ސްޓޫޑެންޓް ލޯނުގެ އިދާރީ ފީ 1 އިންސައްތައަށް ކުޑަކޮށް، ލޯނު އަނބުރާ ދެއްކުން 20 އަހަރަށް އިތުރުކޮށްފައިވާ ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙު ވިދާޅުވެއްޖެއެވެ.

ރިޔާސީ ބަޔާން އިއްވަވަމުން ރައީސް ވިދާޅުވީ، ރަނގަޅު ހެދިހުރި ޒުވާނަކަށް ބޭނުންވާ ތަޢުލީމާ ތަރުބިއްޔަތު ދިނުމަށްވުރެ ބޮޑު އިންވެސްޓްމެންޓެއް ގައުމަކުން ނުކުރާނެކަމަށެވެ. އެގޮތުން ސަރުކާރާ ހަވާލުވެވަޑައިގެންނެވިއިރު ރާއްޖޭގެ ހުރިހާ އަތޮޅެއްގައި މަތީ ސާނަވީއަށް ކިޔެވުމުގެ ފުރުޞަތެއް ނެތްކަން ފާހަގަކުރައްވައި ރައީސް ވިދާޅުވީ، މިއަދު މުޅި ރާއްޖޭގެ ހުރިހާ އަތޮޅެއްގައި ވެސް މިހާރު މަތީ ސާނަވީއަށް ކިޔެވޭނެ ފުރުޞަތު ފަހިކޮށްދެވިފައިވާ ކަމަށެވެ.

ބިނާކުރަނިވި އައު ޖީލެއް އުފެއްދުމަށްޓަކާ އެޅުނު އެންމެ މުހިންމު ބިންގަލަކީ ހިލޭ ޑިގްރީ ޕްރޮގްރާމްކަން ފާހަގަކުރައްވައި ރައީސް ވިދާޅުވީ، ފުރަތަމަ ޑިގްރީއާ ހަމައަށް ހިލޭ ކިޔެވުމުގެ ފުރުޞަތު ހަމަ ކޮންމެ ދިވެހި ޒުވާނަކަށް މިއަދު އެބަ އޮތް ކަމަށެވެ.

ރައީސް ވިދާޅުވީ، މިއަދާ ހަމައަށް 16،315 ދަރިވަރުން ސަރުކާރުގެ ހިލޭ ޑިގްރީ ޕްރޮގްރާމްގައި ބައިވެރިވެފައިވާ ކަމަށާއި، 6500 އަށްވުރެ ގިނަ ދަރިވަރުން ދަސްވެނިވެއްޖެ ކަމަށެވެ.

ރާއްޖެއިން ބޭރުން މަތީ ތަޢުލީމުގެ ލޯން ފުރުޞަތަށް އެދޭ ދަރިވަރުންގެ އަދަދު ގިނަކަން ފާހަގަ ކުރައްވައި ރައީސް ވިދާޅުވީ، އެ ފުރުޞަތު ފަހިކޮށްދިނުމަށް ސަރުކާރުން ދޭ ލޯނުގެ އަދަދު އެތައް ގުނައެއް އިތުރު ކޮށްދެވިފައިވާ ކަމަށެވެ.

މިހާތަނަށް 1986 ދަރިވަރަކަށް ސްޓޫޑަންޓް ލޯނުގެ ފުރުޞަތު ދެވިފައިވާކަމަށް ވެސް ރައީސް ވިދާޅުވިއެވެ.

ރައީސް އިތުރަށް ވިދާޅުވީ، ލޯނުތަކުގެ ތަކުލީފު ކުޑަކުރުމަށްޓަކައި ސްޓޫޑަންޓް ލޯނު ސަރުކާރުން ރީ-ސްޓަރަކްޗަރ ކޮށްފައިވާ ކަމަށެވެ. އެގޮތުން ކުރިން 5 އިންސައްތައިގައިހުރި އިދާރީ ފީ 1 އިންސައތައަށް ވަނީ ކުޑަ ކޮށްފައެވެ.

އަދި ލޯނު އަނބުރާ ދެއްކުން 20 އަހަރަށް އިތުރުކޮށްފައިވާކަމަށް ވެސް ރައީސް ވިދާޅުވިއެވެ.

ރައީސް ވިދާޅުވި ގޮތުގައި މިގެނެވުނު ބަދަލާއެކު ކުރީގެ ބޮޑު ރޭޓްގާ ދެއްކި ފައިސާ ވާނީ ޖުމްލަ ލޯނު އަދަދުން އުނިކުރެވިފައެވެ. އަދި ކޮންމެ މަހަކު ދަރިވަރުން އަނބުރާ ދައްކާ ފައިސާ މިހާރު ކުޑަވާނެއެވެ.

އޭގެ އިތުރުން، މީގެކުރިން ސްޓޫޑަންޓް ލޯނު ނަގައިގެން ކިޔެވި ކުދިންގެ ކަންބޮޑުވުންތަކެއް އަދިވެސް އެބަހުރިކަން ފާހަގަ ކުރައްވައި ރައީސް އިތުރަށް ވިދާޅުވީ، ކުރިއަށް އޮތްތަނުގައި ދިވެހި ޒުވާނުންގެ ހުރި މިފަދަ ހުރިހާ ބުރައެއް ލުއިކޮށްދިނުމަކީ އެމަނިކުފާނުގެ އަމާޒު ކަމަށެވެ.

ދިވެހި ޒުވާނުންނަށް އަލިއަޅުވާލައްވާ ރައީސް އިތުރަށް ވިދާޅުވީ، 6000 އަށްވުރެ ގިނަ ހުނަރުވެރިން ވަޒީފާގެ ބާޒާރާއި، މަސައްކަތު މާހައުލަށް ފައްކާ ކުރުމުގެ މަޝްރޫޢު ހިނގަމުންދާ ކަމަށެވެ. އެގޮތުން ރާއްޖޭގެ އެކި ސަރަޙައްދުތަކުގާ ޖޫނިއަރ ކޮލެޖް، ޓިވެޓް ސެންޓަރު އަދި ޕޮލިޓެކްނިކް ސެންޓަރުތައް ޤާއިމްކުރުން ކުރިއަށްދާކަން ރައީސް ފާހަގަ ކުރެއްވިއެވެ.