ކުޅުދުއްފުށި ސިޓީގައި ހަލުވިކަމާއެކު ކޮވިޑް ފެތުރެމުން އެބަދެއެވެ.

ކުޅުދުއްފުށީ ރީޖަނަލް ހޮސްޕިޓަލުން މައުލޫމާތު ދިންގޮތުގައި އެސިޓީން އާދީއްތަ ދުވަހު އިތުރު 75 ސާމްޕަލް ޕޮޒިޓިވްވެ، އެ ސިޓީގެ އެކްޓިވް ކޭހުގެ އަދަދު 572 އަށް ވަނީ އަރާފައެވެ. އަދި 13 މީހުން ބަލިން ރަނގަޅުވެފައި ވާކަމަށް އެހޮސްޕިޓަލުން މައުލޫމާތު ދެއެވެ.

އާދީއްތަ ދުވަހު ޕޮޒިޓިވްވެފައިވަނީ ކޮންޓެކްޓް ޓްރޭސިންގެ ތެރެއިން ފާހަގަވި 28 ފަރާތަކާއި، ފުލޫ ކްލިނިކަށް ދެއްކި 45 މީހެއްގެ އިތުރުން 2 ރޭންޑަމް ސާމްޕަލެކެވެ.

މިދިޔަ ޑިސެންބަރު މަހުން 20 ވަނަ ދުވަހުން ފެށިގެން ކުޅުދުއްފުށީގައި ކޮވިޑް ކޭސްތައް އަނެއްކާވެސް އިތުރުވަމުން އަންނަ އިރު މިއީ ކޮވިޑް ކޭސްތައް އެންމެގިނަވި ފަހަރެވެ. ފިޔަވަޅުތަކަށް ދިން ލުއިތަކާއެކު ކޮވިޑުގެ ހާލަތުވަނީ ކޮންޓްރޯލް ނުވެ އިންތިހާއަށް ފެތުރިފަ އެވެ.

އެކްޓިވް ކޭސްތަކުގެ ގޮތުގައި މިވަގުތު ތިބީ ފުލޫ އޯޕީޑީއަށް ދެއްކި 305 ފަރާތަކާއި ކޮންޓެކްޓް ޓްރޭސިންގެ ތެރެއިން ފާހަގަވި 245 ފަރާތެއްގެ އިތުރުން ރޭންޑަމްކޮށް ނެގި ސާމްޕަލްތަކުން ޕޮޒިޓިވްވި 21 މީހަކާއި ޑިޕާޗާ ސާމްޕަލެކެވެ.

ކޭސްތައް ފެނި ރަށް މޮނީޓަރިންގައި އޮތްނަމަވެސް މިފަހަރު ވަނީ އަޅާފައިވާ ފިޔަވަޅުތަކަށް ވަރަށް ބޮޑެތި ލުއިތަކެއް ދީފައެވެ. އެގޮތުން ގޭގެ ވަކި ކޮޓަރިއެއްގައި ކަރަންޓީނު ވެވޭނެ ގޮތަށް ނިންމާ ގޭގެ ބޭރުގައި ނޯޓިސް ތަތް ކުރުން ވެސް ހުއްޓާލުމަށް އެންމެ ފަހުން ބޭއްވި ޓާސްކްފޯސް ބައްދަލުވުމުގައި ވަނީ ނިންމާފައެވެ.