ބޮޑީވޯން ކެމެރާއަކީ ރައްޔިތުންނާއި ފުލުހުންނަށްވެސް ރައްކާތެރިކަން ލިބިދޭނެ މުހިއްމު ވަސީލަތެއް: މިނިސްޓަރ

ބޮޑީވޯން ކެމެރާއަކީ ރައްޔިތުންނާއި ފުލުހުންނަށްވެސް ރައްކާތެރިކަން ލިބިދޭނެ މުހިއްމު ވަސީލަތެއްކަމަށް ހޯމް މިނިސްޓަރ ޝެއިޙް އިމްރާން އަބްދުﷲ ވިދާޅުވެއްޖެއެވެ.

ދިވެހި ފުލުހުންގެ ހިދުމަތުގައި އަލަށް ބޭނުންކުރަން ފެށު ބޮޑީވޯން ނުވަތަ ގައިގަ ހަރުކޮށްފަ ހުންނަ ކެމެރާ ބޭނުން ކުރުން ފެށުމަށް ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރ އިމްރާން ވިދާޅުވީ، މި ޕްރޮޖެކްޓަކީ މި ސަރުކާރު ވެރިކަމަށް އައިއިރު ކެމްޕޭން ދުވަސްވަރުން ފެށިގްން އެކި މަރުޙަލާތަކުގައި ސަރުކާރުން ކޮށްފައިވާ މުހިއްމު މަސައްކަތެއް ކަމަށެވެ. މިނިސްޓަރ ވިދާޅުވީ މިއީ ފުލުހުންގެ މުއައްސަސާ ރިފޯރމް ކުރުމަށް ކުރަމުންދާ މަސައްކަތްތަކުގެ ތެރެއިން އުސް ހަރުފަތަކަށް ވާސިލުވެވުނު ދުވަހެއް ކަމަށެވެ.

މިނިސްޓަރ ވިދާޅުވީ، ޒަމާނީ މުއައްސަސާއަަކަށް ފުލުހުންގެ މުއައްސަސާ ހެދުމަށްޓަކައި ކުރެވޭ އެންމެ މުހިއްމު އެއް މަސައްކަތަކީ ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމަށް ކުރާ މަސައްކަތްތައް ކަމަށެވެ. އެކަމަށް ސަރުކާރުންވެސް ޚާއްސަ އިސްކަމެއްދޭކަން ފާހަގަ ކުރައްވައި މިނިސްޓަރ ވިދާޅުވީ، 5 އަހަރުގެ ސްޓެރެޓިޖިކް ޕްލޭންގެ ތެރޭގައި ހިމަނުއްވައިގެން މިކަން ޙާސިލު ކުރުމަށް ގިނަ މަސައްކަތްތަކެއް ކޮށްފައިވާ ކަމަށެވެ.

ބޮޑީވޯން ކެމެރާގެ ސަބަބުން އެންމެ މުހިއްމު ފައިދާއެއް ކުރާނީ ރައްޔިތުންނަށްކަން ފާހަގަ ކުރައްވައި މިނިސްޓަރ އިތުރަށް ވިދާޅުވީ، އެކި ޙާލަތްތަކާއި ކުރިމަތިލާންޖެހޭ ރައްޔިތުމީހާއެކޭ އެއްގޮތަށް ފުލުސް އޮފިސަރަށްވެސް ރައްކާތެރިކަން ލިބިދޭ ކަމަށެވެ. އެގޮތުން ފުލުހުންނަށް ކުރިމަތިވާ ތުހުމަތުތަކުގެ ސާފު ޙައްލެއް މި ވަސީލަތްތަކުގެ ޒަރިއްޔާއިން ލިބިގެންދާނެކަން މިނިސްޓަރ ފާހަގަ ކުރެއްވިއެވެ. މިއީ މައްސަލައިގެ ޙަޤީޤަތް ހާމަވެ، ޒިންމާ ނަގަންޖެހޭ ފަރާތްތައް ޒިންމާދާރު ކުރެވޭނެ ވަސީލަތެއްކަން ފާހަގަ ކުރައްވައި މިނިސްޓަރ ވަނީ މި ވަސީލަތްތައް އިތުރަށް ފުޅާކުރަންވެސް ޖެހޭކަމަށް ވިދާޅުވެފައެވެ.

މިނިސްޓަރ ވަނީ ކޮވިޑުގެ ބަލިމަޑުކަމުގެ ތެރެއިން ސަރުކާރުން މިފަދަ މަސައްކަތެއް ފެށުމަށް ނިންމި ނިންމުމަކީ ހިތްވަރުގަދަ ފިޔަވަޅެއްކަމަށް ވިދާޅުވެފައެވެ. މިއީ ދައުލަތުން ކުރި މުހިއްމު ހޭދައެއްކަމަށްވެސް ވިދާޅުވިއެވެ.

ފުލުހުންގެ ތެރެއިން ރައްޔިތުންނަށް ދެމުންދާ ޚިދުމަތްތައް އިތުރަށް ފުރިހަމަ ކުރުމަށްޓަކައި ފުލުހުންނަށް ދެވޭ ތަމްރީނުތައް ހަރުދަނާ ކުރުމަށްވެސް ޚާއްސަ މަސައްކަތްތަކެއް ކުރެވެމުންދާކަމަށް މިނިސްޓަރ ވިދާޅުވިއެވެ. ދާދި ފަހުންވެސް އެފަދަ މުހިއްމު ތަމްރީނުތައް ކުރިއަށް ގެންދެވިފައިވާކަން މިނިސްޓަރ ފާހަގަ ކުރެއްވިއެވެ.