''އަތޮޅުތެރޭގައި އެކަހެރިވެ، އެކަނިވެރިވެފައި ތިބުން ނޫންގޮތެއް ނެތްކަމުގެ އިޙްސާސުން އެރައްޔިތުން އެދަނީ ވީއްލެމުން''

މި ސަރުކާރުގެ ސިޔާސަތާއެކު އަތޮޅުތެރޭގައި އެކަހެރިވެ އެކަނިވެރިވެފައި ތިބުން ނޫންގޮތެއް ނެތްކަމުގެ އިޙްސާސުން ރައްޔިތުން ދަނީ ވީއްލެމުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙު ވިދާޅުވެއްޖެއެވެ.

ބުރާސްފަތި ދުވަހުގެ ރައްޔިތުންގެ މަޖިލީހުގެ ޖަލްސާގައި ރިޔާސީ ބަޔާން އިއްވަވަމުން ރައީސް ސާލިހު ވިދާޅުވީ ރާއްޖެ ބަދަލުވެދިޔަ ސިޔާސީ ބޮޑު ބަދަލުން ރައްޔިތުންނަށް ލިބޭ މަންފާ ކުރިއަށްވުރެ މިހާރު ބޮޑު ކަމަށެވެ ޚާއްސަކޮށް، އަތޮޅުތެރޭގައި އެކަހެރިވެ، އެކަނިވެރިވެފައި ތިބުން ނޫންގޮތެއް ނެތްކަމުގެ އިޙްސާސުން އެ ރައްޔިތުން ދަނީ ވީއްލެމުން ކަމަށެވެ. ސަރުކާރުގެ މިއަދުގެ ވިސްނުމަކީ، ސަރުކާރުން ހިންގާ މަޝްރޫއުތައް އެއީ ހަމައެކަނި ދިރިތިބުމަށް ކުރާ ކަންކަމުގެ އިތުރަށް، ދިރިއުޅުމުގެ މަގުކޮށައި އަލިކޮށްދޭ ވަސީލަތްތައް ކަމުގައި ހެދުން ކަމަށް އެމަނިކުފާނު ވިދާޅުވިއެވެ. އެގޮތުން ބަނދަރާއި މަގާއި އެއަރޕޯޓާއި، ކަރަންޓާއި، ފެނާއި، ނަރުދަމާއަކީ އިގްތިސާދީ ޙަރަކާތުގެ ދުވެލި ބާރުކުރުމަށް ރައްޔިތުން އަތަށްދޭ ވަސީލަތެއް ކަމަށް ބެލުން ކަމަށް ރައީސް ވިދާޅުވިއެވެ.

ޖުމްލަ 134 ރަށުގެ ބަނދަރުގެ މަސައްކަތް އެކި މަރުޙަލާގައި ހިންގަމުންދާކަން ފާހަގަކުރައްވައި ރައީސް ސާލިހު ވިދާޅުވީ މިހާތަނަށް 28 ރަށުގެ ލަފާފުރުމުގެ މައްސަލަ ހައްލުކޮށްދެވިފައިވާ ކަމަށެވެ.

ލޯކަލް ޓޫރިޒަމަށް އިޝާރާތްކުރައްވައި ރައީސް ސާލިޙު ވިދާޅުވީ މާލެއަތޮޅު މާފުށި މުޅި ދުނިޔެއަށް ހުޅުވި، އެތައް އަހަރެއްވީއިރުވެސް، ދާދިމިދާކަށް ދުވަހާއި ޖެހެންދެން ވެސް ޖެހިގެން އޮތް ގުޅި އޮތީ ތުންބަނދެވި ބަންދުވެފައި ކަމަށެވެ. ގިނަ ރަށްރަށް ފަދައިން، ގުޅީގައި ހުރި ފެންވަނީ ފާވެ، ނަޖިހުން ތަޣައްޔަރުވެފައި ކަމަށް އެމަނިކުފާނު ވިދާޅުވިއެވެ. ނަމަވެސް، މިހާރު ގުޅި ފުރި، ބަންޑުންވަނީ ސާފު ތާޒާ މީރު ފެނުންކަމަށް ރައީސް ވިދާޅުވިއެވެ. އަދި ވިދާޅުވީ ސަރުކާރުގެ އަމާޒަކީ، ރާއްޖޭގެ ހުރިހާ ރަށެއް އެމާޒީއާއި އެކުވެ ބައްސައިލުން ކަމަށެވެ.

ރައްޔިތުން ރަށުބަންދުން ވީއްލުމަކީ މިސަރުކާރުގެ ވައުދެއް ކަމަށްވާއިރު، އެ ވައުދު ފުއްދުމަށް މިހާރު ހައިސްޕީޑް ފެރީ ނެޓްވަރކެއްގެ ގޮތުގައި މުޅި ބޮޑުތިލަދުންމަތީގައި މި ޚިދުމަތް ފެށުމަށް ލޯންޗްތައް ކުޅުދުއްފުށްޓަށް ގެންގޮސް، ޓްރަޔަލް ދަތުރުތައް ފަށާފައިވާ ކަމަށް ރައީސް ސާލިޙު ވިދާޅުވިއެވެ.

މީގެ އިތުރުން ރައީސް ސާލިޙު ވިދާޅުވީ ރާއްޖޭގެ ސަރަހައްދީ ބަނދަރުތަކަށް ބައިނަލްއަޤްވާމީ ކާގޯ ޚިދުމަތް ގަވާއިދުން ފެށިފައިވާ ކަމަށާއި، ދެކުނަށް މުދާ އުފުލަނީ ރާއްޖޭގެ ޤައުމީ އާގުބޯޓު ކުންފުނިން ކަމަށެވެ. އެއީ ކޮވިޑުގައި ދުނިޔެ ހުއްޓުނު ވަގުތު ދުއްވައިގަތް ދިވެހި ރައްޔިތުންގެ އާގުބޯޓު ކުންފުނި ކަމަށާއި، އެ ދަނޑިވަޅުގައި ރާއްޖެއަށް ބޭނުންވާ އަސާސީ މުދަލާއި، ބޭހާއި ކާޑަށް ހުއްޓުމެއް އަޔަނުދިނުމަށް ފެށި އައު ފެށުމެއްގެ ގޮތުގައި އެމަނިކުފާނު ފާހަގަކުރެއްވިއެވެ.

ރައީސް ސާލިޙު ވިދާޅުވީ ކުރު މުއްދަތެއްގައި ހީނުކުރާވަރުގެ ކުރިއެރުމެއް ހޯދައި، ދާދި މިދާކަށްދުވަހު އަދި އިތުރު އާގުބޯޓެއް އެކުންފުނިން ގަނެފައިވާ ކަމަށާއި، މެރިޓައިމް ދާއިރާއިން ދިވެހިން ތަމްރީނުވުމަށް އެކުންފުނިން އިއުލާން ކުރާ ކަމަށެވެ. މިއީ އޮއްސި ފުސްވަމުންދިޔަ ރާއްޖޭގެ ކުލަރީތި މާޒީގައި އަލުން ކުލަޖެހުންފަދަ ކަމެއްގެ ގޮތުގައިވެސް އެމަނިކުފާނު ސިފަ ކުރެއްވިއެވެ.