ހުނަރުވެރި ދަރިވަރުން މުދައްރިސްކަމާއި ކުރިމަތިލާން އެޑިޔުކޭޝަން މިނިސްޓަރު އެދިވަޑައިގެންފި
ގުރެޖުއޭޓް ލެވެލްގެ ސެކަންޑަރީ ޓީޗަރެއްގެ މުސާރަ، އިތުރުގަޑި ނުލާ 12,628 ރުފިޔާ އިން 19,740 ރުފިޔާއަށް ބޮޑުވެގެންދާނެ
އެޑިއުކޭޝަން މިނިސްޓަރު ޑރ. އައިޝަތު އަލީ
މީގެ ކުރީން ދުވަހަކުވެސް ބޮޑު ކޮށްދީފައި ނުވާ މިންވަރަކަށް މުދައްރިސުންގެ މުސާރަ ބޮޑުކޮށްދެއްވަން ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އިއުލާންކުރެއްވުމަކީ ސްކޫލްތަކާއި ގުޅިފައިވާ ހުރިހާ ފަރާތްތަކަށް ލިބުނު މަތިވެރި އުފަލެއްކަމަށް އެޑިޔުކޭޝަން މިނިސްޓަރު ޑރ. އައިޝަތު އަލީ ވިދާޅުވެއްޖެއެވެ.
މިއަހަރަށް ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ވިދާޅުވީ ޓީޗަރުންގެ މުސާރަ ބޮޑުކުރުމަށް މިސަރުކާރުން ވެފައިވާ ވައުދުގެ ދަށުން މެއި މަހުން ފެށިގެން ތައުލީމީ ދާއިރާގެ ހުރިހާ މުވައްޒަފުންގެ މުސާރަ ބޮޑުކުރުމަށް ނިންމަވާފައިވާކަމަށެވެ. އެގޮތުން މިބަދަލާއެކު، ގުރެޖުއޭޓް ލެވެލްގެ ސެކަންޑަރީ ޓީޗަރެއްގެ މުސާރަ, އިތުރުގަޑި ނުލާ 12,628 ރުފިޔާ އިން 19,740 ރުފިޔާއަށް ބޮޑުވެގެންދާނެ ކަމަށާއި މިއީ 56 އިންސައްތައިގެ ކުރިއެރުމެއްކަމަށް ރައީސް ވިދާޅުވިއެވެ.
ރައީސްގެ މިކަން ހާމަކުރެއްވުމާއި ގުޅިގެން އެޑިޔުކޭޝަން މިނިސްޓަރު ކުރެއްވި ޓްވީޓެއްގައި ވަނީ ހުނަރުވެރި ދަރިވަރުން މުދައްރިސްކަމާއި ކުރިމަތިލާ، މޮޅެތި މުދައްރިސުން ވަޒީފާގައި ދެމިތިބޭން އެދިވަޑައިގަންނަވާފައެވެ.
ސަރުކާރުގެ ސްކޫލްތަކުގައި މަސައްކަތް ކުރާ ޓީޗަރުންގެ މުސާރައިގެ އޮނިގަނޑަށް ބަދަލު ގެނެސް ޕޭ ކޮމިޝަނަށް ފޮނުވާފައިވާ ކަމަށް 2019 ވަނަ އަހަރުގެ އޮކްޓޯބަރު މަހު އެޑކިޔުކޭޝަން މިނިސްޓަރު ޑރ. އައިޝަތު އަލީ ވަނީ ވިދާޅުވެފައެވެ. އެންމެފަހުން ޓީޗަރުންގެ މުސާރައަށް ބަދަލު ގެނެސްފައިވަނީ 2015 ވަނަ އަހަރުއެވެ. އެއޮނިގަނޑަށް އަމަލުކުރަން ފަށާފައިވަނީ 2016 ވަނަ އަހަރުއެވެ.
ތައުލީމީ ދާއިރާގައި މިވަގުތު ދާއިމީ ދިވެހި ޓީޗަރުންގެ ގޮތުގައި 6،498 ޓީޗަރުންނާއި ބިދޭސީ 1،730 އަދި ވަގުތީ 891 ޓީޗަރުންނާއެކު ޖުމްލަ 9،119 ޓީޗަރުން މަސައްކަތްކުރެއެވެ.
