ހުކުރު ދުވަހުގެ ހެނދުނު މާލޭގެ ބައެއް ސަރަހައްދުތަކުން ކަރަންޓް ކަނޑައިގެންދިޔުން އެކަށީގެންވޭ: ސްޓެލްކޯ

ހުކުރު ދުވަހުގެ ހެނދުނު 7:00 އިން 9:00 އަށް މާލޭގެ ބައެއް ސަރަހައްދުތަކުން ކަރަންޓް ކަނޑާލަންޖެހިދާނެ ކަމަށް ސްޓެލްކޯއިން ބުނެފިއެވެ.

ސްޓެލްކޯއިން ބުނީ އައިޖީއެމް ހޮސްޕިޓަލާއި، ދިވެހިރާއްޖޭގެ އަޑު ހިމެނޭ ސަރަހައްދުން ކަރަންޓު ކަނޑާލަން ޖެހުމަކީ އެކަށީގެންވާކަމެއް ކަމަށެވެ. ކަރަންޓް ކަނޑާލަންޖެހެނީ ސްޓެލްކޯއިން ކޮންމެހެން ކުރަންޖެހޭ މަސައްކަތެއް ކުރުމަށްކަމަށް އެކުންފުނިން ބުނެއެވެ.

މިގަޑިތައް ކަރަންޓް ކަނޑާލަން ޖެހުނުނަމަވެސް، މަސައްކަތް ނިމުނުހާ އަވަހަކަށް އަލުން ކަރަންޓު ދެވިގެންދާނެ ކަމަށް އެކުންފުނިން ބުނެއެވެ.

ކުންފުނިން ކޮންމެހެން ކުރަންޖެހޭ މަސައްކަތެއް ކުރުމަށް ސްޓެލްކޯއިން އަންނަނީ މާލޭގެ އެކި ސަރަހައްދުތަކުން އެކި ގަޑިތަކުގައި ކަރަންޓް ކަނޑާލަމުންނެވެ. ކަރަންޓް ކަނޑާލާނެކަން ދުރާލާ އަންގަމުންދިޔަނަމަވެސް މީގެކުރިން މާލެ ސަރަހައްދުން ކަރަންޓް ކަނޑައިގެން ދިޔުމުގެ މައްސަލަތަކާއި، މުޅި މާލެއިންވެސް ކަރަންޓް ކަނޑައިގެން ދިޔުމުގެ މައްސަލައާ ވަނީ ކުރިމަތިވެފައެވެ.

ކަރަންޓް ސިސްޓަމްތަކުގެ ޓެސްޓުތަކެއް މިދިޔަ އަހަރު ސްޓެލްކޯއިން ކާމިޔާބުކަމާއެކު ނިންމާލާފައިވާކަމަށް އެކުންފުނިން ބުނެފައިވެއެވެ. އަދި ސިސްޓަމްތައް އަދާހަމަ ކުރުމަށް އަބަދުވެސް ގެންދަނީ މަސައްކަތް ކުރަމުންކަމަށް ސްޓެލްކޯއިން ބުނެއެވެ.