ޖަރުމަނު ލީގުގައި ވީއެފްއެލް ބޯކުމް އެންމެ ފަހުގެ ޗެމްޕިއަން ބަޔާން މިއުނިކް ބަލިކޮށްފިއެވެ،

ރަށުން ބޭރުގައި ކުޅުނު މި މެޗު ބޯކުމް ކާމިޔާބުކުރީ 4-2 ގެ ނަތީޖާއަކުންނެވެ.

މިއީ މިދިޔަ 18 އަހަރު ތެރޭގައި ބަޔާން އަތުން ބޯކުމް އަށް ލިބުނު ފުރަތަމަ މޮޅެވެ. މީގެ ކުރިން 2018 ވަނަ އަހަރުގައި ބޯކުމް ވަނީ ބަޔާން އަތުން މޮޅުވެފައެވެ.

މި މެޗުގައި ފުރަތަމަ ލަނޑު ޖަހާ ލީޑު ނަގާފައިވަނީ ބަޔާންއެވެ. މި ލަނޑު ބަޔާންއަށް ކާމިޔާބު ކޮށްދިނީ އިތުބާރު ފޯވާޑް ރޮބާޓް ލެވަންޑޯސްކީއެވެ. މިއީ ކިންގްސްލީ ކޯމަންގެ އެހީތެރިކަމާއެކު އޭނާ ކާމިޔާބުކުރި ލަނޑެކެވެ. އެކަމަކު މެޗުގެ 14 ވަނަ މިނެޓުގައި ބޯކުމް އިން ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ކްރިސްޓޮފާ އަންޓްވީ އަޖޭއިއެވެ. އޭގެ ފަހުން މެޗުގެ 37 ވަނަ މިނެޓުގައި ބޯކުމް އިން ވަނީ ލަނޑު ޖަހާ ލީޑު ނަގައިފައެވެ. ލިބުނު ޕެނަލްޓީއަކުން މި ލަނޑު އެޓީމަށް ކާމިޔާބު ކޮށްދިނީ ޔާގެން ލޮކާޑިއާއެވެ.އޭގެ ދެ މިނެޓު ފަހުން ބޯކުމް އިން ވަނީ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ކްރިސްޓިއަން ގަމްބޯއާއެވެ.

ފުރަތަމަ ހާފު ނިމުމުގެ ކުރިން ބޯކުމް އިން ވަނީ ހަތަރުވަނަ ލަނޑު ޖަހައިފައެވެ. މެޗުގެ 43 ވަނަ މިނެޓުގައި މި ލަނޑު އެޓީމަށް ކާމިޔާބު ކޮށްދިނީ ގެރިޓް ހޯލްޓްމަންއެވެ.

ދެވަނަ ހާފުގައި ބަޔާނުން ކުޅުން ރަނގަޅުކޮށް ބޯކުމްގެ ހާފަށް ނުރައްކާކުރިއިރު މެޗުގެ 75 ވަނަ މިނެޓުގައި ބަޔާނުން ވަނީ ލަނޑު ޖަހާ ފަރަގު ކުޑަކޮށްފައެވެ. މި ލަނޑު އެޓީމަށް ކާމިޔާބު ކޮށްދިނީ ވެސް ލެވަންޑޯސްކީއެވެ.

މި ނަތީޖާއާއެކު ބަޔާނުން ލީގު ތާވަލުގެ އެއްވަނައިގައި އޮތީ ކުޅުނު 22 މެޗުން 52 ޕޮއިންޓް ހޯދައިގެންނެވެ. ދެވަނައިގައި އޮތް ބޮރޫޝިއާ ޑޯޓުމުންޑަށް 21 މެޗުން ލިބިފައިވަނީ 43 ޕޮއިންޓެވެ.