ހެރެތެރެއާއި ޝަންގްރިއްލާ ހުޅުވުން ލަސްވާ މައްސަލައިގައި މިނިސްޓަރ މައުސޫމްއާ ސުވާލުކުރުމަށް ތާވަލުކޮށްފި
ހެރެތެރެއާއި ޝަންގްރިއްލާ ނުހުޅުވިވާ ސަބަބާ ގުޅޭގޮތުން މިނިސްޓަރާ ސުވާލުކުރެވޭނެ
ޓޫރިޒަމް މިނިސްޓަރ ޑރ އަބްދުﷲ މައުސޫމް
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ޓޫރިޒަމް މިނިސްޓަރ ޑރ. އަބްދުﷲ މައުސޫމް އާ ސުވާލުކުރެއްވުމަށް ތާވަލުކޮށްފިއެވެ.
ހޯމަ ދުވަހު ބާއްވާ ރައްޔިތުންގެ މަޖިލީހުގެ މިދައުރުގެ 5 ވަނަ ޖަލްސާގެ އެޖެންޑާ އާންމުކޮށްފައިވާއިރު، ރިޔާސަތުން އަންގާ އެންގުމަށްފަހު ޓޫރިޒަމް މިނިސްޓަރ ޑރ. އަބްދުﷲ މައުސޫމްއާ ސުވާލުކުރުމަށް ވަނީ ތާވަލުކޮށްފައެވެ. މިނިސްޓަރ މަޖިލީހަށް ހާޒިރުކުރައްވަން ނިންމާފައިވަނީ އައްޑޫ މީދޫ ދާއިރާގެ މެމްބަރު ރޮޒޭނާ އާދަމް ކުރައްވާ ސުވާލަކަށެވެ.
މިގޮތުން ރޮޒޭނާގެ ޒުވާލު އަމާޒުކުރައްވާފައިވަނީ އައްޑޫ ސިޓީގައި އޮތް ދެ ރިޒޯޓުކަމަށްވާ ހެރެތެރެއާއި ޝަންގްރިއްލާ، ކޮވިޑް-19 ފެށުނުއިރު ބަންދުކުރިގޮތަށް މިއަދާހަމައަށްވެސް ނުހުޅުވިވާތީ އެކަމާ ބެހޭގޮތުންނެވެ. މި ދެ ރިޒޯޓު ހުޅުވޭނެ އެކި މުހުލަތުތައްވެސް މިނިސްޓްރީން ދެމުން އައިސް މިއަދާ ހަމައަށްވެސް އަދިވެސް މި ދެ ރިޒޯޓު ވަނީ ނުހުޅުވިއެވެ. އެހެންކަމުން ޝަންގްރިއްލާއާއި ހެރެތެރެ ނުހުޅުވި ލަސްވާ ސަބަބާއި، މިކަން ހައްލުކުރުމަށް ސަރުކާރުން ކުރަމުންދާ މަސައްކަތްތަކާއި އަދި މި ދެރިޒޯޓު ހުޅުވޭނެ ދުވަހަކާ ގުޅޭގޮތުން މިނިސްޓަރާ ސުވާލުކުރެއްވުމަށް ވަނީ ތާވަލުކޮށްފައެވެ.
މީގެ އިތުރުން މަހިބަދޫ ދާއިރާގެ މެމްބަރު އަހުމަދު ތާރިގު ހުށަހަޅުއްވާފައިވާ، ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީއަށް އިސްލާހު ގެނައުމުގެ ބިލުގެ އިބްތިދާއީ ބަހުސް ކުރިއަށްގެންދިއުމަށް ހޯމަ ދުވަހުގެ ޖަލްސާއަށް ވަނީ ތާވަލުކޮށްފައެވެ.
ސަރުކާރުގެ ފަރާތުން، ކަނޑިތީމު ދާއިރާގެ މެންބަރު އަބްދުﷲ ޝަހީމް އަބްދުލްހަކީމް ހުށަހަޅުއްވާފައިވާ،ދިވެހިރާއްޖޭގެ ފަނޑިޔާރުންގެ ގާނޫނަށް އިސްލާހު ގެނައުމުގެ ބިލުގެ ބަހުސްކުރިއަށް ގެންދިއުމަށް ވެސް ވަނީ ތާވަލްކޮށްފައެވެ. އަދި ސަރުކާރުގެ ފަރާތުން، މަކުނުދޫ ދާއިރާގެ މެންބަރު މުހައްމަދު ރާއީ ހުށަހަޅުއްވާފައިވާ، ނެތިދިޔުމުގެ ބިރު ހީވެފައިވާ ދިރޭ ތަކެތީގެ ބައިނަލްއަގުވާމީ ވިޔަފާރިކުރުމުގެ ބިލުގެ ބަހުސް ކުރިއަށް ގެންދިއުންވެސް ހޯމަ ދުވަހުގެ ޖަލްސާއަށް ވަނީ ތާވަލްކޮށްފައެވެ.
