ރިލްވާން މައްސަލައިގެ ތަހުޤީޤު މަރު ކޮމިޝަނުން އެއްކޮށް ނިންމައި، މިއަހަރު މެދުތެރޭގައި ރައީސަށް ހުށައަޅަނީ
3 ފެބުރުއަރީ 2022 | ބުރާސްފަތި 05:06ކުރީގެ މަރުތަކަށް އިންސާފު ހޯދުމުގައި އުންމީދު ކުރިވަރަށް ވުރެ މާ ބޮޑުތަން ލަސް
ނޫސްވެރިޔާ ރިލްވާންގެ މައްސަލައަށް އިންސާފު ހޯދުމަށް އެދި ބޭއްވި އެއްވުމެއްގެ ތެރެއިން
ނޫސްވެރިޔާ އަހުމަދު ރިލްވާންގެ މައްސަލައިގެ ތަހުޤީޤު މަރު ކޮމިޝަނުން އެއްކޮށް ނިންމައި، މިއަހަރު މެދުތެރޭގައި ރައީސަށް ހުށައަޅުއްވާނެކަމުގެ ޔަޤީންކަން ދީފައިވާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ސާލިޙު ވިދާޅުވެއްޖެއެވެ.
ބުރާސްފަތި ދުވަހު ރިޔާސީ ބަޔާން އިއްވަވަމުން ރައީސް ސާލިޙު ވިދާޅުވީ، ކުރީގެ މަރުތަކަށް އިންސާފު ހޯދުމުގައި އުންމީދު ކުރިވަރަށް ވުރެ މާ ބޮޑުތަން ލަސްކަމަށެވެ. އަދި އެކަމުގައި ކުރަންޖެހޭ މަސައްކަތާއި، ފިލުވަންޖެހޭ އޮޅުން ބޮޑުކަމަށެވެ.
މަރު ކޮމިޝަނުން އެންމެ އިސްކަމެއް ދީގެން ކުރިއަށް ގެންގޮސްފައިވަނީ ނޫސްވެރިޔާ އަޙްމަދު ރިލްވާން ގެއްލުވާލާފައިވާ މައްސަލަކަން ފާހަގަކުރައްވައި ރައީސް ވިދާޅުވީ، މިހާތަނަށް ކޮމިޝަންގެ ފަރާތުން 200 އަށް ވުރެ ގިނަ މީހުންނާއި ސުވާލުކޮށްފައިވާ ކަމަށެވެ. ބޭރުގެ ފައިނޭންޝަލް އެކްސްޕަރޓެއްގެ އެހީގައި މާލީ މުޢާމަލާތްތައް އެނަލައިޒްކޮށްފައިވާކަންވެސް ރައީސް ފާހަގަކުރެއްވިއެވެ.
ރައީސް ވިދާޅުވީ، މި އަހަރުގެ މެދުތެރޭގައި ތަހްޤީގު އެއްކޮށް ނިންމައި ކޮމިޝަންގެ ހޯދުންތައް އެމަނިކުފާނަށް ހުށަހަޅާނެކަމުގެ ޔަޤީންކަން ދެއްވާފައިވާކަމަށެވެ.
ދާދިފަހުން ޝަރުޢީ ފުރަތަމަ މަރުހަލާ ނިމިފައިވާ ޔާމީން ރަޝީދުގެ މަރުގެ މައްސަލައަށްވެސް ރައީސްގެ ވާހަކަފުޅުގައި އަލިއަޅުވާލެއްވިއެވެ. އެގޮތުން ކުށް ސާބިތުނުވި ފަރާތްތަކުގެ މައްސަލަ އިސްތިއުނާފަށް ހުށަހެޅުމުގެ މަސައްކަތް ޕީޖީ އޮފީހުން ފަށާފައިވާކަން ރައީސް ފާހަގަކުރެއްވިއެވެ.
މިމައްސަލައިގައިޙުކުމްކޮށްނިންމާފައިވަނީ ދައުވާ ލިބޭ އިސްމާއިލް ހައިޝަމާއި އަހުމަދު ޒިހާންގެ މައްޗަށް ކުށް ސާބިތުވާކަމަށާއި، ބާކީ ތިބި 4 މީހުންގެ މައްޗަށް ދައުލަތުން އުފުލާފައިވާ ދައުވާ ސާބިތުނުވާ ކަމަށެވެ. އެގޮތުން ކުށް ސާބިތުނުވާކަމަށް ނިންމާފައިވަނީ މ. ކޮޅުފުށީ އީސްޓް ހުސައިން ޒިޔާދާއި، މ.ތާއިފް އިސްމާއީލް ރަޝީދާއި، މ.ކުދެހިގެ ހަސަން ޝިފާޒާއި، ގދ.ގައްދޫ ސިންދުބާދުގޭ މުހައްމަދު ދިފްރާނުގެ މައްޗަށެވެ.
ރައީސް ވިދާޅުވީ، ޔާމީން ރަޝީދުގެ މަރުގެ މައްސަލަ އޭރު ކޯޓުގައި އޮތުމުން ރިޔާސީ ކޮމިޝަނުން ތަހްޤީގު ކުރުމަށް ކަނޑައަޅާފައިވާ ބައި، ކުރިއަށް ނުގެންދެވި އޮތް އޮތުން މިހާރު ނިމިފައިވާ ކަމަށެވެ. އަދި އެމައްސަލައިގެ ތަހްޤީގު ރިޔާސީ ކޮމިޝަނުން މިހާރު ކުރިއަށް ގެންދާކަމަށްވެސް ރައީސް ވިދާޅުވިއެވެ.
