މަސްތުވާތަކެތީގެ މައްސަލަތައް ތަހުގީގުކުރުމުގައި، ގަސްދުގައި ގޯސްހަދާ މީހުން އެބަތިބި - އޭޖީ
17 ފެބުރުއަރީ 2022 | ބުރާސްފަތި 14:27ހެކި ވަޒަންކުރުމުގެ ތަފްސީލުތައް ގާނޫނުގައި ނެތުމުން، ލޫޕްހޯލް ހުރެ، މައްސަލަތައް ސާބިތުނުވޭ
ޖުޑިޝަރީ ކޮމިޓީގެ ބައްދަލުވުމުގެ ތެރެއިން
މަސްތުވާތަކެތީގެ މައްސަލަތައް ތަހުގީގުކުރުމުގައި ރޭވިގެން އިންތިޒާމްވެގެން ގޯސްހަދާ މީހުން އެބަތިބިކަމަށް އެޓާރނީ ޖެނެރަލް އިބްރާހީމް ރިފްއަތު ވިދާޅުވެއްޖެއެވެ.
ޖިނާއީ މައްސަލަތަކުގެ އަޑުއެހުންތައް ތާވަލުކުރެވޭގޮތާ އެއްގޮތަށް ކުރިއަށްނުދާ މައްސަލައާ ގުޅޭގޮތުން، ރައްޔިތުންގެ މަޖިލީހުގެ ޖުޑީޝިއަރީ ކޮމިޓީން, ޖުޑީޝަލް ސަރވިސް ކޮމިޝަންއާ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ ބޭފުޅުންނާއެކު ކުރިއަށްގެންދިޔަ ބައްދަލުވުމުގައި އޭޖީ ރިފްއަތު ވިދާޅުވީ، ނިޒާމު އޮންނަ ގޮތް އެނގިތިބެ, ލޫޕްހޯލްތައް އެނގިގެން ގަސްދުގައި އެކަން ކުރާ މީހުން ތަހުގީގީ އިދާރާތަކުގައި އެބަތިބިކަމަށެވެ. އަދި މިކަމުގެ ސަބަބުން މައްސަލަތައް ސާބިތުކުރުމުގައި ގޮންޖެހުންތައް ހުންނަ ކަމަށެވެ.
އެހެންކަމުން މިކަން ހައްލު ކުރުމަށް ހެއްކާ ބެހޭ ތަފްސީލީ ބިލެއް މިހާރު ރައްޔިތުންގެ މަޖިލީހަށް ހުށަހަޅާފައިވާ ކަމަށް އޭޖީ ވިދާޅުވިއެވެ. އެ ގާނޫނުގައި ވަރަށް ތަފްސީލްކޮށް, ހެކިބަސް ދޭ މީހާއަށް ހިމާޔަތް ދިނުމާއި އެމީހާގެ ހައްގުތައް ރައްކާތެރި ކުރެވޭނެ ގޮތް ހިމަނާފައިވާނެ ކަމަށް އޭޖީ ރިއްފަތު ވިދާޅުވިއެވެ.
ކޯޓުތަކުގައި މައްސަލަ ސާބިތުނުވާ ސަބަބުތަކާ ބެހޭ ގޮތުން އިތުރަށް އޭޖީ ރިއްފަތު ވިދާޅުވީ، މިހާރުވެސް ކޯޓުތަކުގައި އަމަލުކުރަމުން އަންނަނީ 1970ގެ އަހަރުތަކުގެ ތެރޭގައި ފާސްކޮށްފައި އޮތް ހެއްކާ ބެހޭ ގާނޫނަށް ކަމަށާއި، އޭގައި ތަފްސީލުކޮށް އުސޫލުތަކާއި ހަމަތައް ނެތްކަމަށެވެ. އެހެންކަމުން އެ ގާނޫނުގެ ދަށުން, މައްސަލަ ބައްލަވާ ގާޒީއަށް ހެކި ވަޒަންކުރުމަށް ބޮޑެތި ބާރުތަކެއް ލިބިފައިވާކަމަށެވެ. އެހެންކަމުން ހެކި ވަޒަންކުރުމުގެ ތަފްސީލުތައް އެ ގާނޫނުގައި ނެތުމުން, ލޫޕްހޯލް ހުރެ, މައްސަލަތައް ސާބިތުނުވުމަކީ އެކަށީގެންވާކަމެއް ކަމަށެވެ.
ސިއްރު ހެކިބަސް ދޭމީހާ އެއީ ކާކުކަން އެނގި، އެ ހެކިބަސް ގެއްލި، އޭނައަށް ތުރެޓް އަންނަ ހިސާބަށްދާކަން އޭޖީ ފާހަގަކުރެއްވިއެވެ. އަދި މިއީ މައްސަލަތައް ސާބިތު ނުވުމަށް ދިމާވާ ސަބަބުތައްކަން އޭޖީ ފާހަގަކުރެއްވިއެވެ.
އޭޖީ ވިދާޅުވީ, ޖިނާއީ އަދުލުގެ ނިޒާމުގައި މައްސަލަތައް އެބަހުރިކަމަށާއި، ގާނޫނުތަކަށް ގެންނަންޖެހޭ ބަދަލު މިހާރުވެސް ގެންނަމުންދާކަމަށެވެ. މަދަނީ އިޖުރާއަތުގެ ގާނޫނަށް އަމަލުކުރަން ފެށުމުން މަދަނީ މައްސަލަތައް އަވަސްވެގެންދާނެކަމަށާއި, ޖިނާއީ އިޖުރާއަތުގެ ގާނޫނަށްވެސް އިސްލާހު ގެނައުމަށް ކޯޓުތަކުން އެދެމުންދާތީ އެކަންވެސް މި އަހަރު ކުރައްވާނެކަމަށް އޭޖީ ވިދާޅުވިއެވެ.
