ރޯވިން އެސޯސިއޭޝަންގެ ހަރަކާތްތަކުގައި ބައިވެރިވާން ބޭނުންވާ ފަރާތްތަކަށް އެފުރުސަތު ހުޅުވާލައިފިއެވެ.
ރޯވިން އެސޯސިއޭޝަނުން ބުނީ އެ އެސޯސިއޭޝަނުން ހިންގާ ހަރަކާތްތަކުގައި ބައިވެރިވާން ބޭނުންވާ ޒުވާނުން އެ އެސޯސިއޭޝަންއާއި ގުޅައިގެން ބައިވެރިވުމުގެ ފުރުސަތު މިހާރު ހުޅުވާލާފައިވާ ކަމަށެވެ. މީގެ ތެރޭގައި ރިކްރިއޭޝަނަލް ރޯވިން އަދި ކޮމްޕެޓިޓިވް ރޯވިންގައި ބައިވެރިވާން ބޭނުންވާ ފަރާތްތަކަށްވެސް ވަނީ ފުރުސަތު ހުޅުވާލާފައެވެ.
ރޯވިން އެސޯސިއޭޝަންގެ މަސައްކަތް އިތުރަށް ފުޅާކުރުމަށް ރާއްޖޭގެ އެކި ސަރަހައްދުތަކުގައި ރޯވިން ކުލަބުތައް އުފައްދައިގެން ކުރިއަށް ގެންދިއުމަށް މިހާރު ވަނި ނިންމާފައެވެ. އެގޮތުން ހއ. ހޯރަފުށީގައި ކުލަބެއް އުފައްދާ، ރޯވިންގެ ހަރަކާތްތައް ކުރިއަށް ގެންދިއުމުގެ މަސައްކަތް މިހާރު ވަނީ ފަށާފައެވެ.
ރޯވިންގެ ހަރަކާތްތައް މިހާރު ކުރިއަށް ގެންދަނީ އައްޑޫސިޓީގައި އެކަންޏެވެ. އެގޮތުން އައްޑޫގެ އެކި ސްކޫލްތަކުގައި ޔޫތު ޑެވެލޮޕްމެންޓް ޕްރޮގްރާމްތަކެއް ހިންގުމުގެ މަސައްކަތް އެ އެސޯސިއޭޝަނުން ކުރިޔަށް ގެންދެއެވެ. މީގެ އިތުރުން އައްޑޫގައި ރާއްޖެއިން ބޭރުގެ ސްކޫލުތަކަށްވެސް ހުޅުވާލައިގެން މިދިޔަ އަހަރުވެސް ވަނީ އިންޓަ ސްކޫލް ކޯސްޓަލް ރޯވިން ބީޗް ސްޕްރިންޓް ގެ ނަމުގައި މުބާރާތެއް ކުރިއަށް ގެންގޮސްފައެވެ.
މި މުބާރާތުގައި ރާއްޖޭން ބޭރުގެ 23 އެތުލީޓުން ވާދަކުރިއެވެ. އޭގެ ތެރޭގައި ޕާކިސްތާން، ތައިލެންޑް އަދި ޗައިނާގެ އެތުލީޓުން ހިމެނެއެވެ. މީގެ އިތުރުން އައްޑޫ ސިޓީގެ ފަސް ސްކޫލަކުން 130 ދަރިވަރުން ވަނީ މި މުބާރާތުގައި ބައިވެރިވެފައެވެ.
ރޯވިން އެސޯސިއޭޝަނުން ބުނީ މިއަހަރުގެ ތެރޭގައި ޖުމްލަ ހަތަރު މުބާރާތެއް ބޭއްވުމުގެ މަސައްކަތް ކުރަމުން އަންނަ ކަމަށެވެ. އޭގެތެރޭގައި އިންޓަނޭޝަނަލް، ނޭޝަނަލް އަދި ސްކޫލް ފެންވަރުގެ މުބާރާތްތައް ހިމެނޭ ކަމަށެވެ.
ރޯވިން އެސޯސިއޭޝަން އޮފް މޯލްޑިވްސްއަކީ މާލެ ފިޔަވައި އަތޮޅުތެރޭގެ ރަށެއްގައި ހިންގާ ހަމައެކަނި ކުޅިވަރު އެސޯސިއޭޝަނެވެ. 2009 ވަނަ އަހަރުން ފެށިގެން އެ އެސޯސިއޭޝަނުން މިހާތަނަށް ފަލިޖެހުމުގެ ރޭސްތަކާއި ތަފާތު މުބާރާތްތައް ބޭއްވުމުގެ އިތުރުން، ބައިނަލްއަގުވާމީ މުބާރާތްތަކުގައިވެސް ރާއްޖެ ތަމްސީލުކޮށް މެޑެލް ހޯދާފައިވެއެވެ.
