21.12.21 ގައި 57 ކައިވެނި
އަންގާރަ ދުވަހު 28 ކައިވެންޏެއް ކޯޓުގައި ކުރުމަށް ހަމަޖެހިފައިވޭ
ފެމިލީ ކޯޓް
21.12.21 ގައި 57 ކައިވެނި ކުރުމަށް ތާވަލުކުރެވިފައިވާ ކަމަށް ފެމިލީ ކޯޓުން ބުނެފިއެވެ.
ފެމިލީ ކޯޓުން ބުނީ އަންގާރަ ދުވަހު 57 ކައިވެނި ކުރުމަށް ތާވަލުކުރެވިފައި ވާއިރު، އޭގެ ތެރެއިން 28 ކައިވެނި ކުރުމަށް ހަމަޖެހިފައި ވަނީ ކޯޓުގައި ކަމަށެވެ. އަދި ބާކީ 29 ކައިވެނި ކުރުމަށް ހަމަޖެހިފައި ވަނީ ކޯޓުން ބޭރުގައެވެ.
ރީތި ތާރީޚްތަކުގައި ކައިވެނި ކުރުމަކީ ރާއްޖޭގައި ވަރަށް ގިނަ ބަޔަކު ކުރަމުން އަންނަ ކަމެކެވެ. މި ދުވަސްތަކުގައި ކޯޓުތަކުގެ އިތުރުން ކައިވެނި ހަފްލާތައް ބާއްވާ ތަންތަން ވެސް އޮންނަނީ ތޮއްޖެހިފައެވެ.
އަންގާރަ ދުވަހު ގިނަ ކައިވެނިތަކެއް ކުރުމަށް ތާވަލުކުރެވިފައި ވާއިރު، އަންގާރަ ދުވަހަށް ތާވަލުކުރެވިފައިވާ ވަރީގެ މައްސަލަތައް ވެސް ވަރަށް ގިނައެވެ. އެގޮތުން ވަރީގެ ޖުމްލަ 11 މައްސަލައެއް އަންގާރަ ދުވަހު ކުރިއަށް ގެންދިއުމަށް ފެމިލީ ކޯޓުން ވަނީ ތާވަލުކޮށްފައެވެ. މީގެ ތެރޭގައި ހިމެނެނީ ވަރިއާމެދު ޝައްކުވެގެން ކުރިއަށްގެންދާ ދެ މައްސަލައަކާއި، ވަރި ސާބިތުކުރުމުގެ ތިން މައްސަލައެއްގެ އިތުރުން، ވަރިކުރުމަށް ހުށަހަޅާފައިވާ ދެ މައްސަލައަކާއި ވަރިވުމަށް އެދި ހުށަހަޅާފައިވާ ހަތަރު މައްސަލައެކެވެ.
