ޔޫކުރައިންގައި ތިބި ދަރިވަރުންގެ ރައްކާތެރިކަމަށް ގޮވާލައި ހުށަހެޅި ކުއްލި މައްސަލަ ބަލައިނުގަނެ މަޖިލީހުން ބޭރުކޮށްލައިފިއެވެ.

ކުއްލި މައްސަލަ ހުށަހެޅުއްވީ، ނޮޅިވަރަމް ދާއިރާގެ މެމްބަރު މުހައްމަދު ނަޝީދުއެވެ.

ކުއްލި މައްސަލަ ބަލައިގަންނަން ވޯޓް ދެއްވީ 7 މެންބަރުންނެވެ. މައްސަލަ ބަލައިގަތުމަށް 17 މެންބަރުން ވޯޓް ދެއްވިއިރު ވަކި ގޮތަކަށް ވޯޓު ނުދެއްވާ 1 މެމްބަރަކު އިންނެވިއެވެ. ވޯޓުގައި ބައިވެރިވެވަޑައިގެންނެވީ 25 މެމްބަރުންނެވެ. އެހެންކަމުން ކުއްލި މައްސަލަ އާއިމެދު ބަހުސް ކުރަން ފާސްނުވެ، މައްސަލަ ވަނީ މަޖިލީހުން ބޭރުކޮށްލާފައެވެ.

ކުއްލި މައްސަލާގައި ވަނީ ޔޫކުރައިނާއި ރަޝިޔާ އިންވާ ބޯޑަރު ސަރަހައްދަށް ރަޝިޔާގެ ސިފައިން ޖަމާކުރުމުގެ ސަބަބުން ނުތަނަވަސްކަން ބޮޑުވެފައިވާއިރު، ޔޫކުރައިނަށް ރަޝިޔާއިން ވަރަށް އަވަހަށް އަސްކަރީ ހަމަލާއެއް ދީފާނެކަމަށް އެ ގައުމުގެ ރައީސް ވިދާޅުވެފައިވާ ކަމަށެވެ. އަދި ޔޫކުރައިނަށް ރަޝިޔާއިން ހަމަލާއެއް ދިނުމާއެކު ހަނގުރާމަ ފެށިއްޖެ ހާލަތެއްގައި އެ ގައުމުން ބޭރުވެ ރައްކާތެރި މަންޒިލަކަށް ދިއުން ދަތިވާނެ ކަމަށެވެ.

ޔޫކުރެއިނުގެ އެކި ޔުނިވާސިޓީތަކުގައި މިހާރުވެސް ފަންސާހަށްވުރެ ގިނަ ދިވެހި ދަރިވަރުން ތައުލީމު ހާސިލުކުރަމުންދާއިރު، ޔޫކުރައިނުގައި ކިޔަވަމުން އަންނަ ދަރިވަރުން ހަނގުރާމައިގެ ހާލަތުގައި އެ ގައުމުން ނެރެ ސަލާމަތް މަންޒިލަކަށް ގެންދިއުމަކީ ބޮޑެތި ގޮންޖެހުންތައް ކުރިމަތިވާނެ ކަމެއްކަމަށްވާތީ، އެ ގައުމުގައި ތިބި ދަރިވަރުން ރައްކާތެރި މަންޒިލަކަށް ގެންދިއުމުގެ މަސައްކަތްކުރުމަށް ޚާރިޖީވަޒީރަށް މިމައްސަލާގައި ގޮވާލާފައިވެއެވެ.

މީގެ އިތުރުން އިންޑިއާގައި ވެރިކަންކުރާ ހަރުކަށި ހިންދޫ ވިސްނުމުގެ ފަރާތްތަކާއި ހަރުކަށި ހިންދޫ ޖަމާއަތްތަކުން، އެ ގައުމުގެ މުސްލިމުންނަށް ކުރިމަތިކުރަމުންދާ ތުރާތަކުގެ ތެރެއިން އެ ގައުމުގެ ސުކޫލުތަކާއި ކޮލެޖުތަކާއި ޔުނިވާސިޓީތަކުގައި ކިޔަވާ މުސްލިމު އަންހެންކުދިންނަށް ބުރުގާ ނަގަން މަޖުބޫރުކުރުވައި، އެ ކުދިންނާ ދިމާކޮށް ފުރައްސާރަކޮށް ދަތިކުރަމުން އަންނަ ކަމަށް މި މައްސަލައިގައިވަނީ ބުނެފައެވެ.

އިންޑިއާ އަކީވެސް ގިނ އަދަދެއްގެ ދިވެހިން ކިޔަވަމުން އަންނަ ތަނަކަށްވާއިރު، އޭގެ ތެރޭގައި ބުރުގާއަޅާ އަންހެން ކުދިން ހިމެނޭތީ އެ ކުދިންނަށް ހިންދޫ ވިސްނުމުގެ ހަރުކަށި މީހުންނާއި އިންޑިއާގެ ވެރިކަން ކުރާ ބީޖޭޕީން ގެންގުޅޭ ވިސްނުމުގެ ތުރާއާއި ދަތިތައް އެކުދިންނަށް ކުރިމަތިވުމުގެ ފުރުސަތު އޮތުމާއެކު އެކުދިންގެ ހައްގުތައް ރައްކާތެރިކުރުމަށް ކުރެވެން ހުރި ހުރިހާ މަސައްކަތްތަކެއް ކުރަންޖެހޭ ކަމަށެވެ.

މައްސަލަ ހުށަހެޅުއްވުމުން، ނިޒާމީ ނުކުުތާ ނަންގަވައި އެމްޑި،ޕީގެ ޕީޖީ ލީޑަރު އަލީ އާޒިމް ވިދާޅުވީ، މިއީ ހުށަހެޅޭނެ މައްސަލައެއް ނޫން ކަމަށެވެ. ސަބަބެއް ކަަމަށް ވިދާޅުވީ، ޔޫކްރެއިންގައި ތިބި ދަރިވަރުންގެ ރައްކާތެރިކަމަށް ފޮރިން މިނިސްޓްރީން މިހާރުވެސް ފިޔަވަޅު އަޅަމުން ގެންދާ ކަމަށެވެ. އެހެންކަމުން މިއީ މިހާރު ހިނގާ ކަމެއް ނޫން ކަމުން މައްސަލަ ހުށަހެޅުއްވޭނެ ފުރުސަތު ނެތް ކަަމަށެވެ.