބޮޑެތި ގޮންޖެހުންތައް ކުރިމަތިވަނީ އެފަދަ ކައިވެންޏަށް ދަރިން ލިބޭ ޙާލަތްތަކުގައިކަން އެ އިދާރާއިން ފާހަގަކުރެއެވެ.
އެހިސާބުން ނަގާ ފިޔަވަޅެއްގެ ސަބަބުން އާއިލާތައް ރޫޅާލުމަށްވެސް މަޖުބޫރުވާ ޙާލަތްތައް އަންނަކަން އިމިގްރޭޝަން ކޮންޓްރޯލަރ ފާހަގަކުރެއްވިއެވެ.
އިމިގްރޭޝަންގެ އައު ޤާނޫނުގެ މަސައްކަތް އޭޖީ އޮފީހާއެކު ކުރެވެމުންދާއިރު، ޤަވާއިދާ ޚިލާފަށް ރާއްޖޭގައި އުޅުމަކީ މިހާރު އޮތް މިންވަރަށްވުރެ ބޮޑު ކުށަކަށް ހެދުމުން މި ކަންކަމަށް އެކަށީގެންވާ ޙައްލެއް އަންނާނެކަމަށް އިމިގްރޭޝަނުންވެސް ލަފާކުރެއެވެ.
