ތަންފީޒީ އިދާރާތަކުގެ މުވައްޒަފުންނާ ދެކޮޅަށް އަނިޔާވެރި އަމަލުތައް ހިންގުމަކީ ސަރުކާރުން ބަލަން ތިބޭނެކަމެއް ނޫންކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ނ. މިލަދޫގައި މަސްތުވާތަކެތީގެ ވިޔަފާރި ކުރަމުންދިޔަ މީހަކު ހުއްޓުވި ފުލުސް މީހާއަށް ބިރުދައްކާ، އިންޒާރު ދިނުމަށްފަހު އެމީހާ ދުއްވާ ސައިކަލްގައި އަލިފާން ރޯކޮށްލި މައްސަލައާ ގުޅިގެންނެވެ. އެމައްސަލައާ ގުޅިގެން ކަންބޮޑުވުން ފާޅުކުރައްވާ މިނިސްޓަރ ކުރެއްވި ޓްވީޓެއްގައި ވިދާޅުވީ ފުލުހުންގެ އުޅަނދު އަންދާލާފައިވާ މަައްސަލަ ވަރަށް ސީރިއަސް މައްސަލައެއްގެ ގޮތުގައި ބެލުމަށްފަހު، ޒިންމާވާންޖެހޭ ފަރާތްތަކާމެދު ސަރުކާރުން ފިޔަވަޅު އަޅާނެ ކަމަށެވެ.
މިމައްސަލައާ ގުޅިގެން ފުލުހުން ބުނީ ކޯޓު އަމުރެއްގެ ދަށުން 22 އަހަރުގެ މީހަކާއި 27 އަހަރުގެ މީހެއްގެ އިތުރުން 31 އަހަރުގެ މީހަކު ހައްޔަރުކޮށްފައިވާ ކަމަށެވެ. އެ އެންމެންނަކީ ވެސް ދިވެހީންނެވެ.
މިހާދިސާއާ ގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދު ކުރެއްވި ޓުވީޓެއްގައި ވިދާޅުވީ މިލަދޫ ޕޮލިސް ޑެސްކް އިންޗާޖު، ސާޖަންޓް މުހައްމަދު އަރީޝްއާ ވާހަކަދެއްކެވި ކަމަށެވެ. އަދި މިލަދޫގެ ރައްޔިތުންގެ ރައްކާތެރިކަމަށްޓަކައި ސާޖަންޓް އަރީޝް ކުރައްވާ ހިތްވަރު ގަދަ އިޚުލާސްތެރި މަސައްކަތާ މެދު ފަހުރުވެރިވާކަމަށް ވިދާޅުވިއެވެ.
"މަސްތުވާތަކެއްޗާ ދެކޮޅަށް ކުރާ މަސައްކަތް ރަަށު ފެންވަރުގަ އާއި ގައުމީ ފެންވަރުގައި ކުރިއަށްގެންދާނަން. އަޅުގަނޑުމެން ފަހަތަކަށް ނުޖެހޭނަން،" ސީޕީ ހަމީދު ވިދާޅުވިއެވެ.
