މޯލްޑިވްސް ކަރެކްޝަނަލް ސަރވިސް (އެމްސީއެސް)ގެ މާފުށީ ޖަލުގައި މަސައްކަތްކުރާ ޕްރިޒަން އޮފިސަރުންނާއި މުވައްޒަފުން, ގާނޫނާއި ގަވާއިދުތަކަށް އަހުލުވެރިކުރުމުގެ ސެޝަންތަކެއް އެ ޖަލުގައި ފަށައިފިއެވެ.

17 ފެބްރުވަރީ 2022ން ފެށިގެން 3 ދުވަހަށް ކުރިއަށް ގެންދާ މި ސެޝަންތަކުގެ ބޭނުމަކީ, މާފުށީ ޖަލުގައި މަސައްކަތް ކުރާ ހުރިހާ އޮފިސަރުންނާއި މުވައްޒަފުން ގާނޫނުތަކާއި ގަވާއިދުތަކަށް އަހުލުވެރިކޮށް، މަސައްކަތު މާހައުލުގައި އެ މަައުލޫމާތުގެ ބޭނުން އެންމެ ފުރިހަމައަށް ހިފަން ދަސްކޮށްދިނުން ކަމަށް ކަރެކްޝަންސްއިން މައުލޫމާތުދެއެވެ.

އެ އިދާރާއިން މައުލޫމާތު ދޭ ގޮތުގައި މި ސެޝަންތަކުގައި މާފުށީ ޖަލުގެ 27 އަންހެން އޮފިސަރުންނާއި 113 ފިރިހެން އޮފިސަރުން ވަނީ ބައިވެރިވެފައެވެ.

މާފުށީ ޖަލުން އިންތިޒާމްކޮށްގެން ކުރިއަށް ގެންދާ މި ސެޝަންތަކުގެ ބައިވެރިންނަށް, ގާނޫނާއި ގަވާއިދުތަކާބެހޭ މަައުލޫމާތު ފޯރުކޮށްދެއްވަނީ އެމްސީއެސްގެ ޕްރޮފެޝަނަލް ސްޓޭންޑަރޑްސްގެ މުވައްޒަފުންނެވެ. އަދި މިފަދަ ސެޝަންތައް މުސްތަގުބަލުގައި ވެސް ކުރިއަށްގެންދާނެކަމަށް ކަރެކްޝަންސްއިން މައުލޫމާތުދެއެވެ.