ރާއްޖޭގައި ފުރަތަމަ ފަހަރަށް ބޭއްވި ބައިނަލްއަގުވާމީ ރޯވިން މުބާރާތް ކަމަށްވާ "އެމްޑަބްލިއުއެސްއީ އިންޓަ ސްކޫލް ކޯސްޓަލް ރޯވިން ބީޗް ސްޕްރިންޓް 2021" ކާމިޔާބުކަމާއެކު ނިންމާލައިފިއެވެ.

މިދިޔަ ބުރާސްފަތި ދުވަހު އައްޑޫ ސިޓީގައި ފެށި މި މުބާރާތުގައި ރާއްޖޭން ބޭރުގެ 23 އެތުލީޓުން ވާދަކުރިއެވެ. އޭގެ ތެރޭގައި ޕާކިސްތާން، ތައިލެންޑް އަދި ޗައިނާގެ އެތުލީޓުން ހިމެނެއެވެ. މީގެ އިތުރުން އައްޑޫ ސިޓީގެ ފަސް ސްކޫލަކުން 130 ދަރިވަރުން ވަނީ މި މުބާރާތުގައި ބައިވެރިވެފައެވެ.

މި މުބާރާތުގެ ނިންމުމުގެ ރަސްމިއްޔާތުގައި ވާހަކަ ދައްކަވަމުން ރޯވިން އެސޯސިއޭޝަން އޮފް މޯލްޑިވްސްގެ ރައީސް އަޙްމަދު ހަބީބް ވިދާޅުވީ މިއީ މިހާތަނަށް ބޭއްވުނު އެންމެ ކާމިޔާބު މުބާރާތް ކަމަށެވެ. އަދި މި މުބާރާތުގެ ތަޖުރިބާގެ އަލީގައި ކުރިއަށް ހުރި މުބާރާތްތައް މިއަށްވުރެ ފުރިހަމައަށް ބޭއްވިގެންދާނެ ކަމަށް ހަބީބް ވިދާޅުވިއެވެ.

ހަބީބް ވިދާޅުވީ ރޯވިން އެސޯސިއޭޝަނުގެ އަމާޒަކީ މުޅި ރާއްޖެއަށް ރޯވިން ފުޅާކުރުން ކަމަށާއި، މިއީ ދިވެހީންގެ ސަގާފަތާވެސް ގުޅިފައިވާ ކުޅިވަރެއް ކަމުގައެވެ. އަދި ކުރިއަށް އޮތް ތަނުގައި ރޯވިންގެ ބައިނަލްއަގުވާމީ ގިނަ މުބާރާތްތަކެއް ބޭއްވިގެންދާނެ ކަމަށް ހަބީބް ވަނީ ވިދާޅުވެފައެވެ.

އިންޓަ ސްކޫލް ރޯވިން މުބާރާތުގެ އެންމެ ގިނަ މެޑަލް ހޯދި ޓީމަކީ ޕާކިސްތާނުގެ ކަރާޗީ ބޯޓް ކުލަބެވެ. މި މުބާރާތުގެ ނިންމުމުގެ ރަސްމިއްޔާތުގައި ވަނީ މުބާރާތުގެ ވަނަވަނައަށްދިޔަ ފަރާތްތަކަށް މެޑަލް ދީފައެވެ. މީގެ އިތުރުން ލޯންގް ޑިސްޓެންސް ރޯވިން ޗެލެންޖެއްވެސް ވަނީ ކުރިއަށްގެންގޮސްފައެވެ.

މުބާރާތުގެ ކާމިޔާބީ ފާހަގަކޮށް އާދީއްތަ ދުވަހުގެރޭ އައްޑޫ ހައި ސްކޫލުގައި ބޭއްވި ރަސްމިއްޔާތުގައި ވާހަކަ ދައްކަމުން މި މުބާރާތުގެ ޓައިޓެލް ސްޕޮންސަރު އަދި ޝަރަފުވެރި މެހެމާން އެމްޑަބްލިއުއެސްސީގެ މެނޭޖިން ޑިރެކްޓަރު ހަސަން ޝާހު ވިދާޅުވީ އައްޑޫ ސިޓީގައި ކުރިއަށްދިޔަ ރޯވިން މުބާރާތަކީ ފުރިހަމަ މުބާރާތެއް ކަމުގައެވެ. އަދި ކުރިއަށް އޮތްތަނުގައި މި ކުޅިވަރު ކުރިއެރުވުމަށް ވެދޭން ޖެހޭ އެހީ އެމްޑަބްލިއުއެސްސީގެ ފަރާތުން ވެދެއްވާނެ ކަމުގައި ޝާހު ވިދާޅުވިއެވެ.

ރޯވިން އެސޯސިއޭޝަނުން މައުލޫމާތުދޭ ގޮތުން މި މުބާރާތަކީ ރާއްޖޭގެ މާހައުލާ ގުޅޭ ބައިނަލްއަގުވާމީ ކުޅިވަރެއް ރާއްޖެއަށް ތައާރަފުކުރުމާއެކު، ފަލިޖެހުމުގެ ހުނަރު އެކަމަށް ޝައުގުވެރިވާ ފަރާތްތަކަށް ދަސްކޮށްދީ، އެ ރޮނގުން ކުޅަދާނަ ފަލިޖެހުންތެރިން އުފެއްދުމުގެ މަގުސަދުގައި ކުރިއަށްގެންދިޔަ މުބާރާތެކެވެ.

ރޯވިން އެސޯސިއޭޝަން އޮފް މޯލްޑިވްސްއަކީ މާލެ ފިޔަވައި އަތޮޅުތެރޭގެ ރަށެއްގައި ހިންގާ ހަމައެކަނި ކުޅިވަރު އެސޯސިއޭޝަނެވެ. 2009 ވަނަ އަހަރުން ފެށިގެން އެ އެސޯސިއޭޝަނުން މިހާތަނަށް ފަލިޖެހުމުގެ ރޭސްތަކާއި ތަފާތު މުބާރާތްތައް ބޭއްވުމުގެ އިތުރުން، ބައިނަލްއަގުވާމީ މުބާރާތްތަކުގައިވެސް ރާއްޖެ ތަމްސީލުކޮށް މެޑެލް ހޯދާފައިވެއެވެ.

މި މުބާރާތުގެ ޓައިޓަލް ސްޕޮންސަރަކީ އެމްޑަބްލިޔުއެސްސީއެވެ. ޑިޖިޓަލް ޕާޓްނަރަކީ އުރީދޫއެވެ. އަދި ޑެސްޓިނޭޝަން ޕާޓްނަރައަކީ ވިޒިޓް މޯލްޑިވްސްއެވެ. ޑްރިންކް ޕާޓްނަރެއްގެ ގޮތުގައި މޮގުމޮގު ހަމަޖެއްސިއިރު، ކޯޕަރޭޓް ސްޕޮންސަރުންގެ ތެރޭގައި އައްޑޫސިޓީ ކައުންސިލް، އެސްޓީއޯ، ސިގްނޭޗާ، ސޮނޭވާ، އަދި ވެންޒާ ކޮމްޕެނީ ޕްރައިވެޓް ލިމިޓެޑް ހިމެނުނެވެ. މީގެ އިތުރުން މި މުބާރާތުގެ އޮފިޝަލް ޖާޒީ ސްޕޮންސާކޮށްފައިވަނީ ސަނީ އެންޓަޕްރައިސަސްއިންނެވެ. އަދި މުބާރާތުގެ އޮފިޝަލް މީޑިއާ ޕާޓްނަރަކީ ރާއްޖެޓީވީއެވެ.