ޖަރުމަނުވިލާތް އޮތީ ރާއްޖެއަށް ޑިމޮކްރަސީ އަނބުރާ ގެނައުމަށް އެހީވުމަށް: ޝާހިދު

ޖަރުމަނުވިލާތް އޮތީ ރާއްޖެއަށް ޑިމޮކްރަސީ އަނބުރާ ގެނައުމަށް ހުރިހާ ގޮތަކުން އެހީވުމަށް ކަމަށް، މިހާރު އެ ގައުމަށް ވަޑައިގެން އުޅުއްވާ ގުޅިފައިވާ އިއްތިހާދުގެ ވަފުދުގައި ހިމެނިވަޑައިގަންނަވާ ރައްޔިތުންގެ މަޖިލީހުގެ ކުރީގެ ރައީސް އަބްދުﷲ ޝާހިދު ވިދާޅުވެއްޖެ އެވެ.

މިހާރު އޮތް މަޖިލީހުގެ ހެންވޭރު އުތުރު ދާއިރާގެ މެމްބަރު ޝާހިދު ވިދާޅުވީ އިދިކޮޅު އިއްތިހާދުން ޖަރުމަން ޕާލިމެންޓްގެ ސައުތު އޭޝިއާ ގްރޫޕްގެ މެމްބަރުންނާއި ފޮރިން މިނިސްޓްރީގެ ބޭފުޅުނާއި ޖަރުމަނުގެ ސިޔާސަތުތައް ކަނޑައެޅުމުގައި ޕާލިމެންޓަށް އެހީތެރިވެދޭ ފަރާތްތަކާއި ޗާންސެލާރުގެ ކެބިނެޓްގެ ސެކްރެޓެރީއާ ބައްދަލުކުރައްވައި ރާއްޖޭގެ ހާލަތު ހިއްސާކުރެއްވި ކަމަށެވެ.

"އަޅުގަނޑުމެން ކިޔައި ދިނިން ރާއްޖޭގެ ޑިމޮރަސީ މަރާލުމަށް ސަރުކާރުން އަޅާ ފިޔަވަޅު، ސިޔާސީ ވެރިން ހައްޔަރުކޮށް ނުހައްގުން ފިޔަވަޅު، މިނިވަން މުއައްސަސާތަކުގެ މުސްތަގިއްލު ކަމެއް ނެތް ވާހަކަ އަދި ރައްޔިތުންގެ މަޖިލީހުގެ ބާރު ކަނޑުވާލާފައިވާ ވާހަކަ،" ޝާހިދު ވިދާޅުވި އެވެ.

ކުރިން ފޮރިން މިނިސްޓަރުކަން ވެސް ކުރައްވާފައިވާ ޝާހިދު ވިދާޅުވީ ޖަރުމަނު އޮތީ ދިވެހިރައްޔިތުންނާ އެކުގައި ކަމަށެވެ.

"އެ ބޭފުޅުން ވެސް ވަރަށް ބޮޑަށް ކަންބޮޑުވޭ ރާއްޖޭގެ ހާލަތާމެދު. ޖަރުމަނުން އަޅުގަނޑުމެން ބައްދަލުކުރި ހުރިހާ ފަރާތްތަކަކުން ވެސް ޔަގީންކަން ދެއްވި ރާއްޖެއަށް ޑިމޮކްރަސީ އަނބުރާ ގެނައުމަށް ހުރިހާ ގޮތަކުން އެއްބާރުލުންދީ އެހީތެރިވެދޭނެ ކަމަށް. އީޔޫގެ ތެރެއިން ވެސް މަސައްކަތް ކޮށްދޭނެ ކަމަށް،" ޝާހިދު ވިދާޅުވި އެވެ.