މަރު ކޮމިޝަނަށް ރިސަރޗް އޮފިސަރަކު ހޯދުމަށް ދެވަނަ ފަހަރަށް އިއުލާންކޮށްފި
16 ފެބުރުއަރީ 2022 | ބުދަ 12:52ކޮމިޝަނުން ތަހުގީގުކުރަމުންދާ މައްސަލަތަކާގުޅޭ ރިސަރޗް ހެދުމާއި އެ މައްސަލަތަކުގެ ބްރީފް ތައްޔާރުކުރުން ހިމެނޭ
ރައީސުލްޖުމްހޫރިއްޔާގެ އޮފީސް
މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގުކުރުމަށް ރައީސުލްޖުމްހޫރިއްޔާ އުފައްދަވާފައިވާ ކޮމިޝަނަށް ރިސަރޗް އޮފިސަރަކު ހޯދުމަށް ދެވަނަ ފަހަރަށް ރައީސް އޮފީހުން އިއުލާންކޮށްފިއެވެ.
އެކަމާ ގުޅިގެން ރައީސް އޮފީހުން ބުނީ, ކުރިން ކުރި އިއުލާނަށް ކުރިމަތިލި ފަރާތްތައް ވަރަށް މަދުކަމާއެކު، އަލުން މި ވަޒީފާއަށް ފުރުސަތު ހުޅުވާލާކަމަށެވެ.
މިމަގާމުގެ އަސާސީ މުސާރައެއްގެ ގޮތުގައި 6,295 ރުފިޔާ ކަނޑައަޅާފައިވާއިރު, އެލަވަންސްތަކާއެކު ޖުމްލަ 13,627.75 ރުފިޔާ ވަނީ ކަނޑައަޅާފައެވެ. ރިސަރޗް އޮފިސަރ ކުރަންޖެހޭ މަސައްކަތުގެ ގޮތުގައި ފާހަގަކޮށްފައިވަނީ, ކޮމިޝަނުން ތަހުގީގުކުރަމުންދާ މައްސަލަތަކާގުޅޭ ރިސަރޗް ހެދުމާއި, އެ މައްސަލަތަކުގެ ބްރީފް ތައްޔާރުކޮށް މިކަންކަމާ ގުޅޭގޮތުން ފޮނުވަން ޖެހޭ ލިޔުންތައް ތައްޔާރުކޮށް ފޮނުވުމާއި، ބާއްވަން ޖެހޭ ބައްދަލުވުންތައް އިންތިޒާމުކުރުމާއި, ބައްދަލުވުންތަކުގެ ޔައުމިއްޔާ ތައްޔާރުކޮށް, ފޮނުވަން ޖެހޭ ފަރާތްތަކަށް ފޮނުވުމެވެ. އަދި ފޮލޯއަޕްހަދައި ބެލެހެއްޓުމުގެ އިތުރުން ޑޭޓާބޭސް ސެޓްއަޕްކޮށް ބެލެހެއްޓުމާއި މެނޭޖްކުރުންވެސް ހިމެނެއެވެ.
މި މަގާމަށް ޝަރުތު ފުރިހަމަވާ މީހުން ރައީސުލްޖުމްހޫރިއްޔާގެ އޮފީހުގެ ވަޒީފާއަށް އެދޭ މީހުން ފުރިހަމަކުރާ މައުލޫމާތު ފޯމާއެކު، 20 ފެބުރުވަރީ ވާ ބުދަ ދުވަހުގެ 14:00ގެ ކުރިން ހުށަހެޅުމަށް ރައީސް އޮފީހުން ބުނެއެވެ.
ގެއްލުވާލާފައިވާ މީހުންނާއި މަރާލާފައިވާ މީހުންނަށް އިންސާފު ހޯދައިދިނުމަކީ މިސަރުކާރުގެ ވައުދަކަށް ވާއިރު މަރު ކޮމިޝަން އުފައްދަވާފައިވަނީ ރައީސުލްޖުމްހޫރިއްޔާގެ ގަރާރަކުންނެވެ. މިކޮޝަނަށް ވަނީ ގާނޫނީ ބާރުތަކެއްވެސް ދީފައެވެ. ނަމަވެސް ކޮމިޝަންގެ މަސައްކަތްތައް އެކަށީގެންވާ މިންވަރެއްގައި ކުރިއަށް ނުދާކަމުގެ ޝަކުވާތައް ވަނީ ބޮޑުވެފައެވެ.
