ކްރިމިނަލް ކޯޓުގެ ފަނޑިޔާރުންނާއި އާއިލާއަށް އިންޒާރުތައް ލިބޭތީ ސެކިއުރިޓީ ދިނުމަށް މެމްބަރު ސިރާޖު ގޮވާލައްވައިފި
7 ފެބުރުއަރީ 2022 | ހޯމަ 07:07ފަނޑިޔާރުންނަށް ލިބޭ މުސާރައަކީ އެންމެ އެކަށީގެންވާ އަދަދުތަކެއްކަން ޤަބޫލު ނުކުރައްވާ
ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖު- ސިރާޖު ވަނީ ފަނޑިޔާރުންނަށް ލިބޭ މުސާރައަކީ އެންމެ އެކަށީގެންވާ އަދަދުތަކެއްކަން ޤަބޫލު ނުކުރެއްވާކަމަށްވެސް ވިދާޅުވެފައި
ކްރިމިނަލް ކޯޓުގެ ފަނޑިޔާރުންނާއި އާއިލާއަށް އިންޒާރުތައް ލިބޭތީ ސެކިއުރިޓީ ދިނުމަށް ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖު ގޮވާލައްވައިފިއެވެ.
ސިރާޖު އެހެން ވިދާޅުވީ ފަނޑިޔާރުންގެ ޤާނޫނަށް އިސްލާޙު ގެނައުމުގެ ބިލާއި ގުޅޭގޮތުން ބަހުސް ކުރައްވަމުން ދެއްކެވި ވާހަކަފުޅުގައެވެ.
ސިރާޖު ވިދާޅުވީ، ކްރިމިނަލް ކޯޓުގެ ފަނޑިޔާރުންނަށް ބޮޑެތި އިންޒާރުތައް ލިބެމުންދާކަމުގެ ޝަކުވާ ލިބެމުންދާ ކަމަށެވެ. ވަކިން ޚާއްސަކޮށް ކްރިމިނަލް ކޯޓުގެ ފަނޑިޔާރުންގެ އަނބިދަރިންނާއި އާއިލާއަށް އެކި ކަހަލަ އިންޒާރުތައް ލިބެމުންދާކަމުގެ ޝަކުވާތައް ސަމާލުކަމަށް އައިސްފައިވާކަން މެމްބަރު ސިރާޖު ފާހަގަ ކުރެއްވިއެވެ.
ސިރާޖު ވަނީ ވަކިން ޚާއްސަކޮށް ކްރިމިނަލް ކޯޓުން ޖިނާއީ ބޮޑެތި މައްސަލަތައް ބަލަމުންދާއިރު، އެ ކޯޓުގެ ފަނޑިޔާރުންނަށް ސެކިއުރިޓީ ދޭންޖެހޭކަމަށް ވިދާޅުވެފައެވެ. އެކަންކަން ޙައްލު ކުރުމަށް ކުރަންޖެހޭ ކަންކަން މަޖިލީހުންވެސް ކުރަންޖެހޭކަމަށް މެމްބަރު ވިދާޅުވިއެވެ.
ސިރާޖު ވަނީ ފަނޑިޔާރުންނަށް ލިބޭ މުސާރައަކީ އެންމެ އެކަށީގެންވާ އަދަދުތަކެއްކަން ޤަބޫލު ނުކުރައްވާކަމަށްވެސް ވިދާޅުވެފައެވެ. އަދި މިހާރަށްވުރެ ފަނޑިޔާރުންގެ މުސާރަ ބޮޑުވާން ޖެހޭކަން ފާހަގަކުރައްވައި ސިރާޖު ވިދާޅުވީ، ރާއްޖެއަށް އައިސްފައިވާ ބަދަލުތަކާއެކު ފަނޑިޔާރުންގެ މުސާރައަށްވެސް އެކަށޭނަ ބަދަލުތަކެއް އަންނަންޖެހޭ ކަމަށެވެ.
ކްރިމިނަލް ކޯޓުން ބަލަނީ ޖިނާއީ މައްސަލަތަކެވެ. އެ މައްސަލަތަކާއި ގުޅިގެން ކޯޓުގައި ކުރިއަށްދާ ޝަރީއަތްތަކާއި ގުޅިގެން އެކި ގާޒީންނަށް އިންޒާރު ދިނުމާއި، ބިރު ދެއްކުމަކީ މީގެ ކުރިންވެސް ހިނގާފައިވާ ކަންކަމެވެ. އެގޮތުން ކްރިމިނަލް ކޯޓު ހިންގެވުމާއި ކުރިން ޙަވާލުވެހުންނެވި މިހާރުގެ ސުޕްރީމް ކޯޓުގެ ފަނޑިޔާރު އަލްއުސްތާޛު ޢަލީ ރަޝީދު ދިރިއުޅުއްވާ ފްލެޓްގެ ބޭރު ދޮރަށް ކޯރާޑިއަކުން ގެއްލުންދިން މައްސަލައެއްވެސް ފެންމަތިވެފައިވެއެވެ. އެއީ ކުރީގެ ރައީސް އަބްދުﷲ ޔާމީނުގެ މައްޗަށް ކޮށްފައިވާ މަނީ ލޯންޑަރިންގ ގެ ދައުވާތަކުގެ ޝަރީއަތާ ގާޒީ އަލީ ރަޝީދު ޙަވާލުވެވަޑައިގެންނެވުމާއެކުއެވެ.
ދޮރަށް ގެއްލުން ދޭން ބޭނުންކުރި ކޯރާޑި ވެސް އެޕާޓްމެންޓުގެ ދޮރުމަތީގައި ބާއްވާފައި އޮތް ކަަމަށް ފުލުހުން އެ މައްސަލައާއި ގުޅިގެން އޭރު ބުނެފައިވެއެވެ.
ފަނޑިޔާރުންގެ ޤާނޫނު ބުނާގޮތުން އުއްތަމަ ފަނޑިޔާރަށް ދޭންޖެހޭ ހިމާޔަތާއި ރައްކާތެރިކަން އެމްއެންޑީއެފުން ހަމަޖައްސައިދޭން ޖެހެއެވެ.
އޭގެ އިތުރުން، އުއްތަމަފަނޑިޔާރު ފިޔަވައި އެހެން ފަނޑިޔާރުންނަށް ސަލާމަތާއި ރައްކާތެރިކަން ފޯރުކޮށްދިނުމުގެ އުސޫލުތަކެއް ދައުލަތުގެ ސަލާމަތީ ބާރުތަކުން އެކަށައަޅައި، އެ އުސޫލުގެ މަތިން ސެކިއުރިޓީގެ ކަންކަން ފޯރުކޮށްދޭންޖެހޭކަން ބަޔާންކޮށްފައިވެއެވެ.
ފަނޑިޔާރުންގެ ޤާނޫނު ބުނާ ގޮތުން މި އުސޫލުތައް ކަނޑައެޅުމުގައި ފަނޑިޔާރުންނާމެދު އާންމު ވިސްނުން ހުރި ގޮތާއި، ބަލަމުންދާ މައްސަލައަކާއި ގުޅިގެން ނުރައްކާތެރިކަމަށް ހުށައެޅޭނެ މިންވަރުގެ އިތުރުން، އާންމު މަސްރަހު ޤައުމުގައި އޮތް ގޮތް ފަދަ ކަންކަމަށް ރިއާޔަތްކުރަން ޖެހެއެވެ.
