ޗެމްޕިއަންސް ލީގު: ޔުނައިޓެޑް ދެވަނަ ބުރަށް، ބަސެލް ސީއެސްކޭއޭ އަތްދަށުވެއްޖެ

ޔުއެފާ ޗެމްޕިއަންސް ލީގުގެ ދެވަނަ ބުރުން މެންޗެސްޓާ ޔުނައިޓެޑް ޖާގަ ހޯދިއިރު އެފްސީ ބަސެލް ސީއެސްކޭއޭ މޮސްކޯ އަތްދަށު ވެއްޖެއެވެ.

ޗެމްޕިއަންސް ލީގުގެ ގްރޫޕް "އޭ" ގައި އަމިއްލަ ދަނޑުގައި ޕޯޗުގަލްގެ ބެންފީކާއާ ދެކޮޅަށް ކުޅުނު މެޗު ޔުނައިޓެޑުން ކާމިޔާބު ކޮށްފައި ވަނީ 2-0 ގެ ނަތީޖާ އަކުންނެވެ. ދެ ޓީމުގެ ފަރާތުން ވެސް ހަމަހަމަ ކުޅުމެއް ފެނިގެންދިޔަ މި މެޗުގައި ދެ ޓީމުން ވެސް ވަނީ ލަނޑު ޖެހުމަށް ރަނގަޅު ފުރުސަތުތަކެއް ތަނަވަސް ކޮށްފައެވެ. މި ދެ ޓީމު، މީގެ ކުރިން އޮކްޓޯބަރު މަހުގެ 18 ވަނަ ދުވަހު ކުޅުނު މެޗު ނިމިފައި ވަނީ 1-0 އިން ޔުނައެޓެޑްގެ ކޮޅަށް ބުރަ ވެގެންނެވެ.

މެޗުގެ 15 ވަނަ މިނެޓުގައި ޔުނައިޓެޑްގެ އެންތަނީ މާޝިއާލްއަށް ބެންފީކާގެ އޭރިއާ ތެރެއިން ފައުލް ކުރުމާ ގުޅިގެން ރެފްރީ ދިން ޕެނަލްޓީ މާޝިއާލް ފޮނުވާލުމުން ބެންފީކާގެ ޒުވާން ކީޕަރު މައިލް ސްލިވާ ވަނީ ދިފާއުކޮށްފައެވެ. ޔުނައިޓެޑަށް ޕެނަލްޓީ ލިބުނުތާ ތިން މިނެޓު ތެރޭ ބެންފީކާގެ ޑިއޭގޯ ގޮންކަލްވޭސް ފޮނުވާލި ހަމަލާ ޑެހޭއާ ވަނީ ދިފާއުކޮށްފައެވެ. ޔުނައިޓެޑަށް މެޗުގެ ލީޑު ލިބިގެން ދިޔައީ ފުރަތަމަ ހާފުގެ އެންމެ ފަހު މިނެޓުގައި އޭރިއާ ބޭރުން މަޓިޗް ފޮނުވާލި ބާރު ހަމަލާ ގޯލުގެ ދަނޑީގައި ޖެހުމަށް ފަހު ރީބައުންސަށް ނުކުތް ވަގުތު ބެންފީކާގެ ކީޕަރުގެ ގައިގައި ޖެހިފައި ގޯލުގެ ތެރެއަށް ވަނުމުންނެވެ.

ފުރަތަމަ ހާފު 1-0 އަކުން ޔުނައިޓެޑް ކުރީގައި އޮވެގެން ނިމިގެން ދިޔައިރު ބެންފީކާއިން ވަނީ ދެވަނަ ހާފުގައި އެ ޓީމުގެ ކުޅުން އިތުރަށް ރަނގަޅުކޮށް ލަނޑު ޖެހުމަށް ފުރުސަތު ތަނަވަސް ކޮށްފައެވެ. އެގޮތުން މެޗުގެ 66 ވަނަ މިނެޓުގައި ރައުލް ހިމެނޭޒް ފޮނުވާލި ހަމަލާ އަމާޒުވެފައި ވަނީ ޔުނައިޓެޑްގެ ގޯލުގެ ދަނޑިއަށެވެ. ޔުނައިޓެޑަށް މެޗުގައި އެ ޓީމުގެ ލީޑު ފުޅާކޮށްދިނީ ޑިފެންޑަރު ޑޭލީ ބްލިންޑްއެވެ. މި ލަނޑަކީ ބަދަލު ކުޅުންތެރިޔެއްގެ ގޮތުގައި ކުޅެންއެރި މާކަސް ރަޝްފޯޑަށް ބެންފީކާގެ ޕެނަލްޓީ އޭރިއާ ތެރެއިން ފައުލް ކުރުމާ ވިދިގެން ލިބުނު ޕެނަލްޓީއަކުން އޭނާ ކާމިޔާބުކުރި ލަނޑެކެވެ.

މި ގްރޫޕުގެ ދެވަނަ މެޗުގައި ރަޝިއާގެ ސީއެސްކޭއޭ މޮސްކޯ ވަނީ ރަށުން ބޭރުގައި ސުވިޓްޒަލޭންޑުގެ އެފްސީ ބަސެލްއާ ދެކޮޅަށް ކުޅުނު މެޗު 2-1 ގެ ނަތީޖާއަކުން ކާމިޔާބު ކޮށްފައެވެ. މި މަހުގެ 18 ވަނަ ދުވަހު މި ދެ ޓީމު ވާދަކުރި މެޗު ނިމިފައި ވަނީ 2-0 ގެ ނަތީޖާއަކުން ބަސެލްގެ މައްޗަށް ބުރަވެގެން ކަމުގައިވާއިރު މި މެޗުގެ ވެސް ފުރަތަމަ ލަނޑު ޖަހާ ލީޑު ނަގާފައި ވަނީ އެ ޓީމުންނެވެ. އެގޮތުން މުހައްމަދު އެލްޔޫނުސީ ތަނަވަސް ކޮށްދިން ފުރުސަތެއްގައި މި ލަނޑު އެ ޓީމަށް ޖަހައިދިނީ ލޫކަސް ޒުފީއެވެ.

ފުރަތަމަ ހާފު 1-0 ގެ ނަތީޖާއަކުން ބަސެލް ކުރީގައި އޮވެގެން ނިމުނުއިރު ދެވަނަ ހާފުގައި ސީއެސްކޭއޭއިން ވަނީ ދެ ލަނޑު ޖަހައި މެޗުގެ ނަތީޖާ އަނބުރާލާފައެވެ. އެގޮތުން އެ ޓީމުގެ ފުރަތަމަ ލަނޑު ބެބްރާސް ނާޗޯ ތަނަވަސް ކޮށްދިން ފުރުސަތެއްގައި އެލަން ޒަގޮއޭވް ޖަހައިދިން އިރު 79 ވަނަ މިނެޓުގައި ޕޮންޓަސް ވާންބްލޫމް ވަނީ ލަނޑެއް ޖަހައި އެ ޓީމުގެ ކޮޅަށް ނަތީޖާ އަނބުރާލަ ދީފައެވެ.

މި ގްރޫޕުގައި ހުރިހާ ޓީމެއް ވެސް ތިން މެޗު ކުޅެފައިވާއިރު ޕޮއިންޓް ތާވަލުގެ އެއްވަނައިގައި ބާރަ ޕޮއިންޓާ އެކު އޮތީ މެންޗެސްޓާ ޔުނައިޓެޑްއެވެ. ދެވަނައިގައި ހަ ޕޮއިންޓާއެކު ބަސެލް އޮތްއިރު ތިން ވަނައިގައި ހަ ޕޮއިންޓާއެކު ލަނޑުގެ ތަފާތުން އޮތީ ސީއެސްކޭއޭ މޮސްކޯއެވެ.