މޯލްޑިވްސް އިންޓެގްރޭޓަޑް ޓުއަރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ)ގެ ފަރާތުން މުޅި ދުނިޔެއަށް ހުޅުވާލައިގެން ކުރިއަށްގެންދާ ޔޮޓް ރެލީ ނިންމާލުމުގެ ގޮތުން, ބުރާސްފަތި ދުވަހު ކ. އަތޮޅަށް އައުމަށް ދަތުރު ފަށަން ނިންމައިފިއެވެ.

ސަވާދީއްތަ ދަތުރާ ގުޅިގެން ރާއްޖެއެމްވީއަށް މައުލޫމާތުދެއްވަމުން, މި ދަތުރު އިންތިޒާމްކުރާ އެމްއައިޓީޑީސީގެ މެނޭޖިންގ ޑިރެކްޓަރ މުހައްމަދު ރާއިދު ވިދާޅުވީ, ނ. ލަންދޫއިން ފުރައިގެން މިހާރު ރެލީގެ ބައިވެރިން ތިބީ ޅ. ދިއްފުށިމާދޫގައި ކަމަށެވެ. ނ. ލަންދޫއިން ރެލީގެ ބައިވެރިންނަށް ވަރަށް ފުރިހަމަ އަލްވަދާއެއް ކިޔާފައިވާކަމަށާއި، ފަތުރުވެރިންނަށް ހަދިޔާވެސް ދީފައިވާކަމަށް ރާއިދު ވިދާޅުވިއެވެ.

ރާއިދު ވިދާޅުވީ ބުރާސްފަތި ދުވަހުގެ ހެނދުނު ކ. އަތޮޅަށް ދިއުމަށް ދަތުރު ފަށާނެ ކަމަށެވެ. އަދި މާލެ އަތޮޅަށް ކުރާ ދަތުރުގައި ގާފަރުގައި ބަނދަރުކުރާނެކަމަށެވެ. އަދި ޔޮޓު ރެލީ ނިންމާލުމުގެ ރަސްމިއްޔާތު ކުރިއަށްދާނީ ކ. އަތޮޅު ފަރި އައިލެންޑް ރިޒޯޓުގައި ކަމަށް ރާއިދު ވިދާޅުވިއެވެ. ޔޮޓު ރެލީގެ އެންމެ ފަހު މަންޒިލްގެ ގޮތުގައި ކަނޑައަޅާފައިވަނީ ބ. ތުޅާދޫ ކަމަށާއި, އެހެންނަމަވެސް ތުޅާދޫ މޮނިޓަރިންގައި އޮތުމުގެ ސަބަބުން ތުޅާދޫއަށް ދަތުރުކުރެވިފައިނުވާކަމަށް ރާއިދު ވިދާޅުވިއެވެ.

ރަށްރަށުގެ ރައްޔިތުންގެ ފަރާތުން މި ދަތުރަށް ވަރަށް ބޮޑު ތަރުހީބެއް ލިބެމުން އަންނަކަން ފާހަގަކުރައްވައި ރާއިދު ވިދާޅުވީ, ރަށްރަށުގައި ދިރިއުޅޭ ރައްޔިތުން ފަތުރުވެރިކަމަށް ބޭނުންވެފައިވާ މިންވަރު މިދަތުރުން ހާމަވާ ކަމަށެވެ. މި ދަތުރުގެ ތެރެއިން ރާއްޖޭގެ ރަށްތައް އިޝްތިހާރުކޮށް އެރަށްތަކުގެ ޚާއްސަ ކަންކަން ފަތުރުވެރިން ދަނީ ބޭރުގެ އެކި ސޯޝަލް މީޑިއާ ޕްލެޓްފޯމްތަކުގައި ހިއްސާކުރަމުންނެވެ.

ރާއްޖޭގެ ފަތުރުވެރިކަން އިޝްތިހާރުކޮށް ކުރިއެރުވުމަށް ބާއްވާ މި ރެލީގައި ޖުމްލަ 9 ޔޮޓެއް ބައިވެރިވިއެވެ. ނަމަވެސް މަގުބޫލު އުޒުރަކާއެކު ދެޔޮޓް ވަނީ ދަތުރާ ވަކިވެފައެވެ. ކާމިޔާބުކަމާއެކު ކުރިއަށް ގެންދާ މި ދަތުރާ ގުޅޭގޮތުން ރާއިދު ވިދާޅުވީ, މިއަށްވުރެ މާ ފުރިހަމަކޮށް މިއަންނަ އަހަރު ވެސް މިރެލީ ކުރިއަށް ގެންދިއުމަށް ނިންމާފައިވާކަމަށެވެ. އަދި އުންމީދަކީ މެދުނުކެނޑި ކޮންމެ އަހަރަކުވެސް ސިލްސިލާކޮށް މިދަތުރުތައް ކުރިއަށް ގެންދެވުން ކަމަށެވެ.