"ފުރުޓް ފްލައި" ގެ މައްސަލަ ހައްލުކުރުމުގެ މަސައްކަތް ކުޅުދުއްފުށީގައި ފަށައިފި

ކުޅުދުއްފުށި ސިޓީ ކައުންސިލާއި މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ ގުޅިގެން އެސިޓީގެ އަނބު ގަސްތަކަށް ދިމާވެފައިވާ "ފުރުޓް ފްލައި" ގެ މައްސަލަ ހައްލުކުރުމަށް މަސައްކަތް ފަށައިފިއެވެ.

ކުޅުދުއްފުށި ސިޓީ ކައުންސިލުން މައުލޫމާތު ދެއްވިގޮތުގައި، އެ ސިޓީގެ އަނބު ގަސްތަކަށް ދިމާވެފައިވާ ފުރުޓް ފްލައިގެ މައްސަލަ އާއި ގުޅޭ މަޢުލޫމާތު ދިނުމުގެ ސެޝަންއާއި، ގުޅުވާލައިގެން ފްރުޓް ފްލައި ކޮންޓްރޯލް ކުރުމަށްޓަކައި ދަންތުރަ ހަރުކުރުމުގެ ޢަމަލީ މަސައްކަތް އެސިޓީގެ ބައެއް ގޭގެއަށް ގޮސް ކުރިއަށް ގެންގޮސްފައިވާކަމަށެވެ.

މިކަމާއި ގުޅޭގޮތުން ފިޝަރީޒް މިނިސްޓްރީގެ ޑިރެކްޓަރު އަލީ އާމިރު ވިދާޅުވީ، އަނބު ތެރެއަށް ބިސް އަޅާ އާލާކުރާ މި ފުރުޓް ފްލައި އަކީ ވަރަށް އަވަހަށް ފެތުރިގެންދާ އެއްޗެއްކަމަށެވެ. އަދި އެކަމުގެ ސަބަބުން އަނބު ފީވެ ހަލާކުވެފައިވާ ގޮތަށް ފެންނަން ފަށައެވެ. އެހެންކަމުން މިކަމަށް ބޭނުންކުރާ ދަންތުރަ އަނބު މޫސުން ފެށިގެން ގޮސް ނިމެންދެން ބޭނުން ކުރަން ޖެހޭނެ ކަމަށް އާމިރު ވިދާޅުވިއެވެ.

އާމިރު ވިދާޅުވެފައިވާ ގޮތުގައި މައުލޫމާތު ދިނުމުގެ ޕްރޮގްރާމްގައި ފްރުުޓް ފްލައި ކޮންޓްރޯލް ކުރާނެ ގޮތް ކިޔާދީފައިވާނެއެވެ. އަދި މި ފްލައި ކޮންޓްރޯލް ކުރުމަށް ބޭނުން ކުރާ ބައެއް ސާމާނުވެސް މި ސެޝަންގެ ތެރެއިން ވަނީ ދައްކާލާފައެވެ.

2016 ވަނަ އަރު ށ. ފީވަކުގައިވެސް ފުރުޓް ފުލައި ކޮންޓްރޯލް ކުރުމުގެ މަސައްކަތް ކާމިޔާބުކަމާއެކު ވަނީ ކޮށްފައެވެ.