ފީލްޑްގައި މަސައްކަތް ކުރާ ފުލުހުން މިމަހުގެ ތެރޭގައި ބޮޑީ ކެމެރާ ބޭނުންކުރަން ފަށާނެކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސާލިޙު ވިދާޅުވެއްޖެއެވެ.
ބުރާސްފަތި ދުވަހު ރިޔާސީ ބަޔާން އިއްވަވަމުން ރައީސް ސާލިޙު ވިދާޅުވީ، ޤާނޫނު ތަންފީޒްކުރުމުގެ އެންމެ ކުރީ ސަފުގައި ތިއްބަވަނީ ދިވެހި ފުލުހުން ކަމަށެވެ. އެގޮތުން ފުލުހުންގެ މުއައްސަސާ އިތުރަށް ހަރުދަނާކުރުމަށްޓަކައި އެކުލަވާލެވުނު ދިވެހި ފުލުހުންގެ ޚިދުމަތުގެ ޤާނޫނު މިހާރު ތަންފީޒުކުރަން ފަށާފައިވާކަމަށް ރައީސް ވިދާޅުވިއެވެ.
އެއާއެކު ފުލުހުންގެ ޚިދުމަތަކީ އިންސާނީ ހައްޤުތަކަށް އިހްތިރާމު ކުރުމާއެކު ޤާނޫނުގެ ހުކޫމަތުގެ ތެރެއިން ދެވޭ ޚިދުމަތެއްކަން ކަށަވަރުކުރެވޭނެކަމަށް ރައީސް ވިދާޅުވިއެވެ. އަދި މި ދައުރުގެ ތެރޭގައި ރާއްޖޭގެ މީހުން ދިރިއުޅޭ ހުރިހާ ރަށެއްގައި ފުލުހުންގެ ޚިދުމަތް ޤާއިމްކުރުމަށްޓަކާއި ތައްޔާރުކުރެވިފައިވާ ޕްލޭން މިހާރު ތަންފީޒު ކުރަމުންދާކަންވެސް ރައީސް ފާހަގަކުރެއްވިއެވެ.
މުޖްތަމަޢުގެ އަމާންކަން ދެމެހެއްޓުމުގައި ފުލުހުންގެ ދައުރު އިތުރުކުރުމުގެ ގޮތުން، ރާއްޖޭގެ ހަތަރު ސިޓީގައި އަދި ހުވަދުއަތޮޅާއި އަރިއަތޮޅުގައި މިހާރު ވަނީ ނެއިބަރހުޑް ޕޮލިސިންގ ރަސްމީކޮށް ފަށާފައިކަމަށް ރައީސް ވިދާޅުވިއެވެ. ރައީސް ވިދާޅުވީ މިއަހަރުގެ ތެރޭގައި، ކ.އަތޮޅާއި، ތ.އަތޮޅުގައި މި މޮޑެލް ރަސްމީކޮށް ފަށާނެކަމަށެވެ.
ދިވެހި ފުލުހުންގެ ޚިދުމަތް އިތުރަށް ހަރުދަނާކޮށް ޖަވާބުދާރީކުރުވުމަށް، ޒަމާނީ ޕޮލިސިންގ ފަލްސަފާއެއް މިހާރު އެމުއައްސަސާގައި އޮތްކަންވެސް ރައީސް ފާހަގަކުރެއްވިއެވެ. އެގޮތުން ފީލްޑްގައި މަސައްކަތްކުރާ ފުލުހުން މިމަހުގެ ތެރޭގައި ބޮޑީކެމެރާ ބޭނުންކުރަން ފަށާނެކަމަށް ރައީސް ވިދާޅުވިއެވެ.
ފުލުހުންގެ ތަހްޤީގުތައް މިހާރަށްވުރެ ޒަމާނީވެ ފުރިހަމަވާން އެބަޖެހޭކަމަށްވެސް ރައީސް ވިދާޅުވިއެވެ.
ފުލުހުންގެ ޚިދުމަތް ފުޅާކުރުމަށް ބޭނުންވާ އިތުރު ފުލުހުންނާއި، ތަމްރީނު އަދި ވަސީލަތް ސަރުކާރުން ފޯރުކޮށްދޭނެކަން ރައީސް ފާހަގަކުރެއްވިއެވެ. އެގޮތުން އަމާޒަކީ ދިވެހި ފުލުހުންގެ ޚިދުމަތަށް ރައްޔިތުންގެ އިތުބާރާއި ޔަޤީންކަން އިތުރުކުރުންކަން ފާހަގަކުރައްވައި ރައީސް ވިދާޅުވީ، މުދަލާއި ހަށިފުރާނައިގެ ރައްކާތެރިކަމުގައި އަބަދުވެސް ރައްޔިތުންނާއި އެންމެ ގާތުގައި ތިއްބަވާ ދިވެހި ޤައުމީ ފައުޖަކީ ދިވެހި ފުލުހުން ކަމަށެވެ.
