ދިގު މުއްދަތަކަށް ޕެރެސެޓަމޯލު ބޭނުންކުރާ މީހުން، ހާރޓް އެޓޭކާއި ސްޓްރޯކަށް ހުށަހެޅުމުގެ ފުރުސަތު ބޮޑު

މިފަހަކަށް އައިސް ކުއްލި ކުއްލިއަށް ހާރޓް އެޓޭކާއި، ސްޓްރޯކް ޖެހިގެން މުޅި ދުނިޔެއިން ރިޕޯޓްކުރާ ކޭސްތައް ދަނީ ވަރަށް ބޮޑަށް އިތުރުވަމުންނެވެ. މީގެ ކުރިން ހާރޓް އެޓޭކާއި ސްޓްރޯކަކީ އުމުރުން 40 އަހަރުން މަތީގެ މީހުންނަށް ކުރިމަތިލާންޖެހޭ ކަމެއްގެ ގޮތުގައި ވަނީ ސިފަކުރެވިފައެވެ. އެހެންނަމަވެސް ފާއިތުވި އަހަރުތަކުގެތެރޭގައި މިކަން ވަނީ ވަރަށް ބޮޑަށް ބަދަލުވެފައެވެ. މިހާރު ހާރޓް އެޓޭކާއި ސްޓްރޯކް ޖެހޭ މީހުންގެ ތެރޭގައި ވިހީގެ އަހަރުތަކުގެ ތެރޭގައި އުޅޭ ޒުވާނުންވެސް ހިމެނެއެވެ. މިގޮތުން ކޮންމެ 5 ހާރޓް އެޓޭކަކުން އެއް ހާރޓް އެޓޭކަކީ 20 އަހަރާއި 30 އަހަރުގެ މީހަކަށް ޖެހޭ ހާރޓް އެޓޭކެއްގެ ގޮތުގައި ވަނީ ރެކޯޑުކުރެވިފައެވެ.

މިކަން މިގޮތަށް ބަދަލުވުމުގެ ފަހަތުގައި ވަރަށް ގިނަ ސަބަބުތައް ވެއެވެ. ފުރަތަމަ ކަމެއްގެ ގޮތުން އާންމު ގޮތެއްގައި ހާރޓް އެޓޭކް ޖެހޭ ސަބަބުތަކަކީ, ހަކަރު ބައްޔާއި، މާ ބޮޑަށް ފަލަވެ ބަރުދަން އިތުރުވުމާއި، ލޭގެ ޕްރެޝަރު މަތިވުމާއި، ހަށިގަނޑަށް ގެއްލުންވާފަދަ ކެއުންތައް ބޭނުންކުރުމާއި، ހެލިފެލިވެ ނޫޅުން ފަދަ ކަންކަމެވެ. އެހެންނަމަވެސް ހާރޓް އެޓޭކްތައް ޖެހެނީ ހަމައެކަނި މި ސަބަބާހުރެ ނޫންކަމަށް އެކި ފަރާތްތަކުން މިހާތަނަށް ހަދާފައިވާ ދިރާސާތަކުން ދައްކައެވެ. މިގޮތުން ކާލެވޭ ބޭހެއްގެ ސަބަބުންވެސް ހާރޓް އެޓޭކެއް ޖެހުމަށް މަގުފަހިވެގެންދެއެވެ.

މިގޮތުން ތަނަކަށް ތަދުވެ ހުން އައިސް ކަމެއް ވާނަމަ އެންމެ ފަސޭހައިން ކާލެވޭ އެއް ބޭހަކީ ޕެރެސެޓަމޯލްއެވެ. ގިނަ ފަހަރަށް ޕެރެސެޓަމޯލް ކެވެނީ ޑޮކްޓަރެއްގެ ލަފާ މިކަމުގައި ހޯދައިގެންނެއް ނޫނެވެ. މިގޮތުން ޔުނިވަރސިޓީ އޮފް އެޑިންބަރގްއިން ހަދާފައިވާ ދިރާސާއަކުން ދައްކާފައިވާ ގޮތުގައި, ޕެރެސެޓްމޯލް ކެއުމުން ހާރޓް އެޓޭކެއް ނުވަތަ ސްޓްރޯކެއް ޖެހުމުގެ ނުރައްކާ ބޮޑީ ލޭގެ ޕްރެޝަރު މަތި މީހުންނަށެވެ. އެހެންނަމަވެސް މިކަމުގެ ނުރައްކާ ބޮޑުވެގެންދަނީ ދިގު މުއްދަތަކަށް ޕެރެސެޓަމޯލް ބޭނުންކުރާ ނަމައެވެ.

މި ދިރާސާގައި 110 ވޮލެންޓިއަރުން ވަނީ ބައިވެރިވެފައެވެ. މީގެ ތެރެއިން ތިން ބައިކުޅަ ދެބައި މީހުންނަކީ ލޭގެ ޕްރެޝަރު ދަށްކުރުމަށް ބޭސް ކާ މީހުންނެވެ. އެމީހުން ވަނީ ދެ ހަފުތާ ވަންދެން 1 ގްރާމްގެ ޕެރެސެޓަމޯލް ކޮންމެ ދުވަހަކު 4 ފަހަރު ކައިފައެވެ. ދިރާސާގައި ބައިވެރިވި މީހުންގެ ތެރެއިން ހަށިގަނޑުގެ އެކި ތަންތަނަށް ތަދުވާ މީހުންނަށްވެސް މި ޑޯޒް ދީފައިވާއިރު، ދެ ހަފްތާ ފަހުން އިތުރު ދެ ހަފްތާ ވަންދެން "އިންއެކްޓިވް ޑްރަގް"އެއް ދީފައިވެއެވެ.

އެޑިންބަރގްގެ ކްލިނިކަލް ފަރމަކޮލޮޖިސްޓެއް ކަމަށްވާ ޕްރޮފެސަރ ޖޭމްސް ޑިއަރ ބުނީ މި ދިރާސާއިން ހާމަވި އެއް ކަމަކީ ދިގު މުއްދަތަށް ޕެރެސެޓަމޯލް ބޭނުންކުރާނަމަ އެއިން ލޭގެ ޕްރެޝަރު މަތިކޮށްދޭކަން ކަމަށެވެ. އަދި ލޭގެ ޕްރެޝަރު މަތިވުމަކީ ހާރޓް އެޓޭކް އަދި ސްޓްރޯކް ޖެހުމަށް ވަރަށް ބޮޑަށް މަގުފަހިކޮށްދޭ ކަމެކެވެ. އެހެންކަމުން މި ދިރާސާގައި ބައިވެރިވި އެކްސްޕަރޓުން ވަނީ ބަލި މީހުންނަށް ޕެރެސެޓްމޯލް ދޭނަމަ ޑޯޒް ދަށްކޮށް ދިނުމަށް އިރުޝާދު ދީފައެވެ. އަދި ލޭގެ ޕްރެޝަރު މަތި މީހުންނަށް ޚާއްސަ ސަމާލުކަމެއް ދިނުމަށް ވަނީ އިރުޝާދު ދީފައެވެ. ލޭގެ ފްރެޝަރު މަތި މީހުން ޕެރެސެޓަމޯލް ބޭނުންކުރުން ރައްކާތެރި ނޫން ނަމަވެސް އެމީހުންނަށް ޕެއިން ކިލަރ ނެގުން ރައްކާތެރިކަމަށްވެސް ބުނެފައިވެއެވެ.

މި ދިރާސާއިން މިކަމަށް އިތުރަށް ސަމާލުކަން ދޭންޖެހޭކަން ވަނީ ހާމަވެގެން ގޮސްފައެވެ. ވަކިން ޚާއްސަކޮށް ލޭގެ ޕްރެޝަރު މަތި މީހުން މިކަމަށް ސަމާލުކަން ދޭންޖެހޭ މިންވަރު ބޮޑެވެ. ތަނަކަށް ތަދުވެ ހުން އައުން ފަދަ ކަންކަން ދިމާވާނަމަ ޑޮކްޓަރެއްގެ ލަފާ ހޯދުން މުހިންމެވެ. އަދި ޑޮކްޓަރުގެ އިރުޝާދުގެ މަތިން ބޭހެއް ބޭނުންކުރުން ބުއްދިވެރިއެވެ. މި ދިރާސާއިންވެސް އެނގުނު ގޮތުގައި ޕެރެސެޓްމޯލްއިން ލޭގެ ޕްރެޝަރު ވަރަށް ބޮޑަށް މަތިކޮށްދެއެވެ. އަދި މިއީ ހާރޓް އެޓޭކާއި ސްޓްރޯކަށް ހުށަހެޅޭނެ ކަމެކެވެ.