ގިނަ ކައިވެނިތަކެއް، ބާރު ބޮޑުވުމާ ގުޅިގެން ޕާޓީތައް އެހެން ދުވަހަކަށް

ރީތި ތާރީޚުތަކުގައި ކައިވެނި ކުރުމަކީ ޓްރެންޑެކެވެ. ރާއްޖޭގައި އިތުރުން ދުނިޔޭގެ ކަންކޮޅުތަކުގައިވެސް, ކައިވެނި ކުރުމަށް ނިންމާ ދެމީހަކު އެންމެ ފުރަތަމަ ވެސް ބަލާނީ އެ އަހަރެއްގައި އަންނަ އެންމެ ރީތި ތާރީޚުތަކަކަށޭ ބުންޏަސް ދޮގަކަށް ނުވާނެއެވެ. އެގޮތުން މިއަދަކީ އެފަދަ ދުވަހެކެވެ. 2022 ވަނަ އަހަރުގެ 2 ވަނަ މަހުގެ 22 ވަނަ ދުވަހަކީ މިއަހަރުގެ ތެރޭގައި އަންނަ އެންމެ ރީތި އެއް ތާރީޚެވެ. އެހެންކަމުން މިއަދު ރާއްޖޭގައި ރިކޯޑު އަދަދަކަށް ކައިވެނި ކުރެއެވެ.

އަންގާރަ ދުވަހުގެ އިރުއެރުމާއެކު, މާލޭގެ އިރުމަތީ ފަރާތުގެ ބްރިޖާ ދިމާއާއި ލޮނުޒިޔާރަތް ޕާކު ކުރިމަތި އޮތީ ފުރިބާރުވެފައެވެ. އާއިލާތަކުން ތިބީ, ފެމިލީ ކޯޓުން ނުކުންނަ ދެމަފަރިންނަށް މަރުހަބާ ކިޔުމަށް ތައްޔާރުވެގެންނެވެ. މާފަތިތައް ހިފައިގެންނެވެ. ފެމިލީ ކޯޓު ކައިރީގައި ވެސް ދިގު ކިއު އޮތްއިރު، ކޯޓުން ބުނެފައިވަނީ މިއީ ބިޒީ ދުވަހެއް ކަމަށާއި، 85 ކައިވެންޏެއް ކޮށްދިނުމަށް ނިންމާފައިވާ ކަމަށެވެ. މިއީ ރިކޯޑު އަދަދެވެ. މީގެ ތެރެއިން ކޯޓު ރޫމްގައި 47 ކައިވެންޏެއް ކުރާނެ ކަމަށް ފެމިލީ ކޯޓުން ބުނެއެވެ.

ފެމިލީ ކޯޓުގައި ކޮންމެ 30 މިނެޓަކުން ކައިވެންޏެއް ކޮށްދެމުންދާއިރު, މިއަދާއި މިރޭ ގިނަ ޕާޓީތަކެއް, މާލެ ސިޓީގެ އިތުރުން އަތޮޅުތެރޭގައި އެބައޮތެވެ. އެހެންކަމުން ޑިޒައިނަރުންނާއި ފޮޓޯގްރާފަރުންގެ އިތުރުން, މޭކަޕް އާޓިސްޓުންނާއި ސެލޫންތަކާއި ރެސްޓޯރަންޓްތަކަށް ވަނީ ބާރުބޮޑުވެފައެވެ.

ރާއްޖެއެމްވީއަށް މައުލޫމާތު ދިން މަޝްހޫރު ފޮޓޯގްރާފަރަކު ބުނީ, ހަމައެކަނި އަންގާރަ ދުވަހަށް 5 ކައިވެންޏެއްގެ ފޮޓޯ ނެގުމަށް ލިބިފައިވާ ކަމަށެވެ. ނަމަވެސް ޝޫޓް ކުރުމަށް ދެވޭނީ އެންމެ ކައިވެންޏެއްގެ ކަމުން އެންމެ ފުރަތަމަ ބުކިން ހެދި ކައިވެންޏަށް ފުރުސަތު ދިނީކަމަށެވެ. މީގެ އިތުރުން އެ ޒުވާނާ ބުނީ, ޕާޓީތައް ބޭއްވުމަށް ތަނެއް ނުލިބުމާއި، މޭކަޕް އާރޓިސްޓުން ނުލިބުމާއި، ކޭޓަރިންގެ ޚިދުމަތް ނުލިބިގެން ބައެއް ކައިވެނިތަކުގެ ޕާޓީތައް އެހެން ދުވަހަކަށް ލަސްކޮށްފައިވާކަމަށެވެ.

ކައިވެނީގެ ހެދުންތައް ޑިޒައިންކޮށްދޭ މީހުން ބުނެފައިވަނީ, މީގެ 4 މަސް ކުރިން މިއަދަށް ޚާއްސަކޮށް ކައިވެނި ހެދުންތައް ފަހާފައިވާ ކަމަށެވެ. އަދި ގާތްގަނޑަކަށް 15 އާ 20 ހެދުން ނިންމާފައިވާ ކަމަށެވެ. ކައިވެނި ހަފްލާތަކުގެ ޑެކަރޭޝަންގައި އުޅޭ މީހުން ބުނީ, މިއަދަށް ޚާއްސަކޮށް ބޭރުން ގިނަ އަދަދެއްގެ އާލާތްތައް ގެނެސްފައިވާ ކަމަށާއި، ޓީމަށް އިތުރު މެމްބަރުން ވެސް ނަގާފައިވާ ކަމަށެވެ. އަދި މިދިޔަ އަހަރުގެ ތެރޭގައި މިހާ މަސައްކަތް ބުރަވެފައި ނުވާކަމަށް އެމީހުން ބުނެއެވެ.

މިއަދު ކައިވެނި ކުރި ޒުވާނަކު ބުނީ, އަބަދުވެސް ރީތި ތާރީޚެއްގައި ކައިވެނިކުރަން ބޭނުންވާކަމަށާއި، މިދިޔަ އަހަރުން ފެށިގެން މިއަދަށް ތައްޔާރުވަމުން އައިކަމަށެވެ. ނަމަވެސް ކަން ދިމާކުރި ގޮތުން, ޕާޓީ ބޭއްވުމަށް ބޭނުންވާ ލޮކޭޝަން ހަމަނުޖެހުމުން ޕާޓީ ލަސްކޮށްފައިވާ ކަމަށެވެ. އަންގާރަ ދުވަހުގެ ރޭ މާލޭގެ ނަން މަޝްހޫރު ބޮޑެތި ހުރިހާ ރެސްޓޯރަންޓެއްގެ އިތުރުން, ޕާކުތަކުގައި ޕާޓީތައް އެބައޮތެވެ. ނަމަވެސް ޖާގަ ނުލިބުމުގެ ސަބަބުން އެހެން ދުވަހަށް ޕާޓީތައް ލަސް ކުރި މީހުން ވެސް މަދެއް ނޫނެއެވެ.