ނުވަދިހަ އެއް ޓީމާއެކު ގޯލްޑަން ފުޓްސެލް ޗެލެންޖުގެ ކުޅުން ފަށައިފިއެވެ.

ހުޅުމާލޭ ރެހެންދި ފުޓްސަލް ދަނޑުގައި ކުލަގަދަ ރަސްމިއްޔާތުގައި އެންމެ ފަހުގެ ޗެމްޕިއަން ތ. ތިމަރަފުށިން މި ފަހަރުގެ މުބާރާތުގެ ތަށި ވަނީ ދައްކާލާފައެވެ.

ހޮނިހިރު ދުވަހުގެރޭ ވަނީ ޒޯން އެކެއްގެ ހަ މެޗެއް ކުޅެފައެވެ. އޭގެ ތެރެއިން އެންމެ ފޯރިގަދަކޮށް ދިޔައީ ނޭކުރެންދޫ އާއި ނާވައިދޫގެ މެޗެވެ. މި މެޗުގެ ފުރަތަމަ ހާފުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް ދެވަނަ ހާފު ފަށައިގެން ނާވައިދޫން ވަނީ ދެ ލަނޑު ޖަހާ ލީޑު ނަގައިފައެވެ. އެގޮތުން ނާވައިދޫއަށް ލީޑު ނަގައިދިނީ އަބްދުﷲ ވިސާމެވެ. އަދި އޭގެ އިރުކޮޅެއްގެ ތެރޭގައި އަބްދުﷲ ޝާފިއު (ޝާއްޕެ) ވަނީ އެ ޓީމުގެ ލީޑުފުޅާކޮށްދީފައެވެ.

ނޭކުރެންދޫއިން މި މެޗުގެ ނަތީޖާ ހަމަހަމަކުރީ ފަހު ވަގުތުގައެވެ. މެޗުގެ ފުރަތަމަ ލަނޑު ނޭކުރެންދޫއިން ކާމިޔާބުކުރީ 30 ވަނަ މިނެޓުގައެވެ. މި ލަނޑު އެޓީމަށް ކާމިޔާބު ކޮށްދިނީ މުޙައްމަދު ފަރުހާން (ފަރުއްކޮ)އެވެ. އަދި ނޭކުރެންދޫއިން ނަތީޖާ ހަމަހަމަ ކުރި ލަނޑު ޖަހައިދިނީ ފަރުއްކޮގެ އެހީތެރިކަމާއެކު ކެޕްޓަން މުޙައްމަދު ވިލްފްއެވެ.

ހޮނިހިރު ދުވަހު ކުޅުނު ފުރަތަމަ މެޗުގައި ބައްދަލުކުރީ ހއ. ހޯރަފުއްޓާއި ހއ. ވަށަފަރެވެ. މި މެޗު 3-1 ގެ ނަތީޖާއަކުން ކާމިޔާބުކުރީ ހޯރަފުށި ޓިމެވެ. މި މެޗުގައި ހޯރަފުށިން ކާމިޔާބުކުރި ލަނޑުތައް އެ ޓީމަށް ޖަހައިދިނީ އަބްދުﷲ ޔާމީން (ޔާނު) އާއި އިބްރާހީމް ބިޝާރު އަދި އަލީ ޝިމާހުއެވެ. ވަށަފަރުން ކާމިޔާބުކުރި ހަމައެކަނި ލަނޑު އެޓީމަށް ކާމިޔާބު ކޮށްދިނީ މުޙައްމަދު ޒައިދު މުސްތަފާއެވެ. ދެވަނަ މެޗުގައި ހދ. ކުމުންދޫ އާއި ހދ. ފިނޭ ބައްދަލުކުރިއިރު، މި މެޗު ފިނޭއިން ކާމިޔާބުކުރީ 4-2 ގެ ނަތީޖާއަކުންނެވެ. ފިނޭއިން ކާމިޔާބުކުރި ހަތަރު ލަނޑުގެ ތެރެއިން ދެ ލަނޑު ކާމިޔާބުކުރީ ޝަމީމް ރަޝީދެވެ. ދެން ޖެހި ދެ ލަނޑު އެޓީމަށް ކާމިޔާބު ކޮށްދިނީ ކެޕްޓަން އަލީ މިސްބާހާއި، މުޙައްމަދު އާނިމްއެވެ.

ތިންވަނަ މެޗުގައި ހއ. ދިއްދޫ އިން ވަނީ 8-1 ގެ ނަތީޖާއަކުން ހއ. މާރަންދޫ ބަލިކޮށްފައެވެ. ދިއްދޫގެ ލަނޑުތައް އެ ޓީމަށް ކާމިޔާބު ކޮށްދިނީ ހައިޝަމް ރަޝީދާއި، ހިސާމް ހަސަން ވަހީދާއި، އާދަމް ނަސީމް އަދި ތައުމީން ނޫހުއެވެ. މީގެ ތެރެއިން ހައިޝަމް ވަނީ ހަތަރު ލަނޑު ޖަހައިފައެވެ.

މީގެ އިތުރުން ހޮނިހިރު ދުވަހުގެރޭ ށ. މިލަންދޫ އާއި ށ. ބެލެއްފަހި ބައްދަލުކުރި މެޗު މިލަންދޫ އިން ކާމިޔާބުކުރީ 2-0 ގެ ނަތީޖާއަކުންނެވެ. މިލަންދޫގެ ލަނޑުތައް އެ ޓީމަށް ކާމިޔާބު ކޮށްދިނީ ހަސަން ނާސިހު އާދަމް އާއި އަބްދުﷲ ނާޖީއެވެ.

ށ. ކޮމަންޑޫ އަތުން އެ އަތޮޅު ފޯކައިދޫ މޮޅުވީ 3-1 ގެ ނަތީޖާއަކުންނެވެ. ފޯކައިދޫގެ ލަނޑުތައް އެ ޓީމަށް ކާމިޔާބުކޮށްދިނީ މުޙައްމަދު ރިޝްވާން (ފުކޭ) އާއި، ހުސެއިން ނަބީހް އަދި އިބްރާހީމް މުޝީރުއެވެ.

މި މުބާރާތުގައި އާދީއްތަ ދުވަހުގެރޭ ވެސް ހަ މެޗެއް ކުޅޭނެއެވެ.

މި މުބާރާތުގައި ޖުމްލަ އަށް ޒޯނެއް ހިމެނޭއިރު، މިއަހަރުގެ މުބާރާތުގައި ޖުމްލަ 91 ޓީމު ބައިވެރިވެފައިވާ ކަމަށް މުބާރާތް އިންތިޒާމުކުރާ ގޯލްޑަން ފުޓްސަލް އެސޯސިއޭޝަނުން ބުނެއެވެ. މުޅި މުބާރާތުގެ ޗެމްޕިއަންޓީމަށް 65،000 ރުފިޔާގެ އިނާމެއް ހުށަހަޅާފައިވާއިރު، ރަނަރަޕް ޓީމަށް 25،000 ރުފިޔާ ވަނީ ހުށަހަޅާފައެވެ.

ދެ އަހަރުގެ މެދުކެނޑުމަކަށްފަހު ގޯލްޑަން ފުޓްސަލް ޗެލެންޖް ބާއްވާއިރު، މި މުބާރާތް އެންމެ ފަހުން ބޭއްވީ 2019 ވަނަ އަހަރެވެ. އެ ފަހަރު ފައިނަލުގައި ބ. އޭދަފުށި ބަލިކޮށް ޗެމްޕިއަންކަން ހޯދާފައިވަނީ ތ. ތިމަރަފުށިންނެވެ.