ކުޅުދުއްފުށީގެ އެކްޓިވް ކޭހުގެ އަދަދު 500ން މައްޗަށް
މިވަގުތު ކުޅުދުއްފުށި ސިޓީގެ އެކްޓިވް ކޭހުގެ އަދަދަކީ 510
ކުޅުދުއްފުށި ސިޓީ
ކުޅުދުއްފުށި ސިޓީން އިތުރު 68 މީހަކު ކޮވިޑްއަށް ޕޮޒިޓިވްވެ، އެކްޓިވް ކޭހުގެ އަދަދު 510އަށް އަރައިފިއެވެ.
އެ ސިޓީއިން ހޮނިހިރު ދުވަހު 68 މީހުން ޕޮޒިޓިވްވެފައިވާއިރު، 40 މީހުން ވަނީ ބަލިން ރަނގަޅުވެފައެވެ. އެ ސިޓީގައި މިހާރު އެކްޓިވް ކޭހުގެ ގޮތުގައި ތިބީ ބަލީގެ އަލާމާތްތައް ހުރެގެން ފްލޫ ކްލިނިކަށް ދެއްކި 266 މީހުންނާއި، ކޮންޓެކްޓް ޓްރޭސިންގގެ ގޮތުގައި ފާހަގަކުރެވުނު 219 މީހުންގެ އިތުރުން 24 ރެންޑަމް ސާމްޕަލްއާއި، ރާއްޖެއިން ބޭރަށް ފުރުމަށްޓަކައި ނެގި ސާމްޕަލެއްކަމަށް ކުޅުދުއްފުށީ ރީޖަނަލް ހޮސްޕިޓަލުން މައުލޫމާތުދެއެވެ.
ކުޅުދުއްފުށި ސިޓީން ހުކުރު ދުވަހު ވެސް ވަނީ 34 މީހުން ކޮވިޑްއަށް ޕޮޒިޓިވްވެފައެވެ.
ކުޅުދުއްފުށި ސިޓީ މޮނީޓަރިންގައި އޮތްނަމަވެސް މިފަހަރު ވަނީ އަޅާފައިވާ ފިޔަވަޅުތަކަށް ވަރަށް ބޮޑެތި ލުއިތަކެއް ދީފައެވެ. އެގޮތުން ގޭގެ ވަކި ކޮޓަރިއެއްގައި ކަރަންޓީނު ވެވޭނެ ގޮތަށް ނިންމައި, ގޭގެ ބޭރުގައި ނޯޓިސް ތަތްކުރުން ވެސް ހުއްޓާލުމަށް އެންމެ ފަހުން ބޭއްވި ޓާސްކްފޯސް ބައްދަލުވުމުގައި ވަނީ ނިންމާފައެވެ.
މީގެ އިތުރުން, ޕޮޒިޓިވްވާ މީހާއަށް ޕޮޒިޓިވްވީކަން ޕަބްލިކް ހެލްތުން އެންގި ނަމަވެސް ކޮންޓެކްޓް ޓްރޭސިން ހެދުމަކަށް ނުގުޅާނެއެވެ. އެމީހަކު ކަރަންޓީންވުމާއި، ކޮންޓެކްޓުންގެ މައުލޫމާތު ޕަބްލިކް ހެލްތަށް އެންގުމަކީ އެ މީހެއްގެ އަމިއްލަ ޒިންމާއެކެވެ. އަދި ކޮންޓެކްޓުން ހޮސްޕިޓަލަށް ގޮސް ޓެސްޓްކުރުމަކީވެސް އެމީހުންގެ އަމިއްލަ ޒިންމާއެކެވެ.
