ހދ. އަތޮޅު ތައުލީމީ މަރުކަޒުގައި ކިޔަވައިދެމުން އަންނަ ގިނަ ޓީޗަރުންތަކެއް ކޮވިޑް-19 އަށް ޕޮޒިޓިވްވުމާއި ގުޅިގެން އެ ސްކޫލުގެ ބައެއް ގްރޭޑްތަކުގެ ކިޔެވުން މެދުކަނޑާލައިފި އެވެ.
ހޯމަ ދުވަހުން ފެށިގެން ވަކި ގޮތެއް އަންގަންދެން ކިޔެވުން މެދުކަނޑާލާފައިވަނީ އެސްކޫލުގެ ގްރޭޑް 1 ން 6 ގެ ދަރިވަރުންގެ އިތުރުން ސަންޝައިން އަދި ފައުންޑޭޝަން ގުރޭޑް ތަކަށެވެ.
ހދ. އަތޮޅު ތައުލީމީ މަރުކަޒުން މައުލޫމާތުދިން ގޮތުގައި ކިޔެވުން މެދުކަނޑާލަން ޖެހުނީ ގިނަ ޓީޗަރުންތަކެއް ކޮވިޑް-19 އަށް ޕޮޒިޓިވްވެ ކަރަންޓީނުވާން ޖެހުމާއި ގުޅިގެންނެވެ. މިހާރު ކުޅުދުއްފުށީގައި ހަލުވިކަމާއެކު ކޮވިޑް ފެތުރެމުން އަންނައިރު ބަލިޖެހިފައިވާ 510 މީހުން އެބަ ތިއްބެވެ.
ކޭސްތައް ފެނި ރަށް މޮނީޓަރިންގގައި އޮތް ނަމަވެސް މިފަހަރު ވަނީ އަޅާފައިވާ ފިޔަވަޅުތަކަށް ވަރަށް ބޮޑެތި ލުއިތަކެއް ދީފައެވެ. މިއާއެކު ރައްކާތެރިކަމުގެ ގޮތުން ފަރުދީ ޒިންމާ އަދާކޮށް ރައްކާތެރިވުމަށް ވަނީ އިލްތިމާސްކޮށްފަ އެވެ.
