މާލެ ރަށްވެހިންނަށް ގޯތި ދިނުމުގެ އުސޫލުގެ ޑްރާފްޓް އެކުލަވާލަމުންދާ ކަމަށް މިނިސްޓަރ އޮފް ޕްލޭނިންގ ހައުސިންގ އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

ބުދަ ދުވަހު ރައްޔިތުންގެ މަޖިލީހުގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން އަސްލަމް ވިދާޅުވީ، މާލެ ރައްޔިތުންނަށް ގޯތި ދިނުމުގެ އުސޫލުގެ ޑްރާފްޓާ ގުޅޭ ގޮތުން ކުރިއަށް އޮތް ހަފްތާގެ ތެރޭގައި މާލެ ދާއިރާގެ މެމްބަރުންނާއި މަޝްވަރާ ކުރެވުމަށް ހަމަޖެހިފައިވާ ކަމަށެވެ. މިނިސްޓަރ ވިދާޅުވީ، މާލޭގެ ރައްޔިތުންނާއި ގުޅުން ބޮޑު ކަމެއް ނިންމާއިރު، މެމްބަރުންގެ ޚިޔާލު އެކަމަށް މުހިންމު ކަމަށެވެ.

އަސްލަމް ވިދާޅުވީ، ރިޔާސީ ބަޔާނުގައި ރައީސް ވިދާޅުވި ގޮތަށް ޖޫން މަހުގެ ތެރެގައި ގޯތި ދިނުމުގެ މަސައްކަތް ކުރިއަށްދާނެ ކަމަށެވެ.

މި އަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރައީސުލްޖުމްހޫރިއްޔާ އިބްރާހިމް މުހައްމަދު ސާލިހު ވިދާޅުވީ، މާލޭ ރަށްވެހިންނަށް ގޯތި ދިނުމަށް ނިންމަވާފައިވާ ކަމަށާއި، މާލޭ ރަށްވެހިންނަށް ހުޅުމާލެއިން މަދުވެގެން 1,000 ގޯތި، އަދި ގުޅީފަޅުން މަދުވެގެން 2,000 ގޯތި ދެއްވާނެ ކަމަށެވެ. މި އަހަރު ޖޫންމަހު އެކަން ފަށްޓަވާނެ ކަމަށެވެ. އަދި އޭގެއިތުރުން، ގިރާވަރު ފަޅު ހިއްކައި، އެ ބިމުންވެސް މަދުވެގެން 2,000 ގޯތި، މާލޭ ރަށްވެހިންނަށް ދެއްވާނެ ކަމަށް ރައީސް ސާލިހު ވިދާޅުވިއެވެ. ގިރާވަރު ފަޅަކީ ތިލަމާލެ ބްރިޖް އެދާގޮތަށްގޮސް ގުޅުވައިލެވޭ ތަނަކަށްވާނެ ކަމަށްވެސް ވިދާޅުވިއެވެ.

އެމަނިކުފާނުގެ ރިޔާސީ ދައުރު ނިންމަވާލައްވާނީ، އެންމެ ބޭނުންޖެހިފައިވާ މާލޭގެ ރައްޔިތުންނަށް އިންވަކިކޮށް ރޯނުދަމާ، ބިންކަނޑާ، ގޯތީގެ ފަތް ދިނުމަށްފަހު ކަމުގައެވެ. ދިވެހި ދައުލަތުގެ ހިޔާވަހިކަމުގެ ދަށުގައިވާ ހުރިހާ ވަސީލަތެއްގެ ހިޔާވަހިކަން ރައްޔިތުންނަށް ލިބެންޖެހޭ ކަމަށާއި، ބޭނުންވަނީ އެކުގައި އެއް އަމާޒެއްގައި ތިބެ، އެ މަންޒިލަށް ވާސިލުވާން ކަމުގައި ރައީސް ސާލިހުވަނީ ވިދާޅުވެފައެވެ.